s‘ liewe Weihnachtsfest schtund wedder emoa vor de Tiehre. Weihnachten is doch s‘ scheenste Fest in jansen Joahre.
In Thieringen sahnse zwoarschtens de Kärmse wiere jreesteFest, un in de Elbaue machense ville Klamauk metten juten Montak, un  uffen Flämig mets Faßnachten – awwer ’s jeht doch nischt ewer Weihnachten.
Na ja, de Kärmse, der jute Montak un ’s Faßnachten sin janz jewiß nich ze vorachten, awwer die sin doch bloß forn Moagen;Weihnachten awwer is was forschs Harze un forschs Jemiete.
Desterwähn frein sich oo alle druff – nich bloß de Kinner, nee, oo de Jroßen.
Awwer der Moagen kimmet all oo nich ze kortsch darbei, un schon männicher hotten sich zus Fest vardorwen met Jänsebroaten un Honnigkuchen un Schtolle.
Ei ja, de Schtolln – die sin doch de Hauptsache beis Weihnachtsfest metsamst’n Christboom.
Ohne das beedes kammer sich och keen Weihnachten nich denken.
Destermähn jiwet sich oo jede Fraue bеіs Schtollnbacken de jreeßte Miehe; un de janse Freide iwern heele Christ is vardorwen,wenn de Schtolln nich jut jeroaten sin, was männichesmoa vorkimmt, wemmer ze ville rosinen un Mandeln un ze wennigg Hefe ninjetan hot, oder wenn de Hefe nischt doogen tat.
De Frauensleite, die das Unjlicke han, sin ze bedauern, awwer de annerten ins Haus oo, denn doa is de jansen Feiertake bei Muttern schlechtes Wetter.
Na ja, was sall mer denne oo met sone varunjlickten Schtolln machen?
Mer kann sich bloß’n Moagen darmet vardarwen, un das is doch jewiß nich scheene.
No sätter schlimmer isses awwer, wenn de Schtolln ju jeroaten sin, un se kummen in falschen Moagen, wies Richtersch Muttern in Pretzsch met ehre Weihnachtsschtolln passiert is.
Un das will ich emoa derzählen, weils wurklich woahr is un sich männicher was draus nähmen kann.

Richtersch Mutter hotte sich vorjenummen, diesmoa recht jute Schtolln ze backen, meil nämlich ehre Tochter, die in Barlin varheiroat woar, met ehre Mann un de Kinner uff Besuch kummen wollten.
Na, un ehre Schwiegersohn woar sehre kiesätig, wies de Schtädtersch merschtenteels sin, un da mollese se sich nich vun’n bereden lasen.
Seitse met Jottliem’n, was ehre Mannwoar, alleene woar, hotte ze Weihnachten zunderweile bloß zwee Schtollen jebacken; diesmoa awwer wollese viere backen, den de Barliner kunnten schon was vardricken, un metnähmen wolltense doch oo no was.
Weil nu uff Weihnachten de Butter immer e Teel teierter wurd, doa hootese schon beizeiten e paar Schtickchen in Topp jedrickt, un oo e Schock Eier hottese ingeläht, wiese no billiger woarn.
De Richtern buk immer bein Bäcker Kurschner, der uffn Hackschmarchte wohnte.
E hottese uffen Freitaknamittak beschtellt.
„Awwer dasser mich pinktlich kummt, un nich so schpäte wie vorichtes Moal,“ sahte zuse, „denn ich hawe oo no for annerte Schtolln ze backen.“
Se machte also ehren Teek fartig, un wie e so recht scheene jejangen woar, da schafftesen bein Bäcker.
Der mandeltese de Schtolln uff, un wiese so weit woarn, da tatese in Backowen schiem’n.
Jlei na sechse sullese wedder kummen, da wiern de Schtolln fartig, sahte.
Alse iwwern Hackschmarcht junk, da fungs schone an, dunker ze wern, denn vor Weihnachten haln jo he Take nischt.
Se junk heeme, um ierscht no ehre beeden Zicken ze fittern un ze melken, denn se hotte de janse Milch zu de Schtolln varmanscht. Wie nu de Uhr sechse schluk, ba nahm se ’n Topp mette Schtollnschmiere und de Kuchenbarschte un eene Tiete met Zucker, um de Schtolln met Butter ze beschtreichen un met Zuder ze beschtrein, so lange wiese no woarm woarn.
Ehrsche furtgank, sahtese ze ehren Mann:
„Jottlieb, de kimmest nahn Weilechen nah un hilffst mich de Schtolln trahn, darmet daß ich nich zweemoal jehn muß.“

