Wemmern Elbdamm länk jeht, doa sieht mer mang de Elbwiesen immer sone jroßen un kleenen Teiche. Se soahn, doa wiere frieher de Elwe jeloofen, un wiese sich e neies Bette suchen toat, doa wieren de Teiche iwrig jeblem’n. Desterwähn heeßense jo oo „ahle Elwe“, mänichesmoah oo „Schtreng“ oder oo „Riß“, un mänichesmoah oo „Kolk“ un no annerich.
De Elwe is nämlich wie son junkes iwermietiges Fährd; wemmer das nich forsch an Ziehgel hält, naher jehts durch.
Nu is jo das jetzt annersch, seitse de Elwe rejeliert han.
Un wennse oo beis Hokwasser aus de Ufer tritt, doa hältse der Elbdamm ans Schlawittchen feste, dasse nich durchbrechen un in de Feller loofen kann, die sunsten allehoofe varsausen mißten.
Awwer freilich, uffpassen muß mer.
Desterwähn missen oo de Derfer in de Elbaue beis Hokwasser Dammwache schtelln.
Dadermet nu de Machmänner nich beis Wind un Wetter ins Freie schtehn missen, hot mer an Damm länk hen Wachheischen jebaut, wuse sich uffhalen kennen.
Ins Wasser vun die Teiche sin natierlich oo Fische, un zwoarschtens
recht ville un scheene Fische, un de Bauern, die de Wiesen jeheeren, die jeheeren oo de Teiche met de Fische, diese mets Joarn un met de Joarnsäcke fangen tun.
’s jimet freilich oo Leite, die keen Wasser met Fische han, die awwer doch oo jarne Fische essen mechten.
Na, un was machen die doa?
Wennse marken tun, daß e Bauer Joarnsäcke geschtellt hot, doa machense sich heemlich darbei un nähmen de Fische raus.
Awwer freilich, derwischen därfense sich darbei nich lasen, sunsten jiwets was raus, denn bei sowas heert bei unse Bauern de Jemietlichkeet uff.
So’n Fischreiwer woar nu oo der Schuster Meier.
E aß sehre jarne Fische, un seine Fraue oo.
Awwer sich welche ze koofen, daderzu woarnse alle beede ze jeizig. Un se hottens joar nich neetig, denn se schtunden janz ju da. –
’s woar kortsch varn juten Montak, wiese in de Elbaue zus Arntefest soahn, un daderzu wolle mer natierlich oo Fische han, weil mer doch ’n Besuch was recht Jutes vorsetzen mechte.
An Donnerschtak vorsch’s Fest junk denn oo der Hiefner Barndt met de Joarnsäcke nahn Riß.
E mußte bein Schuster Meier varbei, der jeroade in sein Joarten war un Äppel zun Kuchen langete.
Alse nu met de Appels zu seine Frau kamb, doa soahte zuse:
„Hastes jesähn, Alwine? Doa junt ämn Barndt met de Joarnsäcke
nahn Riß. Weeßte was, doa wäre ich heite Oawend, wenns dunker is, emoah nachsähn, ab was drinne is. Ich weeß jo, wuese immer uffschtelln tut. De mechtest doch jewiß oo jarne Fische zun juten Montak han.“–
„Na ja – ich würre jarne Bierfisch machen. De weeßt jo, daß de Wittenbarcher kummen, un die salln nich soahn, dasses bei uns nischt Jescheites jiwet.“
De Meiern toat sich bei all ehren Jeiz jarne e bißchen dicke.
„Awwer“, meentese, „Iaß dich jo nich derwischen; das würre e scheenen Klamauk ins Dorf jän. Willste nich liewer janz frieh jehn?
’s kinne dich ins Dunkere was passieren.“
„Was sall mich denn passieren? ’s is jo all Mondschein, un ich hawe doch efftersch schon de Joarnsäcke in Riß jehom’n.“
„Na, das schon – awwer de weeßt doch: ’s sall doa nich janz jeheier sin.“ – Der Schuster lachte.
