Wenn heitzetake zwee sich heiraten tun, da geheert eene janse Masse derzu. Ich meene awwer nich etwan de Wurtschaft oder ’s Jeld, uff das ville so jiebrig sin, dassen ’s Jeld und Jut de Hauptsache un ’s Mächen de Nemsache is. Un gerade in unse Elbaue kann mersch eftersch erlämn, dasse sich bloß heiraten tun, wenn de Wurtschaften oder de Jeldbeitels zun anner passen.
’s jo jemiß keen Fehler nich, wenn de junken Leite etwas met in de Ehe brengen, dassense naher was in de Milch ze brocken han.
Un’s is schlimm genung, wenn zunderweile mäniche Poare zesammenloofen – sie hot nischt un hä hot ierscht recht nischt. Naher isses keen Wunder nich, wenn’s iwerall fehlt, denn aus ’ne
scheene Schissel kann mer nich essen, wenn nischt drin is.
Un mer hots schon eftersch erlewet, daß zwee, die sich ierscht var
lauter Liewe bahle uffgefressen han, naher, wies knapp zujunk, sich ejal zankten un schtritten un sojar priegelten.
Var de Hochzeit jiwets Kisse, un nah de Hochzeit jiwets Schmisse heeßts da.
„Jerscht de Farre, denn de Knarre“, sahte unse Mutter immer zu ehre Kinner, wennse heerte, daß eener heiraten wolle, der nischt hotte un nischt woar. Unse Mutter woar eene sehr kluge Frau.
Awwer dadervun wolle ich jo nich erzähln; ich wolle bloß sahn, wenn heitzetake sich zwee heiraten, da macht das immer vorher eene Menge Umschtänne. Zeierscht muß mer sich de neetigen Papiere besorgen, un wemmer die hot, da jeht mer uffs Schtandesamt un meldets ahn, daß mer heiraten wolle.
Der Schtandesbeamte schreiwets uffen Zettel, was mer ’s Uffgebot nennen tut, un hängets in so’n schwoarzen Kasten vorsch Haus, darmets de Leite allehofe lesen kinnen, daß wedder zwee in Schtand der geflickten Hosen treten wolln. ’s kinne jo all sin, daß eene annerte da is, die oo Ahnschpriche an’n Breitgam erhemn tut.
Sowas kimmet mänichesma in de besten Familijen vor.
Hat nu de Braut jute Freindinnen ins Dorf, denn machen die eene Jurlande um schwoarzen Kasten, dasses nich joar so traurig aussieht. Wennse nu drei Wochen in Kasten gehangen han, denn wernse wedder rausgenumm’n un naher uffs Schtandesamt getrauet. Un darmets keener schpäter abschtreiten kann, dasse sich geheirat han, musses Brautpoar zwee Trauzeigen metbrengn, die ’s met ungerschreim. Ierscht wennse uffs Schtandesamt jetrauet sin, naher kennense sich oo in de Kurche vun Paster trauen lasen.
Mer hots awwer all schon eftersch gehert, dasses ’n Breitgam weder leed wurre un de Varlowung ausenanner junk.
Wenn de denkst, de hasten, da schpringte ausen Kasten.
Der Paster darfse ierscht trauen, wennsen de Bescheinigung vuns Schtandesamt vorgeläht han, sunsten machte sich straffällig.
In de Rawelusche vargißt awwer der Breitgam mänichesma den Schein inzeschteken, un der muß denn ierscht geholt wern, was natierlich de ganze Trauung uffhält un sehre unangenähm is.
Vullens argerlich awwer isses, wenn sowas passieren tut, wie bei Koppens Lieschen ehre Hochzeit. Da hotte der Breitgam oo n Trauschein derheeme lähn gelasen un marktes ierscht, alsen der Paster in de Kurche varlangen tat.
