Bei Brauersch woar Hochzeit.
Klara, was de zweete vun Brauersch woar, wolle ehren Harmann heiroaten, met dense schon e janz weilchen varlowet woar.
Sone Hochzeit is awer nich janz so eenfach wie wo mänicher jlowen tut.
Daderbei jiwets sehre ville ze iwerlähn – nich alleene vun wegen de Ausschteier; die woar all schon lange fartig, denn dadervor hotte Brauersch Mutter jesorget.
Awer da jiwets no ville annertes, was iwerläht sin will.
Wemmer zus Beischpiel ’n Hochzeitstak beschtimmen tut, muß wer druff sähn, dasses keen Freitak is, weil das doch e Unjlickstak is.
Un denn muß mer oo kalennern, daß mer bei de Hochzeit zunehmenden Mond hat, weil das jlicke brenget.
Un nu awer ierscht de Inladungen zer Hochzeit!
Die machten sehre ville Kopzerbrechen.
Ze ville wolle mer nich inladen, awer mer wolle doch oo keen varn Kopp schtoßen.
Un wemmer nu Scherings Lieschen inladen tat, da kunne mer Danneborgs Friedan nich weglasen, denn das würre die sehre
iewel nähmen.
Wemmer awer die metnahm, da kunne mer wedder Schapelts Justaven nich inladen, denn Brauersch Mutter jarne for ehre Röschen han wolle.
E woar nämlich lange met Dannebargs Friedan jejangen un hottese naher in Schtich gelasen, un desterwähn woarn die beese metenanner un jungen sich ausen Wege.
Un de Poare sullten doch oo zunanner passen.
Mer kunne da nich etwa Koppens Arnsten met Mierschens Ellan zesammentun, denn der woar e Susemichel un Ella sehre kurwendig. Un met Boas Marien paßte oo nich zesammen, denn de Ahlen laken varsch Jerichte in Schtreit, weil Koppens Voater ze nahe an Boas
ehren Acker sulle gepliejet han, un de Kinder taten desterwähn oo dumm mettenanner.
Awer Hanischens Doran kunne mern oo wedder nich zer Brautjungfer jän, weil dоch Koppens nich bei Hanischens koofen taten, die er Koofladen hatten, un zun Koofmann Jöttert jungen, un desterwähn woarn Hanischens alle schiwrig uffse, un jeroade zunderweile woar das sehre schlimm.
Na endlich hotte mer de Poare jlicklich zesammenjeschtellt wie mer dachte, dasse zunaner passen täten.
Met de Kochfra – ’s woar de Schradern aus Wittenbarch – woar mer oo mets Hochzeitsmennie eenig jemorrn:
’s sulle zuerscht eene Ochsenschwanzsuppe jän un naher Friehkasseе vuns‘ Huhn, weil Brauersch Mutter doch sälwer jenung Hinner hotte, un als zweeten Jang Jänse- un Entenbroaten met Krautsollat un denn Eis, un zwoarschtens Furscht Pickler, und zuletzt als Magenschluß Butter un Käse.
Der Hochzeitskuchen woar oo schon gebacken un recht jut jeraten, denn dadruff varschtund sich Brauersch Mutter, die iewerhaupt eene sehre tichtige Frau woar un oo ehre Mächens was jelarnt hotte. E jansen Zentner Mehl hotte mer varbaken, denn wenn uffs Dorf eene jroße Hochzeit is, da muß oo bahle ’s janse Dorf Kuchen krein. Un zun Polteroawend muß mer o ville varteeln, wennse ausen Dorf poltern kummen.
Zun Polterkuchen nimmt mer jewehnlich recht dicken, weil der ehrter satt macht, awer jut musse oo sin, darmet mer nich beredt ward. Un beredten luß sich Brauersch Mutter nich.
Son Polteroawend is uffs Dorf annersch un scheener wie in de Schtadt. Da kummen de Kinner aus ’s janse Dorf un wer sich sunsten e Schpoaß machen will met ahle Teppe, Schisseln un Flaschen un werfense vor de Tiehre.
Un doderbei singen de Kinner den Versch:
Om’n kimmt der Rooch raus,
jät e Schtickchen Kuchen raus,
harten oder weichen,
mer kennen schon derbeißen.
dinnen oder dicen.
mer schtecken in de Ficken!
De jelehrten Leite san, dasses Poltern bedeiten sulle, daß
darmet de Polter- un Zankgeister ausen Hause getrem würrn, un de junken Leite sich naher recht jut vartrahn.
Na ja, bedeiten mags das schon, awer abs wurklich was helfen tut, das is ’n annerte Sache.
