Jeder Mensch macht sich jarne ema een juten Tak – worum oo nich, wemmersch han kann? Un wenn Schuster Bargern sein Geselle Sunn – taks ze lange jekoart hat un frieh metten schweren Koppe ufwacht, da machte naher jlei blauen Montak. Schuster Barger kann da nischt darjejen machen, zema e sälwer jarne blauen Montak macht. Mas awwer juter Montak is, das wissense eegentlich bloß in de Elbaue, un desterwähn will ichs ema derzählen, was das forn Fest is.
Juter Montak sahnse da nämlich zus Arntefest. Annerwärts feiert mer das jo bloß eenen Tak; weilse awwer in de Elbaue merschtenteels eene sehre jute Arnte han – wenn nich jeroade Hochwasser darzwischen kimmt un de scheene Arnte vardarwet, wies in Joahre neinzehnhunnertsechsenzwanzig woar -, da feiernses Arntefest jlei zwee Take lang – Sunntak un Montak. Un desterwähn heeßenses „Juter Montak“
Was in Thieringen de Kermse un uffen Flämig Faßnachten is, das is in de Elbaue der jute Montak: ’s jreeßte Fest in janzen Joahre.
Schon de janze Woche vurneweg da ward jescheiert, jewaschen un jeputzt, dasses nur sone Oart hat, un mer tut jut, de Weiwessen recht weit außen Wege ze jehn, wemmer nich metten Besen un metten Wassereemer Bekanntschaft machen will, denn:
Wenn de Weiwessen waschen un backen,
Da hanse ’n Deiwel in’n Nacken.
Na ja, ’s Backen und Broaten zun juten Montak das is oo eene Sache for sich. Janze Barge vun Kuchen wern jebaden:
– Schtreißelkuchen,
– Flaumkuchen,
– Quargkuchen,
– Abgeremner un
– no annerte Sorten.
’s Feinste sin awwer doch de Sahneschnittchen, die vor lauter Butter un Zucker uff de Zunge zarjehn. Takelank isses janse Dorf een eenziger Kuchenduft.
Un nu ierscht der ville Broaten! Da missen ville Enten dran jlom. Natierlich ward oo e Schwein jeschlacht, merschtenteels oo no e Kalb. Oo Fische jiwets, die de Mannsen außen Kolke met de Joarnsäde fangen missen. Un oo e poar ahle Hinner missens Läm lahsen – dadraus werd Friehkassee jemacht.
Ans Trinken läßt mersch natierlich oo nich fehlen.
Da schafft mer Bier an – awwer nich bloß „Urmersche Bube“ – un e sießen Likehr for de Weiwessen un schtellt de Weinflaschen zarecht, denn zun juten Montak darf mer sich nich lumpen lahsen.
Un weil mer doch nu all das ville scheene Essen un Trinken nich alleene vartilgen kann, da ladt mer sich Jäste in – zeierscht natierlich de Varwandten, soweit mer metse eenig is, awwer oo jute Freinde und Bekannte aus de Schtadt, die älle sehre jarne kummen. Männiche kummen awwer oo, wennse nich injeladen sin.
Die machen sich äm e Bewarb un tun naher sehre varwunnert, wennse in de Schtowe kummen un den jedeckten Tisch sähn.
„Mer hans jo joar nich jewußt, daß heite bei Sie juter Montak is“,
sahnje da immer. Na, wer das jlowet! ’s kimmt jo awwer oo joar
nich druff an, abbens e poar Jäste mehr oder wenniger sin, un zun juten Montak macht mer annerten jarne eene Freide.
Das wissen oo de Bettelleite aus de Schtadt un klappern desterwähn eenen Hoff nahn annerten ab un trecken naher met jroße, dicke Bindels heeme, dassese männichesma kaum derschleppen kennen. Zun juten Montak jeheert natierlich oo Tanz – wemmersch fein machen will, da saht mer Ball.
Abs nu awwer Tanz heeßt oder Ball – immer braucht mer darzu Musekanten. Un weil doch an ville Orten juter Montak is, da muß der Jastwurt de Musekanten schon lange vorher beschtellen, sunsten kanns passieren, dasse naher keene kreit.
So junks ’n Jastwurt Brähse.
E hotte de Musekanten zwarschtens schon beschtellt, wie e met seine Fraue zus Marjaretenfest in Schmiedebarch woar. E hotte n Musikdirekter Schreib uffen Festplatze uffjesucht, wu der de Musike machte un hottesen jesoaht.