„Du, Justav“, sahte zun ierschten Brautfiehrer, was sein Kusseng woar, „renne doch ma fix heeme un hole n Schein. E läht in Wandschrank jlei vurne.“
Justav schtilpte sich o jlei n Wichstopp uff un machte sich uff de Beene. Darmet keene Pause intrat, luß der Harr Kanter no e poar Liederversche singen, bis Justav weder ran woar. ’s dauerte oo joar nich lange, da woare weder da un gab n Schein n Harrn Paster in de Sankristei nin. Uff ema kam der aus de Sankristeitiehre raus un hotte n janz roten Koрр. E trat varn Breitgam hen un fuhrn ahn:
„Herr, wie können Sie sich unterstehn, an heiliger Stätte solch unziemlichen Scherz zu treiben!“
Der woar janz derschroden, weile sich doch joar nischt Beeses bewußt woar, un sahte: „Harr Paster, was meenense denn? Was sall ich denn gemacht han?“
„So“, meente der Paster fuchtig,
„Sie verstehen mich nicht? Sie wollen’s wohl noch ableugnen? Aher Sie haben doch wohl lesen gelernt.“
Un darmet hulten n Schein var de Oogen, un dadruff schtund:,
„Das Schwein ist trichinen- und finnenfrei.“
Justav hotte nämlich in de Rawelusche n Fleischbeschauzettel vuns Hochzeitsschwein schtatt n Trauschein arwischt un den n Paster in de Sankristei gegän.
Ierscht alsen de Varwechselung uffgeklärt un n richtigen Trauschein geholt hotten, kunne de Trauung schtattfingen.
Der Harr Kanter mußte freilich no e neies Lied uffschtecken, daß de Schteerung nich joar ze sehre ze marken woar.
Frieher bis zus Joahr 1874 woar das mets Heiraten eenfacher.
Da junks Brautpoar zun Harrn Paster un beschtelltes Uffgebot.
Der nahmse meerschtenteels son bißchen ins Gebet vun wegen de kurchlichen Ehren bei de Trauung, un naher wurrnse drei Sunntake nahnanner in de Kurche uffgebotten – se wurrn vun de Kanzel geschmissen, wie mer saht – un denn kunne de Hochzeit sin.
Awwer oo da hots mänichesma no gehabert, un mäncher is de Braut no vorsch letzte Uffgebot los geworren.
Dadervun will ich ma was erzähln.
In e Dorfe in de Elbaue woar dazemah e junker Kanter.
E woar vuns Eislemner Semnar gekummn.
Pehdagogsche Akademien wie heite gab‘ dazemah no nich.
E woar e hellschen forscher un hibscher Karl, un’s woar desterwähn
oo keen Wunder, dassen de Mächens ins Dorf alle jarne hotten, an sättsten awwer Frankens Martha.
Un weilse e sehre schmuckes, kurwendiges Weiwessen woar, da dauertes oo joar nich lange, un der Kanter woar bis iwer beede Ohren in se varliewet, un se wurrn sich beede eenig, dasse sich heiraten wollten.
Dadervun awwer wolle Marthan ehre Voater nischt wissen, denn weile zu de reichen Bauern ins Dorf geheerte, da wolle met seine Tochter hecher hinaus, un se sollte Schtallbooms Emiln heiraten, weil der eene große Wurtschaft hotte.
Martha awwer wolle nischt vun’n wissen un bleb ehren Kanter trei. Da schteckte sich Schtallboom hinger Frankens Vettern, un der nahm sichs Mächen ganz geheerig vor. E kunne awwer nischt bei se ausrichten; Martha woar schteksch un sahte, se wolle keen annern alsen Kanter nähmn.
Das junk nu eene janse Weile so länk hen, bis n ahlen Franken de Jeduld riß. „Also kortsch un jut“, sahte ze seine Tochter, „de heiratst Schtallbooms Emiln, un wenn de mich mein Wilen nich tust, naher sin mer geschiedene Leite; denn entarwe ich dich, dadruff kannste dich varlasen. Naher kannste sähn, ab dich der Schulmeester no nimmet.“
Martha woar awwer bokbeenig un sahte:
„Mache was de willst, Voater, awwer son Waschlappen wie den Schtallboom nähme ich nich, un wenner eich alle uffen Kopp schtellt.
Das is mich schon der rechte Karl, der sich hingern Voater vuns Mächen varschticht.“
Un dadermet lußen Ahlen schtehn un junk zer Schtomstiehre naus.