Mer hots schon eftersch erläwet, daß bei’n Brautpoar sehre tichtig gepoltert wurre, un naher läwetense doch zesammen wie Hund un Kate un ’s huß vunse:
Var de Hochzeit da jiwets Kisse,
un nah der Hochzeit da jiwets Schmisse.
Bei Klaran un ehren Harmann brauchte mer awer sowas nich ze furchten, denn se woarn sich beede sehre jut un taten sich wurklich bloß aus reener Liewe heiraten.
Zun Polteroawend kummen oawends de Verwandten un de Freindinnen vun de Braut aus ’s Dorf, un es ward da schone tichtig gefeiert. De Freindinnen san da scheene Jedichte uff un schenkens Brautpoar was, was derzu рasseп tut.
Jedesma awer ward zun Polteroawend der Brautkranz un der Brautschleier met ’n scheenes Jedicht iwerreecht.
Das macht immer de jingste Schwester vun de Braut, wennse ene hot, sunsten machts eene Freindin vunse.
Zu Klarans Polteroawend sulles Brauersch Röschen machen, weil die de jingste vun Brauersch Mächens woar.
’n Brautschleier hottense schon var vurzehn Taken bei Bettchers an Marchte in Mittenbarch jekooft, awer weil doch de Murte vun
Brautkranz recht frisch sin sulle, da sullten Minna, was Brauersch Älteste is, die in Wittenbarch varheirat woar, an Polteroawend vun Järtner Jrob metbrengen.
Mer hottese no eene janse Menge uffgetran, wasse metbrengen sulle. Darzu geheerte oo e Fund gekochter Schinken var de belegten
Brote vun Fleescher Klewing in de Kallejenschstroaße, was jetzt Heiskel is.
Wie Frau Klewing ’n Schinken inpacken tat, meentese:
„Awer packten jlei aus, denn e is no janz woarm, darmete
nich schlecht ward.“
Als nu Barnhard, was Minnan ehre Mann is, de villen Pakete sahk, da schluge de Hände ewern Kopp zesammenmen un roff:
„Na da schlag doch jlei eener länk hen!
Die Pakete sulln mer alle metnähmen?
Wie wulln mer die dennfortbrengn?
Da will ich doch liewer jlei Schachen meten Mewelwoagen beschtelln.“ (Schach – Bestattungsunternehmen)
„Hab dich nur nich“, meente seine Frau arjerlich,
„mer sin doch ehrter dreie. Da nimmst du äm e poar, un Hedwig
(das woahr de Tochter) nimmt was, un ich nähme de annerten.“
„Na, da wulln mer bloß jeden sein Teel zuzählen, darmet nischt län bleiwet.“
„Mach bloß keenen Quatsch“, sate Minna, die sehre in de Rawelusche woar. „Ich hawe no nischt län lassen; wenn du man nischt län läßt.“ „Na, meinswegen“, brummte ehre Mann.
„Nur Mut, ’s ward schon scheb jehn.“
Minna hotte no allerhand mets Dienstmächen abzemachen, un Barnhard mußte sehre treim, dasse ’n Zock nich varpassen taten.
Se treckten nu alle drei nahn Bahnhoff, jeder metten Arm vull Pakete, daß mer denken kunne, se wollten darmet uffen Handel jehn.
Der Zock schtund zwoarschtens no da, awer der Mann, der de Billjette varkoofte, meente, se mißten sich sehre derzuhaln, wennse no metkummen wollten.
Se loffen nu wasse loofen kunnten, nahn Bahnschteig.
Der Mann met de rote Mitze wollte met seine Fliejenklatsche gerade ’s Zeechen zer Abfahrt jän. Der Schaffner riß de Tiehre zun nächsten Wagen uff un roff: „Nu aber rasch!“
Hedwig schtolperte bei das schnelle Inschteijen und fuhl längelang ins Abteil nin, un daderbei kullerten ehr de jansen Pakete ausen Arme un uffen Bodden un se sälwer mettenmang druff.
De Leite, die ins Abteil woarn, lachten, un halfense ehre Siemsachen wedder uffläsen.
De Mutter awer schimptese aus:
„Kannste denn nich uffpassen, du Dumme!“
Wennse nich sälwer de Hände vull gehott hätte, da hättese Hedwigen sicher eene gelanget.
„Na, na“, meente der Voater, „Mutter, machs man halblang, ,’s is doch weiter nischt passiert. ’s ist bloß jut, daß Hedwig nich de Schachtel metten Brautkranz un ’n Schinken hotte, denn wennse dadruff jefallen wiere, da hättes Schinken met Murte jejän; na das wiere e scheener Sollat jeworrn.“
Mutter hotte de Schachtel uffen Schoß jenumm, weil ehr doch der Brautkranz ’s Wichtigste woar.
