Na, nu hammer alle n Kopp hängen loaßen un han ejal na’en Himmel jekukt, abs na nich wulle ufheern met den alen Rän un han uns jesteimt, daß der Hawwer ze Loager lag, un was innen Winter de Färe fressen sällten. Un nu hats na so scheen jejangen mets Infoaren, nu ’s allermeeste is scheen dreehe rinjekummen.
Wie ich zund durch Proate marschierte, doa vivathochten de Kinner al vuns Feld her:
Hier bringen wir den Erntekranz,
Die Garben sind schon eingepanzt,
Wir freuen uns auss andre Jahr
Und bringen Herrn Brehse sein Hallelija!
Herr Brehse soll leben
Und sein ganzer Hofstaat daneben:
Vivat hoch! und noch einmal: Vivat hoch!
Abs nu Brehse huhß odder Wolter odder Noack odder Böttcher, das kunn‘ ich nich so recht varstehn, denn se hodden sich alle schon sehre heesch jeschrechen, awwer na’n Bockwinkel machten se nunger. Mer freiet sich da jedesmoa wedder, so ahlt wie mer is, wemmer sonne bunte Fuhre sieht un heert de Kinner so lustig
schreien. Die han alle en scheenen Blumenstrauß an en lanken Stock, un bei jedes „Vivat hoch!“ foaren se met den hok in de Luft. Vorne sitzet de Große Moad un hat en scheenen bunten Arntekranz uf de Jawwel jestochen, den han de Weiwer, die beis Bingen un Jarmn ufftellen jeholfen han, vun Jrienes un Blumen jeflochten.
Doa nehmen se Astern un Jeorginen un rote Vochelbeeren un Sparjelkraut, un denn kimmet ne jroße bunte Papierschleefe nan met feine Stammbuchsblumen un jleene Spiejel. Der ward denn vorne ins Haus ufgehenget, un doa henget e’s janze Joar, un jeder freiet sich dräwwer.
Zus Ärntefest, wemmir Kinner uns so recht dicke an Flaumen- un Äppel- und Quargkuchen jejessen hodden, denn jab uns de Tante in Lammesdorf, die äwwerhaupt seelensjut woar, de Schleefe vunnen ahlen Ärntekranz, un denn kunnen mer uns de Spiejel un de Stammbuchsblumen met heeme nehmen.
Doa freieten mer uns’s janze Joar druf.
In Lammesdorf woarsch äwerhaupt sehre, sehre scheen, doa woar alles een Harz un eene Seele, un so ist‘ heite na.
Alle Leite besuchen sich ungerenanner, un menche Wittenbarjer, die metten Mittageszock jekummen sin, die jehn vun eenen Hof zu’n annern un probieren ’n Flaumenkuchen.
Wu se alles loaßen, wenn se so reiherum marschieren, das weeß ich niche. Aber beleidijen wollen se oo keenen, un doa stoppen se ähmder met Todesverachtung.
Un wenn se denn oabends metten Torgauer heeme foarn, denn han se na orntliche Kuchenhucken met. Ja, scheen ist‘ in Lammesdorf! Un wenn mich wedder eener zus Dankfest inlädt, ich soae nich nee. Un so ahlt bin ich oo na niche, daß ich keene Kuchenhucke mehr schleppen kann.
Awwer das brenget mich wedder uf Proate!
Doa haww‘ ich neilich оo ne schene Kuchenhucke metjekricht. S’legte Fihder met de Vivathocher woar jroade um de Ecke jeschumpelt, doa kamb en Joldener Hochzeitszock de Schulstroaße
leng, un ’s woar richtig mein juder Freind Kunrad met seine Joldene Hochzeitsbraut un seine liewe Kinner und Enkelkinner. Un weil ich en sowieso besuchen wolle, bin ich eerscht moa met in de liewe Kurche jejangen, wu se var 50 Joar jetrauet worn sin.
Awwer doa sahk mer, was die ale Leite far Liewe un Achtung han. Varsch Altar stinnen scheene Sessel un uffen Altar un uffen Taufsteen joldene Blumen, un en Jang lengweg woaren oo welche jestrauet. De Schulkinner sangen das scheene Lied:
„Bis hierher hat mich Gott gebracht durch seine große Güte“, un der Herr Paster segnete das Jubelpaar nochma in. Un denn janks heem. Un doa woaren eerscht Blumen äwwer Blumen!
Na, die sin alle met ufs Bild jekummen, wie se sich hon abnehmen loaßen, doa kennen se äre janze Lämnszeit dran denken un de Enkelkinner oo. Un ne ahle Freindin kam, die oo bale de Goldene Hochzeit feiert, un bet’te een scheenen Värsch her, den hodde se selwer janz alleene jedicht’t: wie se nu 50 Joare so eenträchtig zefammen jepiljert wieren und immer fleißig un strebsam jewest un so scheen vorwarts jekummen wieren:
„Seht euch um in eurem Kreis — Alles eurer Hände Fleiß!“
Ja, das muß mer soan. Wemmer denkt, wie kleen se anjefangen han.
Der Goldene Brautmann hat als junger Bursche de Wittenbarjer Festung helfen abtroan un keene Arweet veracht’t.
An seinen Pulteroabend hatte oabends um neine’s letzte Fihder Korn injefoarn. Un de Jubelbraut, die woar seinerzeit ’s scheenste Mächen vun Proate, drum huhß se oo: die scheene Hanne.
Un fleißig un tichtig woar se; eerscht hat se in Pannicke jedient un denn lange Joare bei Hofbärns. Un wie denn der Mann bei Meißnersch Doagelöhner woar, denn hat se doa jehulfen waschen un Brot backen un alles, was vorkam. Un äwerall de Oogen un de Ohren ufjesparrt. Die kannste froan, was de willst, die weeß Bescheed, wie wenn se studiert hädde, un vun die hans wedder de Kinner. Un immer hilfreich un jut zu alle Nachbern.
Drum freien se sich oo alle met, daß ses so scheen weit jebracht han. Eerscht das kleene Heischen in de Boanhofstraße un nu den scheenen jroßen Hof un den feinen Joarten. Doa freiet mer sich, wemmer doa varbeijeht un seht die scheene Owestbeeme, alle scheen varpußt un jeflegt, un de Wachsbohnen un Tomaten un Jurken un Karwese. Doa fehlt nischt!
Un de Kinner han en feines neies Haus jebauet. Nu, doa missen sich doch de Eltern freien, ‚wenn se das alles so far sich sehn. Un doa sieht en jeder, daß mer met Fleiß un Tichtigkeet un Jottesfurcht oo heite na zu was kummen kann.
Drum schreie ich oo wie de Proatsche Kinner:
Das Jubelpaar Konrad soll leben un sein janzer Hofstaat daneben: Vivat hoch!¡ und noch einmal: Vivat hoch!
van alen Besemann
Quellen: Vun ale un neie Moden
(Kleine Erzählung in der Mundart der Wittenberger Elbaue)