Uffen Oamd traffe sich metten Kanter un klagten ehre Leed.
Der trestetse un meente, se salle n Kopp nich hängen lasen; e würre ehren Voater schon no rumkrein; se salle ihn nur machen lasen.
De Hauptsache wiere doch, dasse fest bleimn täte.
Das varschprachen Martha denn oo.
’s mochten vurzehn Take varjangen sin, da sahte ehrе Voater zuse: „Ich hawe jestern metten Harrn Paster geschprochen un n gesaht, daß Emil morgen eier Uffgebot beschtellen ward. Uffen Sunntak sollter ’s ierschtemoal uffgebotten wern. Un nu mach mer keene Schparenzgen, sunsten sallste mich kennen larnen.“
„Voater“, antwurrte Martha, „de weeßt meine Mееnung, un darbei bleiwe ich, mags kummen wies will“. Un dadermet junkse furt.
Wies Freitak woar, da kam der Paster zun Kanter in de Schule un sahte zun, dasse uffen Sunntak notwennig vareisen misse, un er misse da moal Läsejottesdiest haln. De Abkindigungen würren no rewerschicken, ’s wiere bloß de Kallekte un e Uffgebot.
Darbei kukte n Kanter mitleidig ahn.
Der varfarwete sich zwoarschtens e wennig, Iuß sich awwer sunsten nischt marken un sahte bloß: „Schön, Herr Pastor.“
Als nu der Sunntak kam, da woar de Kurche vull, wenn oo bloß Kanterläse woar. ’s hottesich ins Dorf rumgeschprochen, daß Frankens Martha met Schtallbooms Emiln salle uffgebotten wern, den se doch joarnich gemocht hotte. Un da woarn doch de Leite neigierig, wie sich der Kanter darbei benähmen würre.
’s woarn ville drunger, den tate leed, noch derzu, dasses Uffgebot sälwer varkindigen salle, wu e doch so lange metse gegangen woar.
Vun Frankens woar niemand in de Kurche, weil sich das nich schickte – bloß de Jroßemahd woar da.
Der Kanter hult de Kurche wie immer, wenn Kanterläse woar.
Weil doch de Leite nich jlei alle da sin, wenn de Kurche ahngeht und mersche doch beis Singen allehofe han will, da schpielte zeierscht e scheenes Schtick uff de Orgel – ich jlowe se sahn Prehludgum derzu. Un wiese nu allehofe beisammn woarn, da kams Kurchenlied
„Wer nur den liewen Jott läßt walten“. Das sungense denn oo alle so recht vun Harzen met – mäniche nich scheene, awwer laut.
Wie nu der vorletzte Versch alle woar, da luß der Kanter de ahle
Orgel schtehn un junk runger vuns Chor un varsch Altar.
De Gemeene mußte derweile n letzten Versch alleene singen.
Kramersch Vetter lähte sich da mächtig ins Zeik un sung, daß de Fenster in de Kurche wackelten un merschs ’s Dorf länk nunger bis ahn Schmiedeteich heeren kunne. Bei de vierte Zeile awwer woare schone ungene, un wenn de Schulkinner uffs Orgelchor nich n Ton gehaln hätten, denn hätte all ’s janse Lied umgeschmissen.
Der Kanter verlas ’s Sunntaksevangeljum – ’s woar das vun juten Hurten – un hernah de Preddigt derzu. Un mer mußtesen lasen:
e machte das sehre scheene. Der Harr Paster kunnes oo nich besser, bloß dasser de Preddigt auswennig gelarnt hotte. De Leite heerten n Harrn Kanter desterwähn oo sehre ahndächtig zu, bloß der ahle Feldhieter Jänsicke der schluf wedder darbei in, un wenn n oo sein Nachber in de Seite schtaukte, weile darbei so laut schnarchte – ’s half doch nischt; e schluf immer wedder in.
De Preddigt woar alle, un der Kanter sahtes Amen.
Alle in de Kurche schpitzten de Ohren, denn nu mußtes kummen. Der Kanter marktes wohl, daß alle Oogen uffen gerichtet woarn, awwer e nahm sich zesammen un luß sichs nich marken, wie uffgeregt e ins Harze woar. De Schtimme zitterten awwer doch e wennig, un oo de Hände, die ’s Blatt met de Abkindigungen hulten.