„Ach, de meenst wohl den dummen Schwatz vun wejen den Schpiekeding, vun de weiße Fraue, die den varzauwerten Schatz bewacht? Na, ich würre joar nischt darjejen han, wennse mich den Schatz zeijen täte. Da wolle ich awwer jrabschen!“
„Weeßte, Meier, ewer sone Sachen sall mer nich schpotten.“
„Awwer, Alwine, de jloobst doch nich etwa an den Quatsch? Jeschpenster jiwets niche.“
„Na, ich weeß nich -’s hans doch schon mäniche jesähn.“
„Wer hots denn jesähn?“
„Na, der Keiler.“
„Der Keiler – das ahle Waschweib. Der hot woahrscheinlich wedder een hinger de Binde jejossen gehatt, un denn siehte immer Jeschpenster. Bloß de Schpitzbuwen uffn Acker siehte niche.“
„Ich würre awwer doch nich in Dunkern jehn.“
“ ’s jeht nich annersch. Frieh isses mich ze unsicher.“
Wie’s nu Oawend wurre un so jegen elwe junk, doa noahm Schuster Meier ’n Sack, wu e de Fische nin tun wolle, un machte sich uffen Wegg. An Himmel zoken dicke Wulken, un bloß mänichesmoah kukte der Mond e bißchen durch.
Ins janze Dorf woarsch dunker, bloß in Jasthoff brannte no Licht.
Wie nu der Schuster bahle ran woar, doa koamen zwee raus – der Hiefner Barndt un der Mindmiller Jräwitz.
E machte sich uff de annerte Seite, dassen de Beeden nich derkennen sallten.
„Na nu“, soahte Jräwitz, „das woar doch der Schuster! Wu will denn der no so schpete hen?“
„Hm“, meente Barndt, „der hottes jo furchterlich eilig.“
Weiter soahte awwer nischt.
Meier woar aus Dorf raus un loff nahn Riß zu. Der Mond woar aus de Wolken jetreten, un mer kunne alles deitlich derkennen.
E machte ’n Koahn ab, der an’n Fahle anjebungen woar, un petschelt los.
E hotte oo bahle ’n ierschten Joarnsack jefungen un treckten hok.
E jroßer Bleyer zappelte drinne. Meier schluken mets Petschel uffen Kopp un schteckten in’n Sack nin.
E schtellte ’n Joarnsack wedder an sein Ohrt un fuhr weiter zun zweeten. Un wie e den hob, doa woaren zwee scheene fette Karpen drinne.
„Jlick muß der Mensch han“, soahte zu sich.
De Karpen wurren bein Bleyer in Sack jeschtochen, un nu junks zun
dritten Joarnsack. Awwer wie e den hoktreckte, doa woare leddig.
„Na denn nich“, soahte der Schuster, “ ’s is jo oo jenunk, un ’s wil oo wedder dunker wern.“
E fuhr zerrick un machte ’n Koahn wedder feste.
„Amwer die han ehre Gewicht“, dachte, wie ’n Sack met de Fische uff
de Schuller noahm.
„Doa ward meine Ahle sich awwer freien.“
Wie e nu hinger de Weidenbische vorkoam, die dоа schtun’n, doa schtund uff emoah vor’n eene weiße Jeschtalt nich weit vuns Dammhaus.
E blebb wie anjewurzelt schtehn, un de Hoare schteeken ze Barge.
’s fiehlen in, was seine Ahle vun de weiße Frau jesoaht hotte.
Jetzt winkten de weiße Jeschtalt met de Hand.
„Die will mich amende ’n varzauwerten Schatz zeigen“, fuhrschen durchen Kopp. „Also Mut, Meier, ’s kann dein Jlicke sein.“
Lanksam junke e poar Schritte nah vorn.
De weiße Jeschtalt junk vorn her noahs Wachhaus.
DeTiehre junk uff. De weiße Fraue drehte sich noahn Schuster
um un winkten wedder.
„Salle amende der Schatz ins Wachhaus vargrawen sin?“doachte der. „Noa, mer wern jo sähn; ’n Kopp wards nich jlei kosten.“
’s Harze bewerten awwer doch janz jewaltigt, wie e furchtsen hingersche her ins Wachhaus junk. ’s woar drinne janz schtokduster.
Wie e nu so doaschtund, doa dachte, ’s würre nu jlei helle wern un der varzauwerte Schatz zun Vorschein kummen.
E machte schon ’n Sack uff, ums ville Jold un Silwer nin ze tun.
Uff emoah sauste das weiße Schpiekeding an’n varbei, jaben e Schtoß, dasse taumelte un schluken de Tiehre var de Noase zu.
Der Schuster schreek laut uff un schtund da wie vun Dunner jeriehrt. E heerte bloß no, wies draußen hellewegt lachte – un nu woar alles mudsmeischenschtille.
E jrabbelte sich hok un loff noah de Tiehre.
E klinkte un rittelte de – Tiehre woar zugeschlossen.
E loff zus Fenster un risses uff – awwer e kunne nischt sähn.
