Weihnachten is un bleiwet doch’s scheenste Fest in jansen Joahre, nich bloß for de Kinner, nee, oo de Jroßen freien sich druff, wennse oo nich mehr dran jlom’n, daß de Jeschenke ungern Christboom der Weihnachtsmann henjeläht hot.
Awer’s hot jewiß keener woas darjegen, wenn’s recht ville Jeschenke sin.
Wemmer awer drei oder viermoal dasselbe jeschenkt kreit, da is das wenniger scheene und de Freide drewer nich sehre jroß.
Was sulle zun Beischpiel Noacks Vetter met die drei Pelzmitzen machen, die e vorigte Weihnachten vun seine Schwiegertochter, vun seine varheirate Tochter in Barlin un vun seine Enkelin in Listerfehre gekriegt hot?
Und mer kunnes Wetzels Lenchen nachfiehlen, dassersch Weenen nächer woar wies Lachen, wiese viermoal dasselwigte Kochbuch zun heele Christ kriegte.
’s is äm so ’ne Sache met de Weihnachtsiweraschungen; se brengen männigchesma mehr Arger als Freide.
So junks Weihnachten oo Wusts Friedan.
Se hotte in Wittenbarch ene Freindin, met die se uffs Lizeum jerwesen woar.
Se hotten alle beede oo de öwerschte Klasse durchjemacht, awer schtudieren wolltense alle beede nich wie ville vun ehre Schulkameradinnen.
’s woarn jo freilich männiche drunger, die joar nichs Zeik derzu hotten, – awer se mußtert äm de Mode metmachen.
Un wennse oo sälwer nich jewoollt hätten, denn woarns de Ahlen, diese derzu neetigten.
’s wiere freilich for ville besser, se larntens wurtschuften, dassense schpäter for ehren Mann un de Kinner e orndtlichen Topp Essen kochen und ehre Wurtschaft in Ordnang halen kennten.
Ich hawe schon männiches Haus jesähn, wu de Fraue schtudiert hotte.
Na wie’s da zujink, will ich liewer nich sahn – scheene is jedenfalls annersch.
Un ’s is doch oo wurklich nich neetig, dassen de Frauens de Männer oo no die poar schtudierten Brotschtellen wegnehmen tun.
Mer sall sich da nich wunnern, wenn immer wenniger Männer heiraten un immer wenniger Kinner in Deitschland jeborn wern.
Wie nu Wusts Frieda ehre Freindin in Wittenbarch ze ehren Jeburtstak besuchte, da zeigete diese natierlich oo de Jeschenke, diese gekriegt hotte.
Daberbei woar oo son neimodscher Schlafanzuk – Pijama san se wohl zu son Ding.
Se hottes jo schon bei’n jroßen Holtzhausen in Schaufenster schtehn sehn un drewer jelacht, dassen de Schtädtersch sich alleweile met Jacke un Hose ins Bette lähn.
Wieses nu awer bei ehre Freindin sak un die sahte, daß son Pijama nich bloß recht scheen kleeben täte, sundern oo sehre praktisch wiere, da nahmbse sich vor, sich ze Weihnachten oo een vun ehre Eltern ze winschen.
Als nu Weihnachten ran kamb un ehre Voater se frahte, wasse sich zun heele Christ winsche, da sahtese, dasse jarne e Pijama han mechte.
„E Pijama – was is denn das nu wedder forn Ding?
Das klinget jo bahle wie’n Piano, wie’n Glawier.
Awer das haste doch all ierscht var e poar Joahren jekreit.“
Frieda derklärtessen nu, dasses e Schlasanzuk wiere.
„Ach so“, meente Wusts Vetter, „das is son varrickter Anzuk, wie’n de Figuren ins Schaufenster bein jroßen Holtzhausen in Wittenbarch anhan. ’s ward immer setter schenner: ierscht da schneiden sich de Weiwessen de Zeppe ab un machen sich de Hoare so, daß mer männichesma nich weeß, ob mer e Mannsen oder e Weiwessen vor sich hat. Un nu ziehnse sich schon Jacken un Hosen an wie de Männer un wulln sich dadermet oo no ins Bette län. Woahrscheinlich dassense noch länger schnum’n kennen.
Das mußte dich ausen Sinne schlan, son Ding jiwets nich; da mißten jo de Schparlinge uffs Dach lachen.
Wenn de dorchaus e poar Hosen ins Bette anziehn willst, denn kannste vun mich jo e poar Ungerziehosen krein, un eene Jacke kannste oo han. Bei sone schlechten Zeiten ward for son varrickten Kram keen Jeld ausjegän.“
Frieda sahte joar nischt un schittelte bloß meten Koppe.