In de Kurche woarsch mucksmeischenschtill, alse ahnfung:
„Es sind Personen vorhanden, die sich entschlossen haben, in den Ehestand zu treten und dazu die Fürbitte der Gemeinde begehren: der Lehrer und Kantor Hermann Friedrich Hartmann und Jungfrau Helene Martha Franke, beide allhier.“
Das woar, wie wenn der Blitz ingeschloahn hätte.
De Leite fuhrn orndlich hok un kukten enanner vardutzt ahn, un
Fritschens Vetter, der es bißchen schwer heeren tat un desterwähn de Hände an de Ohren geläht hotte, frahte Jurchens Voatern, der näm saß, janz laut, daß mersch in de janse Kurche heeren kunne: „Was hotte jesaht? Der Kanter – nich Schtallbooms Emil?“
„Jo“, sahte der, „metten Kanter – wer hätte das jejlowet!“
De Kurche woar aus. Var de Tiehre awwer blem n ville schtehn un ungerhielen sich ewer das Uffgebot. Se wollten oo ’n Kanter jlei jrateliern. Der koam awwer nich – e hotte sich jlei durch die Sankristei furtjemacht.
Frankens Jroßemoahd awwer loff wasse loofen kunne nah heeme. Se schtolperte darbei iwern Schteen, der in’n Hoff lag, dasses Jesankbuk e janses Schticke furtflog un mank de Jänse un Hinner, die da schtunn, dasse ausenanner fuhrn un krieschten.
Wiese nu awwer vun das Uffgebot erzählen tat – harrjeh, das Hallo! Frankens Voater wurre fuchsteiwelswild un towete, daß mersch bis uff de Schtroaße heeren kunne. Wenn jetzt der Kanter in Wegg gekummen wiere – na denn jnade Jott!
Der awwer saß ins Schulhaus un hotte de Tiehre zujeschlossene – e wolle keen sähn un heeren. Un oo Frankens Martha woar nich da; die hotte sich beizeiten ausen Schtowe jemacht.
Desterwähn mußte Frankens Muhme herhaln.
Se luß ehren Mann eene janse Weile towen, denn sahtese:
„Nu heere oo eemoal wedder uff; de Leite loofen drausn schon zesammen. Un mich laß ausen Schpiel; ich hawe doch nischt met die Sache ze tun. Ich sae es jo oo: ’s is wurklich nich hibsch vun Kanter un vun unse Marthan, dasses uff sone Weise erzwingen wolln. Awwer ’s is doch nu eemoal jeschehn un nischt mehr dran ze ännern. De kannst doch ’s Uffgebot nich wedder rickgängig machen; das würre e scheene Schkandal jän. ’s bleiwet uns nischt annertes iwrig, als jute Miene zus beese Schpiel ze machen. Un wennstes Dich recht ewerläst, da isses all oo ’s beste so. Wenn Martha nu eemoal nich vun Kanter läßt, kannste nischt machen. De kannst se doch nich derzu zwingen, e annerten zu nähmn. Un De willst doch oo nich, daß unse Mächen unjliklich ward.“
Frankens Voater sahk das denn oo in. E woar zwoarschtens no eene janse Weile beese met Marthan, awwer die luß sich nich inschichtern; se blebb bei ehre Meenung, wennse ’n Kanter nich heiroaten salle, denn nähmse iwerhaupt keenen un würre leddig bleim. Na un da jab ehre Voater endlich nаh.
Schtallbooms Emil awwer jab sich darmet nich zefrieden, zemalen de Leite met de varlorene Braut uffzochen.
E junk nach Wittenbarch zun Harrn Superntenden, der Kreisschulinspekter woar, was heite der Schulrat is, un der mußte ’n Kanter bei de Regierung ahnzeigen.
Der Kanter mußte nah Merscheborg kummen, un der Regierungsschulrat nahmn scharf ins Gebet.
’s woar awwer e sehre varschtändiger Mann, der bloß nah ausen barschtig woar, awwer e jutes Harze hotte.