„Schön, Herr Brähse“, hotte der jeantwurt, „ich werde es mir aufschreiben.“
Dadruff varließ sich nu Brähsens Vetter; denn wemmersch ’n Meester sälwer beschtellt, da muß mer sich doch oo druff varlahsen kennen. Das schtimmte awwer diesmah nich.
Brähse kam jerade außen Keller wu e nahs Bier jesähn hotte.
Da sahte seine Fraue:
„Ich weeß joar nich, wu de Musekanten heite so lange bleiwen; der Eilenborger is doch all schon lange durch.“
Der Jastwurt kukte nah de Uhr:
„Ja, se mißten eegentlich schon lange da sin, wennse metten Zuk jekummen wieren, denn ’s jeht all schon uff dreie. Woahrscheinlich kummense awwer heite mets Road, weil so scheenes Wetter is.“
„Na, das wiere awwer ’s ierschte ma, dassense ’n Weg mets Road machen. De hast doch oo de Musike richtig beschtellt?“
„Allema. De woarscht jo sälwer met darbei, wie ichs Schreim bei ’s Marjaretenfest sahte.“
„Der ahle Drustelich wards doch nich varjessen han?“
„Das wiere jo eene scheene Jeschichte: Juter Montak un keene Musekanten! Das wiere jo no joar nich dajewäsen. Ich denke mich, se han sich e Auto jenummen un missen jede Minute intreffen. Wennse inner halwen Schtunne nich da sin, muß ich Schreim ema anklingeln.“
De halwe Schtunne varjunk – awwer ’s luß sich keen Musekante sähn, wenn oo de Brähsen un Else, was ehre Tochter woar, alle finf Minuten zu de Tiehre nauskukten.
„Da weeß mer wurklich nich was mer denken sall“, sahte der Jastwurt. „De Sache kimmt mich doch vardächtig vor. Na, mer wern jo jlei heern, wu de Musekanten jeblem sin.“
E junk ans Telefon un luß sich metten Musikdirekter Schreim in Schmiedebarch varbingen.
De Frau Musikdirektern kam ans Telefon.
„Frau Schreib“, frahte Brähse, „wo bleiwen denn meine Musekanten? De Jäste wern jlei kummen, un es is no keene Musike dа.“
„Ja, haben Sie denn welche bestellt?“
„Na freilich; schon zu ’s Marjaretenfest, wie ich in Schmiedebarch woar.“ „Bei wem haben Sie die Musik bestellt?“
„Bei ehren Mann sälwer.“
„Da müßte es ja im Buche eingeschrieben sein. Warten Sie doch einen Augenblick; ich will gleich einmal nachsehen.“
Nah ’ner Meile roffse wedder:
„Herr Brähse, im Buche ist nichts eingeschrieben.“
„Na da schlak doch eener jlei lank hen“, sahte Brähse janz buschtarzt. „Ich hawe’s wurklich un woahrhastig an Meester sälwer beschtellt. Meine Fraue is Zeige.“
„Da hat’s mein Mann wahrscheinlich vergessen. Sie hätten ihn noch einmal schriftlich daran erinnern sollen.“
„Wer denkt denn an sowas. Awwer was sal denn nu wern? Ich muß doch zun juten Montak Musekanten han.“
„Ich kann Ihnen da auch nicht raten.“
„Is denn der Meester nich sälwer da?“
„Nein, der ist mit nach Trebitz gefahren.“
„Kennsen denn nich emah anrufen? Amende kanne vun wo e poar Musekanten wegnehmen – un wenns bloß dreie, viere sin.“
„Ausgeschlossen! Mein Mann hat seine Kapelle für heute in so viele Teile teilen müssen, daß kein Mann irgendwo abkommen kann.“
„Awwer was sall ich denn anfangen? Ich muß doch Musekanten han.“
„Es tut mir ja leid, Herr Brähse; aber ich kann Ihnen da wirklich nicht helfen. Aber Sie müssen mich entschuldigen; ich habe eine notwendige Besorgung zu machen. AIso Schluß.“
Jezt wurre Brähse awwer fuchtig. „Schluß – was, Schluß!“ schreeke. „For mich is no keen Schluß!“
Un weil keener antwurte, da drehte argerlich an Apperat un roff:
„Meine Musekanten will ich han und keen Schluß!“
„Was sagen Sie?“ frahte da eene Schtimme durchs Telefon, un in seine Uffrejunk heertes Brähse joar nich, dasses eene janz annerte Schtimme woar, nämlich ’s Telefonfreilein uff de Post in Schmiedebarch.
