De Bienen sin janz jewiß sehre nitzliche Tiere.
Desterwähn wernse oo de Menschen immer zun Beischpiel for Fleiß un Ordnung hengeschtellt.
Dasse awer oo Unheel anrichten kennen, das hot Ettlichs Vetter aus Priehlitz erfoahrn, der durch de Bienen ema um seine Hosen koam. Wie das zujunk, will ich eich heite erzählen.

Ettlichs Vetter woar e jroßer Bienenfreind.
E hotte hingene in sein Joarten ene Bienenhitte, un da drinne schtunden so e Dutzend Bienenschtecke.
Seine Bienen junken em ewer alles, un jede freie Minute, die ’n de Arweet in seine Wurtschaft luß, brachte bei seine Bienen zu.
Ettlichs Mutter wurre mänichesma argerlich dabrewer un sate:
„Du tust jo jeroade, als ob de met deine Bienen varheiroat wierest“. „Laß nur jut sin, Mutter“, meente da, „wenn ich die fleißigen Tierchen zukucke, muß ich allema an dich denken, denn du bist doch oo sone fleißige Biene“
Na, was sallese denn da san?
Se lachte bloß un sate:
„Ach du … du willst mich bloß uffziehn“.
„Nee, nee, Mutter, ich meees wurklich so, denn wenn du nich immer so fleißig gewäsen wierest, da hätten mersch nich so weit gebracht“. Natierlich geheerte Ettlichs Vetter oo zun Imkervarein for Wittenbarch un Umjejend un fehlte bei keene Varsammlung vun Varein.
Wie nu wedder sone Vareinsvarsammlung in Wittenbarch woar, da machte der Vorschtand de Mitglieder noch ema uff de Hauptvarsammlung vun Provinzvarband un uff de jroße Bienenausschtellung uffmarksam, die in vurzehn Taken in Ascherschlem woar, un meente, daß doch recht ville ausen Vareine darzu henfoahrn mechten, weils doch darbei ville ze sähn und ze larnen jäme.
„Was meenste denn“, sate Ettlichs Vetter zu sein Freinde Matthies aus Elster, „wolln mer nich oo henfoahrn?
Mer kann in de Bienenzucht nich jenung larnen“.
„Wenn du metfoahrn tust, da kumme ich oo met.“
„Jut, abgemacht.“
Se melden sich alle beede an, un wie nu der Sunntak koam, da fuhrnse frieh nah Ascherschlem.
In Wittenbarch schteken no annerte Vareinsmitglieder zuse in Zok, un’s wurre e janses Abteel vull Bienenzichter.
Se hotten sich alle ville zu erzählen vun ehre Bienen, un mäniche schnitten da mächtig uff vun wägen den villen Honigg, was ehre intrahn taten, wenn oo bloße Vurtel darvon woahr woar. Wenigstens wurren de Zeit nich lank bis se na Ascherschlem koamen.
Als nu Ettlichs Vetter un sein Freind Matthies gefriehschtickt un sich jeschtärkt hotten, wurreszundertalleweile Zeit, dasse in de Varsammlung koamen, wu eener e Vortrak ewer de Bienenzucht hult.
Un wie der nu aus woar, da junkense un besahken sich de jroße Bienenausschtellung, die uff e janz großen Platz uffgebaut woar. Nee, wasses da alles zu sähn jab!
Alles, was met de Bienen ze tun hotte, woar da ausgeschtellt.
De Beeden schparrten Maul und Noase uff.
So was hottense doch no nich jesähn.
„Weeßte“, sagte Ettlich zu sein Freinde, „mer kann bei sone Jelegenheet doch ville larnen. Mich jieht das immer in Koppe rum, was der Mann in sein Vortrak vun de Inzucht un de Blutuffrischung bei de Bienen sate. Ich jlowe, bei meine Bienen kenne sone Blutuffrischung oo nischt schoaden. Ich mechte mich desterwähn eene neie Bienenkeenigin metnähmen.“
„Nu ja, Ettlich, das kannste wo machen.“
Ettlichs Vetter junk nu hen, wu Bienen ze varkoafen waren un koofte sich eene Bienenkeenigin.