Un wie ’n nu der Kanter erzählen tat, wie alles so jekummen wiere, un wie das Mächen den annerten nu eemoal nich hätte ausschtehn meegen, da kunne merschen ahnsähn, dassen de Sache nahe junk; e drehete sich e poarmoal nah de Seite um un schmunzelte.
E wolle sich awwer doch nischt marken lasen un setzte de Amtsmiene uff.
E sahte zun Kanter, daß das eene schlimme Sache wiere, die ’n ’s Amt
kosten kinne, weils doch eegentlich Amtsmißbrauch un Betrug wiere. Awwer der Harr Superntende un oo der Harr Paster hätten e jutes Wort forn ingeläht. Na un weils Mächen den annerten durchaus nich hätte han wolln, da hättese ehre Voater oo nich zwingen derfen. Desterwähn wolle de Regierung oo Jnade for Recht erjehn lasen, un e salle metten Varweis un eene Schtrafvarsetzung darvunkummen. Denn ins Dorf kinne doch nich bleim, das würre jo sälwer injähn.
Der Kanter sahk das oo in, un ’s woarn oo recht so, weile wußte, dasses nich jut is, wenn de junke Kanterschfraue an’n Ort bleiwet, wuse herschtammt; se kimmet ze leichte met in Dorfklatsch nin.
Der Regierungsrat kloppten beis Furtjehn janz freindlich uff de Schuller un meente:
„Na, nun reisen Sie nur ruhig nach Hause. Grüßen Sie Ihre Braut von mir und sagen Sie ihr, ich wünschte ihr viel Glück als junger Lehrersfrau.“
Niemand woar froher als der Kanter, daß de Sache no so jut abjeloofen woar.
Uffen Sunntak druff wurre met seine Martha ’s zweetemoal in de Kurche uffjebotten un’n annerten Sunntak ’s drittemoal.
Diesmoah awwer machtes der Harr Paster sälwer, un e machtes sehre jarne.
Kortsch vorher kriegte der Kanter vun de Regierung aus Merscheborg e Schreim, un doa schtund drin, dasse nah W. bei Torjau varsetzt wiere.
E woarsch zefrieden un Martha oo, denn ’s woar e jroßes scheenes Bauerndorf, wuse jarne henjunk. Se wiere freilich ehren Kanter ewerall hen jefolget un wenns in de Hunneturkei jewäsen wiere.
Un weil doch ehre Ausschteier all schon lange fartig doalag, doa wurre denn oo jlei de Hochzeit jefeiert.
’s woar e scheener, heller Friehlingstak. De Sunne lachte janz
woarm vun blauen Himmel, de Beeme un de Blumen bliehten, un in Joarten un iwerall sungen de Veegel. De Jlocken klungen ville feierlicher als sunsten, als der lanke Hochzeitszuk nah de Kurche junk, un de ahle Orgel, die heite der Harr Kanter vuns Nachberdorf schpielte, klung ville scheener un quietschte nich e bißchen, un de Schulkinner omn uffs Chor sungen, dasses man so schallen tat.
Bloß de Weiwessen aus Dorf un vun de Nachberschaft, die immer doa sin, wenn eene jroße Hochzeit is, die kunnten var Riehrung keen Ton singen un wischten sich de Oogen, wiese das junke, schmucke Brautpoar sahken.
Un oo der Harr Paster woar sehre geriehrt, alse den beeden den Schpruch auslähte, den e zun Trautext jewählt hotte:
„Sei getreu bis in den Tod, so will ich dir die Krone des Lebens geben.“ Un der paßte jo oo for die beeden so scheene.
Wiese nu nah de Trauung wedder heeme koamen un allehofe ’s Brautpoar jratelierten, doa sahte Frankens Voater zuse:
„Na, Arger hotter mich jo jenung jemacht, awwer ’s is all jut so.
De Hauptsache is doch, dasser eich alle beede jut vartroaht un recht jliklich mettenanner läwet.“
Un das is denn o so jeworrn; ’s jab keen jliklicheres Poar in de janse Elbaue wie Frankens Marthan un ehre Kanter.
Richard Erfurth
Quellen: Unser Heimatland vom 28.11.1931