Jottlieb saaß uff be Owenbank un roochte seine kortsche Feife.
Var sich hottes Wittenbarcher Takeblatt un las jeroade de Jeschichte vun de scheene Tänzerin Marischka.
’s paßten jaar nich, dasse ’n woarmen Owen un de Zeitung in Schtich lasen sulle, denn’s woar draußen sehre koalt un schon schtockeduster.
E toat desterwähn, als abbe nischt jeheert hotte.
„Awwer da koame bei Richtersch Muttern scheeb an; se woar sowieso wegens Schtollnbaden in de Rawwelusche jekummen,
denn wenn de Weiwer waschen un backen,
da hanse ’n Deiwel in Nacken,
saht’s Schprichwurt.

Un wiese nu ehren Ahlen so sitzen sahk, als abben de janse Sache nischt anjunk, da wurrese folgenfuchtig.
Se schtaukte ’n Topp uffen Tisch, dasses krachte un fuhr’n an:
„Na, de siehst un heerscht wohl bei deine oahle Zeitunk moal wedder nischt!“
„Was sall ich denn?“ brummte Richtersch Beater Voate argerlich.
„De Schtolln sallste mich helfen heeme trahn.
Oder denkste varleicht, ich sallse alle alleene heeme schleppen, un bu sitzt hingern woarmen Owen un wärmst dich ’n Buckel un läßt ’n liewen Jott ’n frommen Mann sin?“
„Muß denn das heite no sin bei die Kälte un die Dunkerheet?“
„Na, da schlak doch jlei eener lank hen! Nee, son Mannsen is doch emoa ze dämlich! Salln etwa de Schtolln de Nacht ewer bein Bäcker schtiehn bleim’n, dasse mich vartauscht wern, wie’s de Heinrichen vorichtes Joahr passiert is?
Also de kimmest mich in ’ne Vurtelschtunne nah.
Haste mich varschtan’n?“
„Du met deine dämlichen Schtolln!“ fuhrschen raus.“
„So – dämliche Schtolln!? Das is wohl der Dank for meine ville Arweet? For wen hawwe ich se denn jebacken? Etwan for mich?“
„Na, for mich doch nich.“
„For wen denne sunsten? Du ist doch sehre jarne welche.
Un sin denn de Barliner etwan bloß meine Kinner?“
„Desterwähn brauchste nich jlei son Krach je schloan.“
„Wer macht denn ’n Krach? Doch du bloß, weil de ze faul bist, moal vun woarmen Owen furtzejehn un e Schritt ze tun.“
„Na beruhige dich man un mach daß de furtkimmest.
Ich were schon kummen.“ –

