Fliegen und Freunde kommen im Sommer!
Das stind in unse Scheenschreibeheft uf de letzte Seite janz oben queräwer, un das mußten mer so an 15 moa abschreiben.
Awwer was es eejentlich bedeiten soll, das weeß ich heite na niche. Salls nu heeßen, der Summer brenget Schlechtes und Judes, odder salls heeßen, de juden Freinde sin so dickfellig wie de Fliejen, mer kann se fo ofte furtjochen, wie mer will, se sin ejal wedder doa?
Ich weeßt niche.
Nu, far mich, der Scheenschreibemann wards wo jewußt han, un ich weeß so wie so sehre vill nich. Awwer met die ale Fliejen, doa haww‘ ich ejal meinen Arger. Den janzen Dack is mer rumjepeeset, un
wemmer denn oabends seine Schlappermilch löffeln will un ’s Blatt derzu lesen, denn muß mer eerscht fischen. Un Mutter is denn oo na arjerlich, wemmer se uf de frischjescheierte Dielen schmeißt.
Un wemmer sich ins Bette lät, doa arjern eenen die ale Fliejen oo, daß mer nich schloafen kann; ’s is man een Jlicke, daß in de liewe Kurche keene Fliejen sin, daß mer nich jesteert ward in seine Andacht un in seine fromme Jedanken.
Na, wenns en bißchen sehre lange dauert, doa kanns je moa bassieren, daß mer ’n bißchen indruselt, zemoale wenns drauß
sehre heeß is.
So woarsch mich en letzten Sunndack derjangen.
Nu, der Barliner, der zund hie uf Summerfrische is un nen janzen Dack nischt macht, der stoß mich denn in de Ribben, daß ich jlei hok fuhr. Noaher namb e mich denn vor:
„Wie kannste denn man in de Kurche schloafen, doa haste da heeme Zeit jenunk.“
„Ja“, soa ich, „Zeit hädde ich wo, awer die Hitze un die ville Fliejen!“
„Äwwerhaupt“, meente denn, „muß ich mich äwer eich wunnern. Ihr hat nu so vill neie Heiser jebauet un sonne jroße neie Schule un hat na die kleene ale Kurche. Jehn denn doa alle Leite rin, die ins Dorf wohnen?“
„Das will ich dich jlei moa deitlich machen“, soade ich denn zu’en.
„Wenn se alle rin jehn, denn jehn se nich alle rin – awwer wenn se nich alle rin jehn, denn jehn se alle rin. Awwer se jehn nich alle rin, das haste jo heite jesehn.“
„Nu weeß ichs janz jenau“, soade denn, „denn jeht du man recht ofte nin, awwer schloafen kannste liewer heem. Na, wenn ihr nich schloafen kennt in eire stille Dorf, was sällen mir denn doa in Barlin soan, wu de Elekterschen un de Autobusse und alle die ville Taxen un Privatautos Dack un Nacht foaren un tuten, un denn das ale Schurjen, wenn se bremsen, un nu janzenjoar die ville Flugzeije un was bei uns so alles uf de Erde un unger de Erde un innen Himmel rumkraucht, das kennter eich jo joarnich vorstellen. Awer doaderfor sin mir ebender Weltstadt, un mir freien uns dräwwer.“
„Nu“, soa ich, „hat eich man nich dumm met eiern Varkehr, das hammer hie oo. En Zeppelin hawwich neilich janz deitlich jesehn, wie e na’n Nordpol henmachte, un Fliejer kummen alle Dage. Un neilich bin ich selwer moa metjeflochen. Ich hodde jroade meine Heelebeern un Jählinge jut varkooft in de Stadt un wolle mich bei Frosch-Schmidten eenen jenehmigen. Doa leeft un drenget alles noa de Wiesen rum, un ich met. Doa woar jo en woarer Joarmarcht uf Bärns äre Lange Sticken. Reinhardts Franz aus Proate hodde en Kaffeeausschank doa met Tische un Stihle un scheene bunte Sunnenscherme, doa haww‘ ich mich oo met henjesetzt un en bißchen zujekukt, demmer will da was derzählen, wemmer heeme kimmet. En jroßes Flugzeik woar doa vun Junkers aus Dessau, doa kunne mer sich moa de Welt vun oben besehn far 6 Mark, un mer kunne sichs winschen, wu mer hen fliejen wolle. Doa schoß michs Blatt! 6 Mark is jo vill Jeld far sonne kleene Tour, awwer du kinnest dich jo jlei innen immel abliefern loaßen. Ahlt un kräplich biste emoa un kannst nich mehr lange machen. Un ’s Bejroamen is oo sehre teier, der Sarj alleene 150 Mark un de Dräger un der Leichensteen un alles, was so drum un dran bammelt, doa kimeste met 6 Mark na billig weg. Der Kämbarjer Tischer nimmt sowieso keene Besen vun diche, doa brauchste jo den oo ’s Jeld farn Sarj nich innen Rachen ze schmeißen. Also kortsch un jut, ich steije in. Das jeht jo sehre scheen duse hok, mer markt joarnischt. Eerscht äwer de Elwe un de Vochelstange und denn äwer de Schloßkurche jroade äwern Dorm. Doa soa ich zu’n Schafför:
Na nu fliejen man wоа durch de Wolken innen Himmel, Meester
Junkers, un loaßen Se mich doa aussteijen, un denn jän Se mich en Doaler retour, ich hawwe doch Retourbillet und hawwe bloß de Hälfte abjefoaren.“
Doa lachte der un soade:
„Nee, bes innen Himmel reecht mein Paß nich, un äwwerhaupt kosts jo 100 Mark Steier na de Notverordnung, wemmer ins Ausland will. Nee, so hok kann ich mich nich varsteijen. Doa mißter eich an meinen Kollejen Piccard wennen, der fliejt bis innen Himmel.“
„Kammer Deitsch met den Mann reden?“ froa ich.
„Nee, der varsteht bloß Franzeesch.“
„Na, denn weeß ich jenunk. Wenn mich en ehrlicher Deitscher nich innen Himmel brenget, en Franzose jlei janzenjoar nich. Doa riskier ich keenen Sechser. De Franzosen sin jo zu jerissen, die han uns schon zu ofte beschuppt. Nee, vun die will ich janzenjoar nischt wissen!“
Nu, doa woarsch ähmder nischt, un ich mußte met meinen Besenwoagen wedder heeme troddeln.
Un wie ichs nu unse Muttern derzählte, wies mich arjangen woar, doa schimpte die mich na aus:
„Nee Voater, wie kunneste mich denn das antun, daßte in deine ahle jeflickte Jacke wullest na’n Himmel kummen, wu ich dich sonnen scheenen neien Jottesdischrock hawwe machen loaßen, wu ich na jedes Monat en Doaler druf abzoale un michs Jeld derzu zesammenbettele. Du sällest da moa anstännig hinger meinen Sarj herjehn. Du weeßt doche, daß ich nu all 5 Joar so sehre ’s Reißen hawwe. Nee, das ahle Mannßen, das is doch was janz Jefährliches, nischt ämerlän se!“
„Nu, wer hodde denn nu mehr äwwerlät, Mutter odder ichе?
Awwer so sin de Weiwessen, alles wollen se besser wissen.“
van alen Besemann
Quellen: Vun ale un neie Moden
(Kleine Erzählung in der Mundart der Wittenberger Elbaue)