Wusts Mutter awer meente argerlich:
„Voater, laß das nur keen heren, se lachen dich sunsten aus.
De bist oo wurklich ze ahltmodsch.
Mer muß doch met de Zeit furtschreiten.
Un ich weeß, daß son Schlafanzuk wurklich was Praktisches is, weile woarm hält, un Friedan ehre Schlafkammer is in Winter sehre koalt.“
„Un heezen salln mer oo nich, weilsen Voater ze ville Kolln kost“, mengete sich Friedas Bruder Arwin in.
„Halt du doch deinen Schnawel un bekimmere dich um deine Biecher un nich um sone Sachen,“ fuhrn der Voater an.
„Setz dich liewer uff de Hosen un larne, dassen ze Weihnachten nich wedder e Brief vuns Juminasjum kimmet.“
Arwin fuhr nämlich alle Take mets Postauto nach Wittenbarch uffs Juminasjum.
E woar schon zweemal sitzen geblem un hotte oo uff de Harwestzensur wedder de Bemагkung, „Versetzung zweifelhaft“.
„Na nu laß bloß deine schlechte Laune nich wedder an’n Jungen aus“, sahte de Wusten.
„Iwrigens is das jo oo meine Sache, un dadervun varschteht ihr Mannsleite nischt. Wenn ich Friedan e Schlafanzuk koofe, kann’s dich jlei sin.“
„Soo – mich sall’s jlei sin, wenn Ihr alle Varricktheeten vun de Städtersch metmachen tut un ’s Jeld darfor wegschmeist!
Ich dächte, du wennigstens kenntest jescheiter sin.
Du weest doch, wie’s schtieht: ’s Jetreide un ’s Veh kost nischt, un was inkimmet, das nimmt’s Finanzamt for de Schteiern weg.
Da kammer nich sone bumme Kledasche koofen.
Sucht Eich was Jescheiteres aus.“
„Hawwe dich man nich so.
Was annerte kennen, das wern mer wohl oo noch kennen.“
Dadermet junk de Wusten zer Tiere naus un schlukse laut hinger sich zu.
Keener erwähnte wedder was vun de Sache, awer Frieda muckschte, weilse ze Weihnachten keen, Pijama krein salle, un oo de Wusten toat met ehren Manne eene janse Weile dumm.
Un Arwin machte oo an liewesten e Bogen um’n Voater, awer nich wegen Friedas Pijama.
E hotte keen reenes Jewissen vun wegen den blauen Briefe vuns Juminasjum, un wenne heeme kamb, schielte jedesma nahn Jlasschranke, wu de Postfachen vun Voater laken, ab da nich etwa son Ding mettenmank woar.
Vurzehn Take vor Weihnachten fuhr Wusts Voater mets Postauto nah Wittenbarch; e mußte webber ema nahs Finanzamt.
E woar sehre argerlich, un mer kunnessen oo nich vardenken, denn wenn der Landwurt vun frieh bis schpät schuften tut un e kimmet doch nich vorwarts, weil de Schteiern un Abgawen alles varschlingen, da musse vardrießlich und schteksch wern.
Wie e nu awer nahs Finanzamt kamb, da brauchte joar nich so ville ze bezahlen, wie e sich jedacht hotte.
Na da freite e sich, un wie e in „Joldenen Adler“, wo e immer inkehren tat, volgens erfuhr, dassen de Briefe vuns Juminasjum schon var acht Taken jeschickt wieren, un sein Arwin hotte diesma keen jekreit, da wurre janz uffjereimt un trank var Freide e poar mehr als sunsten.
„Na“, dachte, „da willste oo de Fraue un de Kinner ze Weihnachten eene unvarhoffte Freide machen.“
Forn Jungen wußte schon was; der kreite e Album met de neisten Schlager fors Glawier, wasse sich schon lange jewinscht hotte, un wasse bein Buchhändler Härtel koofen wolle.
Wie e nu dorch de Kallegenschtraße junk un an jroßen Holtzhause varbeikamb, da schtunden ins Schaufenster sone Fijuren meten Schlafanzuk.
„Hm,“ dachte bei sich, „das sin jo sone Dinger, wie sich Frieda eens ze Weihnachten winscht.
Ich hawwes zwoarschtens varredt, un ’s is jo oo Unsinn, sich meten Anzuk ins Bette zu lähn – awer wenn’s nu ema Mode is.
Schlecht sieht jo son Ding nich aus.
Un se salln nich vun mich sahn, ich wäre noch hingern Monde her.“
E junk also in Laden rin un varlangete e Schlafanzuk.
„Welche Größe?“ frahte der Varkeifer,
„J, wenn ich das wißte,“ sahte Wustes Vetter un kratzte sich verlähn hinger de Ohren.