„De Musekanten will ich han, die ich beschtellt hawe, varschtehnse!“ „Was wollen Sie? – Musikanten? – Wir haben doch hier keine Musikanten abzugeben.“
„Na vorsch Dunnerwetter! Mer han doch äm e Langes un Breetes dadrewer geschprochen, un nu tunse, als wißtense nich, um wasses sich dreht.“
„Ach so“, sahte de Schtimme wedder un lachte.
„Sie wollen gewiß mit Musikdirektor Schreib wegen Musikanten sprechen?“
„Freilich. Bin ich denn nich meh metten varbungen?“
„Nein. Hier ist die Post in Schmiedeberg.“
„Na sowas. Ich schprach doch äm noch met de Frau Schreim dadrewer.“
„Die Verbindung ist aufgehoben. Ich werde Sie aber noch einmal verbinden.“
Nah ’ner Weile kams durchs Telefon: „Es meldet sich niemand. Jedenfalls ist bei Schreib niemand zu Hause.“
„Na ja“, meente Brähse, „die han sich außen Schtoowe jemacht, un ich kann nu sähn, wu ich de Musekanten herkreie.“
E hängte wietend ’n Herer an.
„Was machen mer nu?“
sahte die Brähsen, die alles met anjeheert hotte.
„Musike missen mer doch han. Das wiere jo sunsten eene scheene Blamasche.“
„Ja, awwer wu hernähmen un nich schtehlen?“
„Wemmer wenigstens e Glawierschpieler hätten – ’s Glawier schteht jo da. – Was meenste: ab unse Else nich e poar Tänze schpielen kann? Se hot doch schon so lange bein Harrn Kanter Glawierschtunne gehot.“
„Na jarne sähe ichs jo nich, dasse sich in Saal setzt, awwer se braucht jo nur e Weilichen ze schpielen. Ich were mich ungerdessen nah Musekanten umtun. – ’s muß was geschehn, denn de Leite kummen all schon.“
Else wurre gerufen. Alse awwer heerte, wasse sulle, da wollese ierscht nich. Se meente, se kenne keene Tänze schpielen.
Da wurre awwer Brähse fuchtig.
„So“, sahte, “ ’s teire Jeld läßt mer sichs kosten, awwer wemmer naher vun eich was varlangen tut, da kennter nischt. For was han mer dich denn de teire Glawierschtunn gehn lahsen, wenn de nich
emah e poar lumpge Tänze schpielen kannst! De schpielst äm, bis ich Musekanten ranjeschafft hawe. Da jiwets joar keen Jefitze nich.“„Musike! Musike!“ schreekense drinne in Saal.
Der Jastwurt junk nin un derzählte, wiesen met de Musekanten gegangen woar, un se mißten derweile mah mets Glawier forlieb nähm. Seine Else würre e poar Tänze schpielen, un e wolle derweilen sähn, dasse Musekanten rankrichte.
„Laß dich nich lange neetigen, Mächen“, sahte de Brähsen zu Elsen, „sunsten ward der Vater beese.“
„Wenn ich nu awwer ema keene Tänze schpielen kann.“
„J, varsuchs nur ema, ’s ward schon jehn.“
Else nahm denn nu oo ehre Glawierschule – ’s woar die vun Damm – un schpielte zeierscht eene Polka. Se schpielte zwoarschtens janz richtig, awwer se hult nich richtig Takt.
„Lanksam, Else, nich so jelgen!“ roff Lehmanns Frieda.
„Mer varliert jo de Puste darbei.“
Nahn Polka funk Else e Walzer an. Awwer nun wolles ierscht recht metten Takte nich schtimmen. Männichesma junks ze jelgen un naher wedder ze lanksam. ,
„Nee“, sahte Heinrichs Max, „nah soner Musike kann keener nich tanzen“ – un heerte mitten ins Tanzen uff.
Elsen schtunden de Tränen in de Oogen; se klappte de Glawierschule zu un loff außen Saal.
„Da han mer de Bescheerung“, meente Kuhnerts Emile,
„nu kennen mer uns uffen Kamme Musike machen. Sowas is oo no nich dajewäsen – Juter Montak un keene Musekanten!“
„Ja. ’s is e Schkandal!“ roff Noacks Karl.
„Wo schticht denn der Jastwurt? Der muß Musike schaffen.“
Der arme Jastwurt! Der schtund derweile ans Telefon un suchte iwerall nah Musekanten, un darbei wischte sich ’n Angstschweeß vun de Schtarne. E hotte schon ’n Musitdirekter in Pretzsch angerufen, awwer da antwurte niemand, weil niemand da woar.