Wie nu Richtersch Muhme zun Bäcker Kurschner koam, da koamen jeroade ehre Schtolln ausen Backowen raus.
Se woaren sehre jut jeroaten; der Bäcker meentes sälwer.
Na da freitese sich un beschtrichse met Buttervun schtreite Zucker druff, so dick, dasse aussahken, als wierense beschneiet.
Wiese nu dadermetbfartig woar, da wartese no e janz Weilechen uff Jottliem’n, daß dersche de Schtolln met heeme trahn salle.
Se woar awwer sehre argerlich, dasse immer no nich kam.
Weilse nich länger woarten wulle, nahmse de ierschten zwee uffen Kuchenschiewer und machte sich darmet uffen Wegg.
’s woar draußen so schtockduster, daß mer de Hand nich vor Aogen sähen kunne, un Schtroaßenlaternen jab’s in Pretzsch dazemoa noch nich.
Wiese nu e Schticke vun Hackschmarchte weg woar, da kahmse e Mann entgegen. Se jlowete, ’s wiere ehre Jottlieb, denn e junk janz genau so lanksam un so krumm.
„Na, ’s wurd oo Zeit, daß de endlich kimmest,“ fuhrschen an.
“  ’s is dich wohl sehre schwer jeworrn, hingern Owen vorzekrauchen.
An deine Schtelle hättichen jlei uffgehuckt“.
Jottlieb sahte nischt.
„Na, pack doch zu un nimm de beeden Schtolln. Haltese awwer nich scheeb, dasse dich nich rungervrutschen, un drickse nich so. 
Ich will jlei no de beeden annerten holen. – De kannst awwer liewer jlei no emoa kummen, denn ich muß doch ’n Topp met de Kuchenbarschte un de Tieten metnähmen, un ich mechte oo jlei bein Fleescher for morjen Fleesch koofen. Awwer halte dich e bischen darzu un laß mich nich wedder so lange woarten. Ich kumme dich e Schticke entjegen. Heerschtes?“
Jottlieb brummte bloß „Mm!“ un junk met de Schtollen furt.
De Richtern drehte sich um un tat de annerten Schtollen holen.
Se woar no nich weit vun Hackschmarchte weg, doakoamse Jottlieb schone wedder entjegen.
Se wunnerte sich zwoarschtens, dasse so fix wedder doa woar, sahte awwer weiter nischt.
„Da nimm de Schtolln,“ meentese.
„Se sin alle viere sehre scheen geworrn. Haste dich nich all oo drewwer gefreit?“
„Hm!“ sahte Jottlieb wedder – un weiter nischt.
„Ich will bloß jlei no zun Fleescher; ich kumme jlei nah.“
Un dadermet jabsen‘ n Kuchenschiewer met de Schtolln und junk ewern Wegg nah de Schtroaße, wu der Flescher Brähse wohnen tat.
Bein Fleescher troaffe met de Wesseln aus de Wittenbarcher Schtroaße zesammen, un se machten natierlich ierscht e lanken Schwatz.
Dadrewer woar sone jute halwe Schtunne varjangen, denn:
eh Weiwer ausenanner jehn,
da bleiwense no lange schtehn
un schwatzen.
Als Richtersch Mutter nu heeme koam, da saß ehre Jottlieb no immer met de Filzlatschen uff de Owenbank un qualmte wie’n Fawrikschornschteen.
„Wu haste denn de Schtolln henjestellt?“ froahtesen.
„De Schtolln? – Dunnerwetter!
Das hawe ich jo janz varjessen!“ meente.
„Was haste varjessen?“ froahtese janz varwunnert.
„Nu de Schtolln. Ich sallese dich doch helfen heeme troahn.“
„Na, das haste doch all oo jetan. Ich will bloß wissen, wudese henjeschtellt hast.“
„Was quatschte da? Ich sall de Schtolln heemejetroahn han? – Mutter, de hast wohl heite een jefriehschtickt?
Ich bin joar nich aus de Schtowe rausjekumm’n“
De Richtern luß var Schrecken ’n Topp met de Schtollnschmiere, die no drinne woar, fallen, dasse in Schticke zarschpung.
Er schwante nischt Jutes.
„Awwer ich hawese dich doch an Hackschmarchte jejähn!“ roffse.
„Daß de se furtjejän hast, das marke ich nu schone, awwer mich hastese nich jejän.“
„Awwer wer hatse mich denn abjenumm’n?“
„Ja, wenn du’s nich weeßt, ich weeßes doch niche. –
Na weeßte, sone Dummheet is mich doch in mein Läm’n no nich vorjekumm’n.
Jiwet mich de Fraue ’n ierschten besten, dersche in Wegg leeft, unse Schtolln!
Nee sowas – nee sowas! Sich so betowiesen ze lasen!“
Richtersch Voater wurre orndlich beredsen, un de Feife junken aus, was sunsten sehre selten bei’n vorkam.
Nu wurre awwer oo Richtersch Mutter wietend.
Se schmiß’s Fleesch, wasse injekooft hotte, uffen Tisch, dasses nur so klatschte, un’s fehlte joar nich ville, da wieres Jottliem’n an Kopp jefloggen.