„Frahn kunne ich doch meine Tochter nich, denn ’s sall doch eene Weihnachtsiweraschung sin.“
Der Harr Jeschäftsfiehrer, der met Wustes bekannt woar, hottes jeheert un meente:
„Nehmen Sie Größe 45; die wird fürs Fräulein passen.“
Der Varkeifer brachte nu een Schtoß Pijamas jeschleppt.
„Wahl macht Qual,“ sahte Wust.
„Se sehn alle sehre scheene aus, awer ich were een rosan nehmen; rosa is ehre Lieblingsfarwe.“
„Haben Sie denn schon für Ihre Gattin etwas ausgesucht?“ frahte der Jeschäftsführer.
„Nee,“ antwurte Wust, „was sall ich der oo schenken – etwa oo e Schlafanzuk? Daberzu is se doch ze ahlt.“
„Ach, das können Sie doch nicht sagen; Frau Wust ist doch noch nicht alt. Und solch ein Pijama ist wirklich etwas Praktisches, namentlich für den Winter. Ihre Frau Gemahlin würde sich gewiß darüber freuen.“
„Wennse meenen; den Schpoaß kennen mer und schon machen.
De Oogen vun meine Frau mechte ich schon sehen.
Awer de Jreeße 45 reicht for die nich, denn se is ziemlich schtark“.
„Nehmen Sie Größe 50; die wird außreichend sein. Und sollte er nicht paffen, dann tauschen wir ihn gerne um.“
Der Varkeifer brachte e zweeten Schtoß Pijamas an.
„En rosan kann ich da nich nehm’n. Ich jlowe, id nehme e blauen.
Der da met de jelwen Schniere sieht sehre hibsch aus.“
De Pijamas wurrn injepackt, jeder in e besunneren Kartong, un Wustes Voater fahr jlicklich darmet heeme.
„Nanu“, meente de Wusten, alse das jroße Paket sahk,
„was haste denn da injekooft?“
„Das mechteste wohl jarne wissen, awer varraten ward nischt.
Das is was vun heele Chrift.“
„For mich?“
„For dich oo met.“
„Da bin ich awer jeschpannt wie’n Flitzbogen. Hoffentlich isses nischt Dummes.“
„De wirscht dich schon drewer frein.“
Wust mußte lachen, wenn sich seine dicke Anna in Pijama vorschtellte.
E schloß ’s Paket furt, dasses keener fingen salle.
E par Take druff fuhr Wustes Mutter nach Wittenbarch, um ze Weihnachten inzekoofen.
Se junk bei Wäsche Böttgern un koofte zeierscht for de drei Mähde in.
„Un nu sall Frieda ehren Schlafanzuk han, un wenn’s mein Oller oo nich will“, sahtese bei sich.
„Se hotten sich nu emah jewinscht, un sall ehre Freide ze Weihnachten han.“
Se koofte e rosan met weißen Besatz.
’n annerten Tak kamb Arwin anse rап.
„Mutter,“ sahte, „ich will doch oo uffs Weihnachten was koofen, awer mein Jeld reecht nich. Ich hawe jo vun mein Taschenjeld geschpoart, hawe on de Karnickelfelle varkooft – awer ’s reecht nich.“
„Wievill willste denn han?“
„Gib mich man zähn Mark.“
„Zähn Mark? Das is awer ville. Was willste denn koofen?“
„Awer Mutter, das kann ich Dich doch nich sahn, ’s sall doch eene Iweraschung sin.“
„Koof man keenen Unsinn.“
Se jaben de zähn Mark, un Arwin fuhr varjniegt nah Wittenbarch. Wie nu de Schule aus woar, da junke bei Schneidersch in de Schloßschtroaße, weilsen da an billigsten vorkamb un varlangte e Schlafanzuk.
„Für Sie, junger Herr?“ frahtes Ladenfreilein.
Arwin wurre janz varlegen.
„Ach nee, for meine Schwester,“ sahte.
„Welche Größe soll’s denn sein?“
„Das weeß ich nich. Frahn kunne ich se doch nich, ’s fall doch ze Weihnachten sin. Awer ich meene, so wie’n de Fijur da ins Schaufenster hot, so jroß musse sin.“
„Also Größe 46,“ sahtes Ladenfreilein un langete e Packen Pijamas ausen Kasten.
Arwin nahmb e rosan met weißen Besatz.
Derheeme varschtecktes Paket uffen Bodden hinger eener oahlen Matratze, die da stund. – – –
Der heelige Oawend woar gekummen.
’s hotte an Take vorher tichtig jeschneit, dasses wie richtiges Weihnachten aussahk.