Weils nu awer doch sehre woarm woar – ’s woar in Juli – da fung der
fette Schinken an ze schwiten, un ’s Fett koam schon durchs Perjementpapier.
Da meente der Voater:
„Wozu hältste denn oo de Schachtel? De wurscht dich no ’s Kleed vull Fettflecke machen. Legse doch ins Gepäcknetz.“
Un dadermet nahme de Schachtel und tatse ins Gepädnek un oo de annerten Packete lähte darnem.
Wie nu de Zock wedder halen tat unse ausschteigen mußten, da schtunden draußen uffen Bahnschteig Brauersch beede Jingsten, die de Mittenbarcher abholen wullten.
Die nahmen fix ehre Pakete un schteegen aus.
Wiese nu bei Brauersch henkamen, da woar no ville Arweet; sojar de Braut kaschuwerte no met rum, weil doch alles zun Polterawend recht scheene sin sulle.
De Tante Aujuste aus Barlin woar oo schone da un oo de Kusine Anna aus Mahlwinkel.
Da jabs nu eene jroße Bejrießung, un weil mer sich doch so lange all nich jesähn hotte, da jabs sehre ville ze derzählen.
Wie mer nu schon sone Vurtelschtunne jesessen und derzählt hotte, da kam Klara un frahte:
„Minna, wu haste denn den gekochten Schinken, den de vun Klewings metbrengen sulltest? De Kochfra mechte jarne de belegten Brote fartig machen.“
„Der läht bei de annerten Pakete in de kleene Schtowe om uff de Schachtel metten Brautkranz“, sate Minna.
Nah ner Meile koam Klara wedder.
„Minna, ich sähe awer ’n Schinken nich.“
„Na, ich hawes dich doch jesaht, dassen ich om uff de Schachtel metten Brautkranz jebungen hawe.“
„Ja, awer ich sähe oo de Schachtel metten Brautkranz nich.“
„Na, ihr hat wo heite keene Oogen in Koppe“, sahte Minna arjerlich, weilse jeroade so scheene beis Erzählen woar.
Se schtund uff un junk sälwer in de kleene Schtome, wu de Pakete woarn. Se lagen oo alle no da, bloß de Schachtel metten Brautkranz un ’n jekochten Schinken fehlte.
Se koam wedder in de jroße Schtowe rin.
„De Schachtel is nich da. Wer vun euch hot die getroan?“
„Mutter, die haste doch sälwer jehot“, sate Hedwig.
„Jawohl, die haste sälwer getran“, meente oo derVoater,
„de wolltestse doch keen annerten jän.
Un ich hawese dich doch bei der Abfoahrt vun Wittenbarch zu de annerten Pakete ins Gepäcknetz jeläht, weil doch ’s Fett durchkam,“
„De Schachtel is awer doch nicht da.“
„Da hastese woahrscheinlich in Zock lähn lassen. Na, das is ja eene scheene Jeschichte!“
„Da bist du bloß schuld dran. Hätteste mir de Schachtel gelasen, da wieres nich passiert.“
„Na ja“, sahte Barnhard, „wenn de Fraue was Dummes macht, naher ist allema der Mann dran schuld. Das weeß ich schon.“
„Awer was sulln mer da bloß machen?“
„Da kennen mer em keen Schinken essen“, meente Hedwig.
„Halt du doch deinen Schnawel, du Schpärrlawe du!“ fuhrsche de Mutter an.
„Du bist all oo met schuld; du kunntest oo besser uffpassen, daß nischt lähn blebb.“
„Das metten Schinken is jo nih so schlimm“, sate Röschen.
„Da machen mer em e paar Murschtbrötchen un Käsebrote mehr, ’s braucht jo keener so dinnschneizig ze sin.
Awer der Brautkranz is doch oo met furt, un ich wollen doch zun Polteroawend metsamst ’n Brauischleter iwerreechen.
Ich hawe mich doch son scheenes Jedicht darzu jelarnt.“
Un daderbei woarersch Weenen näher wies Lachen.
„Wu is denn Klara?“ frahte Minna.
„Die sitzt in de Kiche un weent“, antwurrte Röschen,
„weil Jorjens Muhme, die draußen met helfen tut, gesaht hot, das wiere e beeßes Zeechen.“
„Na son Unsinn“, sahte Brauersch Mutter, die eene sehre varschtändige un sanfte Fraue woar.