„Wer is denn schuld?!“ roffse, „doch bloß du met deine Faulheet! Wierschte jekummen, wie ichs dich jesoacht hotte, da wieres nich passiert. Awwer da bleibste liewer an Owen hucken un varqualmst’s Jeld, un ich kann sähn, wie ich fartig were.
Du bist bloß schuld un weiter keener!“
Nu wurre Richtersch Voater awwer mardig.
E schprunkvun de Owenbank uff, dassen beinoahebde kkkkoahle Feife aus Maul jefallen wiere un schluk met de Faustvuffn Tisch, daß de Petrolejumlampe wackelte.
„Ach so,“ roffe, „das wurd jo immer sätter scheener!
Wenn du eene Dummheet machst, naher sall ich all dran schuld sin.
Nee, hot mer denn schone sowas jeheert!“
Richtersch Muhme fuhl uffen Schtuhl, schluk de Hände vorsch Jesichte un meente janz derbarmeglich.
„Meine Schtolln, meine scheenen Schtolln!“ schreekse emoal iwersch annerte. „Nee, mer salles nich jlom’n, dasses sone schlechten Menschen jiwet, die een uff offener Schtroaße de Schtolln wegnähmnen tun!“
„Na,“ meente ehre Mann, „wegjenummn’n hansese dich jeroade nich, de hastesen jo sälwer jejän. Na, der Karl ward nich schlecht jelacht han, dasse zunderweile vier scheene Schtolln jeschenkt jekricht hot.“
De Richtern schprunk in de Höchte.
„Was sall denn awwer wern? Meine Schtolln missen wedder her!“ schreekse.
Un darbei trampeltese var Wut mang de Toppscharwen rum, dasse in kortsch un kleene Schticken zertreten wurrn.
„Wedder her – wedder her!“ quatschtese Jottlieb nah, „das is leicht jesoaht, awwer ierscht han.“
„Ich jehe zun Borgemeester. Der muß durchen Polezeidiener nah meine Scholln suchen lasen. Da sall doch ’n Dunnerwetter rinschloan, wenner den varfluchten Karl nich fingen tut, der mich meine scheenen Schtolln wegjenummen hot.“
„De kannst’s jo machen – awwer abs was helfen tut …“ soahte Jottlieb
Richtersch Mutter loff nu jlei, wiese junk und schtund, zun Borgermeester Schtiewing.
Der woar jeroade vuns Rathaus jekummen un nich jeroade sehre erfreit, alsen de Richtern in de Schtowe jeschneiet koam.
Se derzählten, wasse met ehre Schtolln passiert wiere und schimpte natierlich mächtig ewer die schlechten Menschen in Pretzsch.
„Hm,“ meente der Harr Borgemeester, „das is ja eene komische Jeschichte. Haste denn den Mann nicht erkannt?“
Borgemeester Schtiewing soahte zu alle Leite in Pretzsch Du.
„Nee,“ antwurtete Richtersch Muhme, „denn’s woar doch schon schtockedunker. Wenn ich’n derkannt hätte, do hättichen doch de Schtolln nich jejän. Wemmer Latern’n uff de Schtroaßen hätten, wie sichs for’ne Schtadt eejentlichjeheeren tut, da wieres mich nich passiert“.
„Da könnteste ja recht han. Aber ich meine, obbe den Mann nicht an seiner Haltung, an seinem Gang odder an seiner Stimme erkannt hast. Er muß doch mit dir gesprochen han.“
„Nee, Harr Borgermeester. Er junk jeroade so lanksam un so krumm wie mein Ahler. Un jesoacht hotte weiter nischt wie“hm“ – jeroade, wie’s mei Ahleroo macht, wenne schteeksch is.“
„Und nun meinste, daß ich Haussuchung soll tun lassen?“
„Jo, das meene ich.“
„Ja, haste denn auf jemand Verdacht?“
„Nee – das niche.“
„Ja, meine liebe beste Richtern,“ soahte der Borgermeester,
„ich  kann doch unmöglich in der ganzen Stadt Haus für Haus eine Haussuchung vornehmen lassen. Stollen wirschte jetzt schon in vielen Häusern finden; meine Frau zum Beispiel hat schon gestern gebacken. Und wie sollen wir deine Stollen aus den vielen herausfinden?“
„Awwer was sall denn wern, Harr Borgermeester? Ich muß doch de Feiertake Schtolln han, wenn meine Kinner aus Barlin kummen.“
„Ja, meine Liebe, da wird dir wohl nischt anders übrig bleiben, als noch einmal Stollen zu backen,“ meente der Borgermeester.

Ob Richtersch Mutter den Rat befolgt hat, weeß ich nich.
Ich weeß bloß, dasse ehre Weihnachtsschtolln nich wedder jekricht hot, wennse oo iwerall rumhorchen tat.
Se woarn ämn in falschen Moagen jekumm’n.

Richard Erfurth

aus: Mein Heimatland vom 24.12.

***

zurück – Richard Erfurth