Der Mann tatsen in eene Schachtel un no e poar Arweetsbienen darzu, dasse sich ungerwegs nich langweilen sille, wie e sate.
Ettlich schtach de Schachtel in de Hosenficke, un wie e no e poar Jlas forn Durscht jenehmigt hotte, da wurres zundertalleweile Zeit zun Zok, un e junk met de annerten zun Bahnhoff.
Er erwischte in Woagen jlicklich eene Ecke un machtes sich bequem. Vun das ville Rumloofen un Kuken woare miede jeworrn un nickte e bischen in.
Der Zok woar schon bis hinger Kethen jekummen un hult jeroade in Osternienborg.
Da schreck uff ema Ettlich uff: „Aua! Aua!“ und fuhr hok.
Die annerten in Zok fuhrn zesammen, so hottense sic erschrocken.
„Awer Ettlich, was fällt dich denn in, uns so zu erschrecken“,
sate Matthies argerlich.
„Och de Bienen, de vardamten Bienen!“  roff der.
„Na, do schlak doch eener lank hen! 
Nu treemt der in Schloaf schon vun de Bienen.“
„Nee, nee, ich treeme joar nich – se han mich wurklich jeschtochen.
Un dadermeet fuhre in de Hosenficke un langete de Schachtel raus.
Se schtund uff de eene Seite e bischen uff, un wie e se vullens uffmachen tat, da woarsche leer un keene Biene nich mehr drinne.
In de Ecke awer woar e joanz kleenes Loch.
Do hotten de Bienen jewiß jedacht, ’s wiere e Flugloch un woarn da durchgekrochen un bei Ettlichs Vettern de Beene länk runger jejrawelt. Un weiln da was in de Quere jekummen woar, do hottense das falsch varschtan’n un hotten geschtochen.
Ettlichs Vetter schtoppte de Hosenficke wedder nin.
Darbei mochte awer wo eene Biene  beriehrt han, denn e schreck wedder laut uff.
„Au! mich hot schone wedder son Aasschtücke jeschtochen!“
„Nu awer woar keen Halten mehr! e loff nah das heemliche Ertchen, was in jeden Eisenboahnwoagen is, un trekte de Hosen runger.
Wurklich!
In das eene Hosenbeen da saß de Bienenkeenigin un umse rum e poar vun de annerten Bienen.
Ettlichs Vetter packtese janz duse an un tatse wedder in de Schachtel, die e feste zumachte.
„Wart, ihr Ludersch“, meente zu de annerten, „eich salls Schtechen varjehn!“
E nahm de Jeldbeersche un de Schreichholzschachtel aus de Hosenficke, treckte de Hosen janz aus un krempeltese um.
Nu machtes Fenster vun’s Ertchen runger, packte de Hosenbeene ungene un schittelte de Hosen kräftig aus, daß de Bienen furtfliegen sullten.
Uff ema koam uffs annerte Jlees e Jieterzok voarbei.
Woarsch nu der schtarke Luftzok oder woarn de Hosen an Jieterzok wo hängen jeblem – uff ema gabs e Ruck – un furt woarn de Hosen!
Ettlichs Vetter sahk bloß no, wie de Hosenbeene in de Luft baumelten, als absen e Lebewohl zuwinken taten.
Jerscht schtunde da wie vun Dunner jeriehrt, naher awer schreeke var Schrecken laut uff:
„Meine Hosen! Meine juten Hosen!“
Wie’n nu de annerten in Zok so schreien heerten, da jlowetense, ’s wiern e Unjlicke passiert, un Matthies riß de Tiehre vuns Ertchen  uff..
Na un da sahkense denn de Bescheerunk:
Ettlichs Vetter schtund da ins Schakett un de Weste un’s Hemme, un ungene kukten de nacktigen Beene vor – Ungerhosen hotte wegen de Wärmte nich angezochen.
Se wußten nich, wasse denken sallten, un Matthies fuhrn an:
„Ettlich, Mensch, was is das met dich? De bist jo wo varrickt jeworrn. Wu haste denn de Hosen?“
„Furt“, sate der un zeigte nahs Fenster.
„Furt? Wuhen denn?“
Weeß ichs? Vielleicht sinse schon in Kethen.“