„Desterwähn wulln mer uns doch ’n Polteroawend nich vardarwen. Das is doch weiter keen Unjlicke nich; da telefonieren mer ’n
Järtner in Wittenbarch an, e solle e annerten Brautkranz machen un morgen frieh darmet eenen mets Road rausschicken. Das tut Jrob oo.“
„Mutter, du bist doch immer de Varschtennigste“, meente Barnhard, „awer das ward joar nich neetig sin. Ich loofe jetzt jlei nahn Bahnhoff un lasse ’n Vorschteher hingers Paket hertelefoniern. Das ward wuhl keener jenummen han, denn was sollense denn metten Brautkranz machen? Ich hawe mich de Nummer vun Eisenbahnwoagen jemarkt.
Wenn de Schachtel jefungen ward, denn kummtse metten nächsten Zock zerrick.“
„Awer der kimmet doch ierscht um Zwelwe“, sate Röschen.
„Macht nischt, da sin mer alle no da“, meente Barnhard un junk nahn Bahnhoff.
Na ner halwen Schtunne koame janz varjniegt wedder.
„Na, kleene Schwägerin“, sate ze Klaran, „treeste dich, der Brautkranz metsamsten Schinken is gefungen – in Bitterfeld. Mitten nächsten Zock isse wedder da.“
„Ja, awer ich wullen doch metsamsten Schleier beis Essen iwerreechen“, meente Röschen kleenlaut.
„Kleene, da iwerreechste em ’n Brautschleier alleene.“
„Awer da paßt doch ’s Jedicht nich; das is doch for alles beedes jemacht.“
„Na, da machen mer em noch ’n Versch darzu, zus Beischpiel:
„Der Brautkranz ging auf Reisen
Und kam um zwölf zurück.
Wißt ihr, was das will heißen?
Das kündet großes Glück.“
oder:
„Der Brautkranz und der Schinken
Die schlossen einen Bund.
Sie reisten beide in die Welt
Und kamen bis nach Bitterfeld.
Allein, dort hat man sie erkannt
Und beide schleunigst heimgesandt
Zur mitternächtgen Stund.“
„Laß doch deine dummen Witze“, sate Minna arjerlich.
„Nee, heite jerrade nich, denn dadervor is doch Polteroawend, un da wolln mer lustig sin un joar nich mehr an den Schinken un den Brautkranz denken, bisse vun ehrer Reese wedder da sin.
Un nu, Mächens, holt mich was zе trinken, denn ich hawe vun die Uffregung un die Looferei Durscht jekriecht. Un ihr wullt doch eiern Schwager zun Polteroawend nich durschten lassen.“
De annerten lachten allehoofe und jaben sich zefrieden.
Un als nu Harmann, der Breitgen koam un heerte, was metten Brautkranz passiert wiere, da lachte oo helleweg un sahte:
„Siehste, Klara, weil mer doch jetzt alle beede keene Hochzeitsreese machen kinnen, da is em der Brautkranz alleene uff de Hochzeitsreese jejangen un hot sich zer Jesellschaft ’n Schinken metjenummen. Kinner, das is ulkig, das muß bejossen wern.
Prost.“
Un’s wurre e sehre fideler Polteroawend.
Beis Essen sate Röschen ehre Jedicht uff, awer ohne de Värsche vun
Barnharden, un iewerjab ’n Schleier, un oo de annerten, die was uffsahn taten, machten ehre Sache sehre jut.
Un als nu um zwelwe der Zock vun Bitterfeld koam, da junk Barnhard nahn Bahnhoff un brachte oo richtig de Schachtel metten
Brautkranz un Schinken.
Das jab nu wedder e Hallo, als de Ausreißer da woarn.
Röschen mußte nu noch ema ’s Jedicht uffsahn un darbei ’n Brautkranz iwerreechen-un ’s zweetemoal junks wie jeschmiert.
De Murte woar no janz frisch, bloß der gekochte Schinken nich; der woar bei de Wärme schlecht jeworrn.
Dadrewer freite sich nu awer wedder Brauersch Leo, dern metten jreeßten Appetit varzehren tat un daderbei jewiß dachte, ’s kinne alle Take Polteroawend sin.
De Jäste meenten das oo un sahten allehofe, dasse son varjniegten Polteroawend no nich metjemacht hätten.
Un Jorgens Muhmen ehr Jerede vun wegen ’s beese Zeechen is bloß dummer Quatsch jewäsen, denn Klara is met ehren Harmann sehre jlicklich joworrn, un se denken noch mänichesma an ehren varjniegten Polteroawend, un wie Klara bahle um ehren Brautkranz gekummen wiere.
Barnhard hätte jo de janse Jeschichte jarne no met in de Hochzeitszeitung gebracht, awer die woar jo all schon fartig gedruckt, un desterwähn wolle ich se ma hier erzähln.
Richard Erfurth
Eine wahre Begebenheit in der Mundart der Elbaue
aus: Unser Heimatland vom 21.12. 1935
***