Zus Fenster raus kunne oo nich, denn darvor woaren Eisenschtäwe –
e woar richtig injeschparrt.
Nu loffe wedder noah de Tiehre; e wurre janz wietend un dunnerte met de Feiste un de Beene darjejen – ’s holfen awwer nischt, de Tiehre blebb zu.
Doa schluge de Hände varn Kopp un sank schtehnend uff e Schtuhl, der doa schtund. –
Darweile toat de Meiern heeme uff ehren Mann lauern un wunnerte sich, dasse so lange blebb. Se hotte sich e bißchen uffs Kanepee geläht, weilses Licht schpoaren wolle, awwer schloafen kunnese nich. ’s schlug zwelme, ’s schlug eens – e koam immer no nich.
Weilse sehre miede woar, doa woarsche zeletzt e bißchen injenippt. Uff emoah wurrese munter un fuhr hok.
Draußen funks all an ze dämmern, denn ’s junk schon uff dreie.
Ehre Mann woar awwer immer no nich doa. Jetzt kriegteses met de Angest ze tun:
’s mußten e Unjlicke zujeschtoßen sin!
Se zok sich rasch de Jacke an, band de Koppkuke um un loff so rasch se kunne noahn Riß.
’s woar awwer vun ehren Manne weit un breet nischt ze sähn.
Ans Ufer schtund der Koahn mets Petschel.
Se roff iwersch Wasser: „Harmann! Harmann!“
Uff emoah heertese hinger sich ehren Noamen rufen:
„Alwine!“
„Harmann, wu biste denn? Ich sähe dich jo nich!“
’s Weenen woarsche noahe, denn seine Schtimme klunk so holl, als kämbse ausen Jrawe. ’s fuhrse e Schrecken durch alle Jlieder:
ehre Mann woar amende ins Wasser jefallen un darbei varsoffen, un nu woarsch sein Jeist, dersche rufen tat.
„Alwine, kumm doch her varsch Dunnerwetter!“roffs doa wedder.
„Wuhen denn, mein liewer Harmann? Wu biste denn?“
„Wu sall ich denn sin! Doa ins Wachhaus bin ich.“
Se rannte zus Wachhaus hen, so rasch, dasse darbei de Holzlatschen varlor, un da sahkse denn, wie ehre Mann zwischen de Eisenschtäwe durchs Fenster kukte.
„Awwer, Harmann, was is denn met dich? Wie kimmeste denn ins Wachhaus? Un worum kimmste denn nich raus un derschreckst mich so?“
„Worum kimmste denn nich raus?“ quatschtese noah.
„Du dummes Schoaf, wenn ich raus kinne, würre ich mich nich in die vardammte Bude setzen.“
Un nu derzähltese, wassen passiert woar.
„Ja, meenste denn, daß das wurklich e Jeschpenst woar?“ soahtese. „Du met dein dämliches Jeschpenst!“ fuhrese an.
„Hättste mich nischt darvun vorjemährt, wiere ich joar nich uff den varrickten Jedanken jekummen. Das is natierlich so e varfluchter Karl jewäsen, der mich bei de Joarnsäcke beowacht hat. Un ich Esel hawe mich vun’n leimen loasen. Nu hamern Salat.“
„Awwer was machen mer nu bloß?“
„Ja, was machen mer? ’s wurd wohl nischt annertes iwrig bleim, de jehst bei Barndten, der ’n Schlissel zus Wachhaus hot, un läßt dich den gän un schließt uff, denn annersch kumme ich nich raus.“
„Awwer der ward sich doh wunnern, was ich metten Schlissel will. Was sal ich denn doa soahn?“
„Soak meinswejen was de willst“, soahte der Schuster argerlich.
„Un nu mach, daß de henkimmest. Ich will nich länger in die eklige Bude injeschparrt sin; ich bin schon janz ramdesig jeworrn.“
De Meiern loff ins Dorf zerrick un hen bei Barndts.
Barndts Jroßmoahd koam jeroade iwern Hoff un wollе in Kuhschtall jehn. Se woar sehre varwunnert, wie de Schusterschfraue so frieh zer Tiehre rin koam.
Die trukse ehre Ahnliegen vun wegen ’n Schlissel zus Wachhaus vor.
De Moahd kuktese derschtaunt an.
„Was wollter denn metten Schlissel machen?