Bei Wustes woar alles in scheenster Festschtimming.
De Schtolln woarn Wustes Muttern sehre jut jeroaten, un de zwee Jänse, die se jeschloacht hotte, woare sehre fett.
Wustes Voater woar all met uff de Joagd jewäsen un hotte e scheenen Hoasen metjebracht, denn e wolle be Feiertake nich zweemoal hingernanner Jänsebroaten essen.
An sättsten freite sich Frieda uffen heeligen Oawend, denn se hotten ehr alle Andeitungen jemacht, dasse was Scheenes zum heele Chrift kreien salle.
Wie nu draußen in Schtoalle de Kiehe gemolken un samst de Fähre gefittert woarn, da junkense allehoofe in de jute Schtowe, wu der Christboom schtund.
Arwin setzte sich ans Glawier, un se sungen alle metenanner daß scheene Weihnachtslied „Schtille Nacht“.
Un nu junks an de Bescherung.
Zeierscht koamen de Knechte un de Mähde an de Reihe.
Se woarn alle zefrieben un freiten sich, denn Wustes lußen sich nich bereden.
„Wemmer zu de Leite jut is, da sinse oo webber jut,“ sahte de Wusten immer.
Männischesma is es jo freilich oo annersch, besunnersch da, wus Jesinne vun de Fawrikarweeter uffjehetzt ward unse naher ’n Achtstunnentak un annertes varlangen, was doch in de Landwurtschaft nich jeht.
Un wie nu ’s Jesinne seins hotte, da bescherten sich Wustes unger de Familije.
Frieda machte mächtig jroße Ogen, alse uff ehren Platze drei jroße Kartongs schliehn sahk.
Se machte den ierschten uff un zoken rosan Pijama raus.
Se fuhl jlei ehre Mutter umn’n Halz, so freite se sich.
„Ja, vun mich is der awer nich,“ sahte die e bißchen kleenlaut.
„Da, isse vun Voater,“ meeinte Frieda un fuhl den um’n Halz un jaben e harzhoften Kuß, un der freite sich oo.
Wiese nun awer ’n zweeten Kartong uffmachte, un wedder e rosaner Schlajanzuk met weißen Besatz drinne lak, da machtese e varwunnertes Jesichte un sahte:
„Vun wen is denn nu der? Jewiß vun de Mutter.“
“ ’s ward wohl so sin,“ meente die kortsch.
„Hätte ich jewußt, dassen der Voater een koofte, hätte ich Dich was annertes jeschenkt.“
„Na laß man,“ trestese Frieba, „da hawe ich äm ’s Wechsel“.
Arwin schtand dabei un machte e Jesichte wie Jrienshpahn un Schpucke.
Un wiese nu den dritten Kartong uffriß un schone wedder e rosaner Pijama met weißen Besatz drinne lak, da wurre ehre Jesichte sehre lank, un mer sahkses an, dasse sich drewer argerte.
„Na, dreie brauchten’s nu jeroade nich ze sin,“ meentese.
„Wer hotten das fartig jebracht?“
„Na, wer wurd’s denn jewäsen sin?“ sahte ehr Bruder fuchtig.
„Mein janses Jeld hawe ich darfor ausjejän, un nu isses wedder nich recht. Hätte ich das jewußt, hätte ich mei scheenes Jeld behaln.“
„Das hatter nu vun Eire Iweraschung,“ meente Wustes Voater un lachte, awer mer heertensen an, dasse sich oo argerte.
„Na, Mutter, da mache doch wennigstens Dein Paket oo uff,“ sahte.
„Da bin ich awer neijierig,“ meente die. “ ’s ward doch nich oo no e Schlafanzuk drinne sin?“
Un richtig – wiese ’n Deckel vun Kartong hochhob, da kukte wurklich e Schlafanzuk raus – e scheener blauer met jelwe Schnieren.
Se hoben in de Höchte un machten ausenanner.
„Otto,“ sahtese arjerlich, „wie biste denn uff son Infall jekummen, mich son Ding ze kaofen? Das is was for junke Mädchens, awer doch nich forne oahle Fraue. Das ziehe ich nich an, da wurden jo de Schparlinge uffs Dach lachen. Iwrigens isse oo ville ze enge for mich.“
„Das hot mer nu for sein juten Willen“, meente Wustes Voater.
„So sin awer de Weiwer; ierscht wollense son Ding han, un hot merschen jekooft, da pastses wedder nich.
Na ema hawe ich for Eich was zun Anziehn gekooft un nich wedder. Awer sone Weihnachtsiweraschung hawe ich noch nich derläwet.“
Richard Erfurth
aus: Unser Heimatland vom 24.12.1929