„Leite“, sahte ze Noacks Karln,
„nehmt doch Varnunft an. Ihr seht doch, ich tue alles Megliche, um Musekanten ze krein, awwer ich kannse doch nich ranhexen. Ich will nu nah Kämbarch telefonieren, vielleicht kann mich Heinrich e poar
vun seine Leite abgähn.“
Karl junk wedder in Saal nin.
„Kummen denn no keene Musekanten?“ roffen de Mächens. „Zunderweile hat der Jastwurt no keene. Awwer da fällt mich was in: Hillebrandts Mittlerer kann doch so scheene Ziehharmonika schpielen. Der kann uns derweile Musike machen, bis der Jastwurt Musekanten hat.“
„Ja, das is woahr!“ roffense:
E poar vun de Burschen machten sich furt, un ’s dauerte oo nich lange, da brachtense Wetzkens Justafen, was der Mittlere vun Hillebrandts woar, metsamst seine Ziehharmoneka angeschleppt.
E krichte ierscht zer Schtärkung e Jlas Bier, un nu funke an ze schpielen. Zeierscht schpielte „An jrienen Schtrand der Elwe“.
E bißchen dinne klungs jo, awwer mer kunne doch wennigstens darnach tanzen. Naher kamen „Zwee dunkle Augen“ an de Reihe un naher „Ich hab mein Harz in Heidelbarch varloren“ und denne weder „An jrienen Schtrand der Elwe“.
„Na, Justaf“, roffen de Mächens, „kannste denn nischt annertes als die ahlen Klamotten? Schpiele doch emah: „Sag du zu mir“, oder:
„Wer hat denn den Käse zun Bahnhoff jerollt“, oder:
„Meine Oma bläst Posaune“, oder: „Meine Tante fährt in Hiehnerschtall Motorrad“, oder: „Onkel Bumba aus Kolumba tanzt nur Rumba“.
„Das kann ich nich“, sahte Justaf.
„Awwer wenns eich nich paßt, kann ich jo uffheern“.
„Nee, nee!“ roffense. „Schpiele nur weiter!“
Heinrichs Max brachten rasch e Jlas Bier, un da woare besänftiget un schpielte weiter „An jrienen Schtrand der Elwe“.
Der Jastwurt hotte ungerdessen Musikdirekter Heinrichen in Kämbarch angerufen. De Frau Heinrichen kam ans Telefon. Se tat sehre schnippsch, denn se hotte sich schon lange dadrewer jeargert, daß Brähse de Musike nich vun ehre Mann nahm.
„Musekanten mechtense vun uns han?“ sahtese.
„Was denkense sich denn eegentlich? Wu salln denne heite bei uns
de Musekanten no herkommen, wu allerwärts juter Montak is?
Mer han sowieso de ahlen Kunden kaum befriedigen kennen.
Un se han uns doch sunsten nich jebraucht. Lassense sich doch vun Schreim aus Schmiedebarch welche gän.“
Un dadermet luße Brähsen schtiehn.
Der woar wietend. E schluk met de Faust uffen Tisch, daß die Bierjläser tanzten.
„So was muß mer sich nu sahn lassen!“ roffe.
„Argere dich doch nich iwer die“, beruhigten seine Fraue.
– „Wie wärsch denn, wenn de emah nah Zahne telefonieren tätest? Da sin doch zwee Kapellen.“
„Ach, eh mer da Musekanten ran krein, wards jo Mitternacht. Un wer weeß, ab da oo no welche da sin. Heite is jo iwerall Musike.“
„De mißtest’s ma in Wittenbarch varsuchen. Amende hot Jahnke no e poar Musekanten iwrig.“
„Der sall awwer met seine Musike sehre teire sin.“
„Das hilft denn äm nischt. De mußt da äm mehr Tanzgeld nähm.“
„Das jeht nich. Da würrense scheene schimpen.“
„I, da lasse doch ema schimpen. Das missen de Leitedoch oo insähn: wennse scheene Musike krein, da missense oo mehr darfor bezahlen.“
„Nee, nee, das mache ich nich. Ich will no eens varsuchen:
Ich were nach Wittenbarch telefonieren un meinen Freind Appelt in Joldenen Adler anrufen. Der kann mich heite emah seine Hauskapelle gän. Wenn de Wittenbarchеr oo heite ema keen Kunzart han – de Tanzmusike jeht vor. Was Appelts Arnst machen kann, das machte, dadervor kenne ich ’n.“
„Das is e Jedanke, das tue man.“
’s dauerte nicht lange, da meldete sich der „Goldene Adler“.