„Das kann ich dich jetzt nich soahn. Ich derzähle dichs e annertes Moal.“
„Ich kann eich awwern Schlissel nich gän. Ich weeß nich, wu’n der Harre hot, un der schläst no. Da mißter in eener Schtunne vielleicht wedderkumm’n.“
De Meiern junk janz betriewet heeme. Se fitterte ehre Zicken un ’s Schwein, awwer se woar wie varn Kopp jeschloahn.
Beinoahe hätteses Schweinefutter de Zicken un ’s Zickenfutter ’s Schwein jegän.
Jlei nah finfe woarsche wedder bei Barndts.
Barndt woar äm ierscht uffjeschtan’n, un se mußte eene janse Weile
woarten. Se soaß wie uff Kolln. Endlich koam Barndt, un se rickte met ehre Bitte raus.
“ ’n Schlissel zus Wachhaus wollense? Amwer Meiern, was hanse denn ins Wachhaus ze tun?“
Se derzählten nu, daß ehre Mann doa injeschparrt wiere. In ehre Uffregung marktese joar nich, wie Barndt darbei heemlich lachte.
„Der Schuster ins Wachhaus!“ roffe. „Das is mich awwer eene putzige Jeschichte! Awwer ich bin Deichbeamter un darf desterwähn ’n Schlissel nich aus de Hand gän. Da muß ich jlei sälwer metkummen un de Sache ungersuchen.“
Se junken nu alle beede noahn Elbdamm. Ungerweggs derzählten de Meiern vun de weiße Fraue, die ehren Mann injeschparrt hätte.
„Awwer Meiern, das is doch dummes Zeik“, soahte Barndt. „Jeschpenster jiwets jo joar nich. Das jlowetse doch keen Mensch nich, wasse mich doa derzähln.“
Se koamen zus Machhaus. Barndt langete ’n Schlissel aus de Ficke un tat uffschließen.
Der Schuster schtund janz betebbert da.
„Awwer Meester Meier, was sin denn das for Jeschichten?
Nu soahnse mich bloß, wie sinse denn ins Wachhaus jekumm’n?“
Meier derzählten nu wedder de Jeschichte mets Jeschpenst, wiesen de Meiern schone derzählt hotte.
„Jа“ – awwer meente Barndt, „was hottense denn eejentlich in de dunkere Nacht hie bein Riß ze tun?“
Der Schuster wurre janz varlähn un schtotterte was vun varzauwerten Schatz.
E varhetterte sich awwer darbei un wußte nich recht, wasse soahn salle.
„Na, gänse sich nur keene Miehe – mich machense nischt weiß“, soahte Barndt. „Ich weeß schon, wasse jemacht han – ich sähes an Sack.“
Un dadermet machte ’n Sack met de Fische uff, der ungern Schtuhle lak, un den der Schuster janz vargessen hotte.
„Nu weeß ich oo, wer mich immer aus de Joarnsäcke de Fische mausen tut.“
Der Schuster varsicherte hok und teier, dasses wurklich ’s
eenzigste moal jewäsen wiere.
„Na jlom tu ichs jo nich“, soahte Barndt.
„Wersch das eene Moal tut, der hots oo de annerten Moale jetan.“
Meier varlähte sich nu uffs Bitten, un de Meiern ungerschtitzten darbei.
„Se wärn uns doch nich unjlicklich machen, liewester, bester Harr Barndt“, soahtese. “ ’s sall woahr un woahrhaftig nich wedder passiern. Emoah un nich wedder.“
„Na jut“, meente Barndt zeletzt, „ich will no emoah е Ooge zudricken. Awwer das soahe ich se, Schuster: derwische ich se noch emoah beis Mausen, naher nehme ich keene Ricksicht nich. De Fische, die se mich aus meine Jvarnsäcke heite jemaust han, nehme ich natierlich met, denn die brauche ich sälwer.“
Barndt hottes zwoarschtens Meiersch varschprochen, keen was vun de Sache ze soahn, awwer e hottes doch seine Fraue derzählt.
Na un wenn de Weiwessen ierscht emoah was wissen, naher wissens oo bahle alle annerten oo.
Un so dauertes oo joar nich lange, da wußte mersch ins janse Dorf, wie Schuster Meier Fische mausen tat un darbei vun e Jeschpenst ins Wachhaus injeschparrt wurre.
Wern Schoaden hot, der braucht forn Schpott nich ze sorgen, soaht e Schprichwurt.
Wu der Schuster sich sähn Iuß, da wurre jeschtichelt, abbe nich bahle wedder moah bein Riß noahn varzauwerten Schatz suchen wolle
Richard Erfurth
Quelle: Unser Heimatland vom 26.03.1932