Alle Leite in Zokwoarn uffjeschtan’n un kukten janz varwunnert nah den Mann ohne Hosen.
Un wie der nu erzählen tat, wassen met de Hosen passiert wiere, da kringelten sich alle vor Lachen.
Glicklicherweise woar der Schaffnär in Kethen in Woagen jeschtichen.
Der besahk sich nu oo das Bild un lachte met.
Naher awer meente, in den Uffzok kinne nicht weiterfoahrn, zema Frauens in Woagen wieren.
„Wie weit fahren Sie?“ frahte.
„Bis Priehlitz bei Wittenbarch.“
„Gut. Bleiben Sie einstweilen hier im Abort. 
Auf der nächsten Station hole ich Ihnen meinen Mantel.
Da wickeln Sie sich die Beine ein und setzen sich wieder auf Ihren Platz. Sie können sich dann wenigstens auch nicht erkälten.
In Prühlitz muß ich freilich meinen Mantel wieder haben.
Ich werde aber den Zugführer bitten, daß er den Zug zwei Minuten länger halten läßt. Sie gehen dann schnell in ben Wartesaal und lassen sich eine andere Hose bringen. ’s ist bloß gut, daß Sie nicht umzusteigen brauchen. Wegen der fortgeflogenen Hose werde ich nach Osternienburg und Köthen Köthen telefonieren.“
Wie nu der Zok in Elsnigk hult, da brachte oo der Schaffnär sein lanken Mantel an.
Ettlichs Vetter zoken an un schluken um de nacktigen Beene, daß mer bloß de Schuhk un de Schtrimpe vorkuken sahk un setzte sich schtille in seine Ecke.
De annerten machten ehre faulen Witze ewer die Jeschichte, awer e luß se schwatzen un sate bloß:
„Wern Schoaden hot, braucht varn Schpott nich ze sorgen.“
Wie nu der Zok in Priehlitz hult, da schtecke fix raus un junk meten Schaffnär nahn Wartesaal.
An de Schparre schtund Ettlichs Max un wolle sein Voater abholen. E hotten in den lanken Eisenboahnermantel joar nich įlei erkannt un schparrte Maul und Noase uff.
„Voater“, meente janz bedeppert, „wie kimmeste denn in den Mantel? De bist wo e Eisenboahner jemurrn?“
„Halts Maul, du Schparrlawe du! Loof ma įlei heeme un hole mich e poar Hosen. Awer match six!“
„Ach so“, meente Max, „dich is wo ungerwegs was passiert?“
Un darbei įriente. E dachte sich nämlich was janz annertes.
„Halt’n Schnawel, dummer Bengel, un mache, was ich dich sae.
In zehn Minuten biste wedder da.  Varschtehste!“
In Wartesaal jabe ’n Schaffnär sein Mantel wedder un eene Mark Trinkjeld forsch Borjen.
Der Bahnhoffswurt, der oo nich schlecht ewer sein Anzok kukte, brachten sein Mantel, bis Max met de Hosen koam.
Wie e nu heeme koam un erzählen tat, wassen met seine Hosen passiert wiere, da wullte Ettlichs Mutter ierscht zanken, awer se mußte doch ewer die Jeschichte lachen un meente bloß:
„Na, nu wirschte doch wo vun dein Bienenfimmel kuriert sin.“
Ettlichs Max awer woar neigierig un frate:
„Voater, wu haste denn de neie Bienenkeenigin?“
Der Voater suchte in alle Ficken rum nah de Schachtel, awer se woar nich ze fingen.
„Varsch Dunnerwetter“, roffe arjerlich, „die hawe ich wo wurklich in de Uffrejunk in Zok län lasen, als ich de Hosen ausschitteln tat.
Na ja, ich sae es jo: een Unjlicke kimmet selten alleene.“

Un so woarsch denn oo.
Alse in e poar Taken bein Bahnhofssvorschteher vun Priehlitz wejen de furtgeflogenen Hosen anfrahn tat, da saten der, daß vun Kethen un Osternienborg de Meldung jekummen wiere, daß mer keene Hosen jefungen hätte.
Woahrscheinlich hottese eener uffgehom, derse brauchen kunne.

Richard Erfurth

aus: Unser Heimatland vom 24.02.1935

***

zurück – Richard Erfurth