„Ich mechte Harrn Appelt sälwer schprechen“, sahte Brähse zun Oberkellnär, der ans Telefon war.
„Einen Augenblick“, sahte der.
„Hier Appelt“, klugs nahn Weilchen durchs Telefon.
Brähse, derzählte, wiesen met de Musike gegangen wiere
un trug Harrn Appelt sein Anliegen vor.
Der lachte un meente: „Das ist ja freilich Pech: Guter Montag und keine Musikanten! Und nun soll ich Ihnen meine Hauskapelle borgen? Aber, alter Freund, das geht leider wirklich nicht; ich habe doch für heute abend Künstlerkonzert angezeigt. Was würden meine Gäste sagen, wenn sie kämen und die Kapelle wäre nicht da, und ich wollte sagen, daß ich sie zum guten Montag verborgt hätte! Und Sie müssen doch auch bedenken, daß meine Hauskapelle aus Künstlern besteht, die auf Künstlerkonzerte eingestellt sind, aber doch nicht zur Tanzmusik aufspielen. Ich würde sie beleidigen, wenn ich ihnen das zumuten wollte. Und wie sollten sie zu Ihnen hinkommen? Meinen Sie, der alte Professor Schneider wird sich aufs Rad setzen, um bei Ihren Bauern die ganze Nacht Tanzmusik machen? Alter Freund, das sehen Sie doch wohl ein, daß das nicht geht, so gern ich Ihnen auch aus der Patsche helfen möchte.“
„Ja“, sahte Brähse kleenlaut, „da meegense recht han, dadran hawe ich nich gedacht. Awwer was sall ich bloß anfangen? Ich hotte meine letzte Hoffnung uff Sie jesetzt.“
„Na, Hoffnung läßt nicht zuschanden werden, steht schon in der Bibel geschrieben“, antwurte Harr Appelt.
„Ich denke, wir werden das Kind schon noch schaukeln können. Sie haben doch ein Klavier? Da werde ich Ihnen einen Klavierspieler, eine erste und eine zweite Geige besorgen, vielleicht auch noch einen Trompeter. Das dürfte doch wohl genügen.“
„Ach ja, Kalleje, wennse das machen kennten, da wiere ichse sehre dankbar.“
„Ich hoffe, daß es sich machen läßt. Die Leute mögen sich gleich ein Auto nehmen, damit sie so schnell als möglich dort sind.“
„E Auto? Ward das awwer nich sehre teier wern?“
„I wo. Das Kilometer wird etwa 15 bis 20 Pfennige kosten.
Morgen früh können sie ja mit der Eisenbahn zurückfahren.“
„Ja, das ward jehn. Ich kann mich also druff varIahsen?“
„Was ich machen kann, wird gemacht, und ich denke, es wird klappen.“
„Kalleje, ich bin se wurklich sehre dankbar. Se tun mich e jroßen Jefallen. Menn ich nah Wittenbarch kumme, will ichs varsuchen jut ze machen.“
„Ist schon gut, alter Freund. Ich komme dafür nächstes Jahr zum guten Montag. Auf Wiedersehn!“
„Mich fällt e Schteen vuns Harze“, sahte de Brähsen, alse das heerte. „Appelt is wurklich e juter Mann.“
„Na, ich bin oo froh. Ich hawes jo jlei jesaht: was Kalleje Appelt machen kann, das machte.“
’s mochte so e Schtindchen varjangen sin. Hillebrandts Mittlerer hotte schon zus elfte Mal met seine Harmoneka „An jrienen Schtrand der Elwe“ anjefangen, da ratterte e Auto ’s Dorf länk un hult varn Jasthoff an. Un aus Auto krawelten vier Musekanten met ehre Inschtrumente.
„Hurra, de Musekanten sin da!“ roffen alle in Saal.
„Nu salls awwer lustig wern!“
Un das wurres oo, un se tanzten bis in friehen Morgen nin.
“ ’s woar wurklich scheene heite“, sahte Noacks Karl, alsе
Freiwalds Emman heeme brachte.
„Ja“, meente die “ ’s wiere oo schlimm jewäsen:
Juter Montak un keene Musekanten.“
Richard Erfurth
Quellen: Unser Heimatland vom 30.07.1932