Krausens Vetter hatte sehre schlechte Laune; e woar mets linke Been zeiierscht uffgeschtan’n, wie mer so saht.
Jlei wie e heite frieh aus Bette schteek un zus Fenster naus kukte, da sahke, wies ränte, un das argerten sehre. Se hotten jestern uff de Hengftheenichte Hei jemacht, un weil das so scheen drehe woar, da wollenses heite infoahren. Nu wurre das natierlich nischt, un de janze Arweet woar wedder emah for umsunst jewäsen. Na un das sulle Krausens Vettern nich argern! Was sulle denne Heite met de Leite anfangen? Uffs Feld kunnese doch bei die Nässe oo nich
schicken, un in de Scheine jabs doch oo nischt ze tun.
Wie e nu aus de Schlafschtowe kam un in de Wohnschtuwe trat, da sahke, daß der Kaffee schon uffen Tische schtund. E sahk awwer oo, daß der jroße schwarze Kuter darnem saß un vun de Butter leckte, die de Fraue hingestellt hotte.
Als der Kuter ’n Harrn bemarkte, da schprange rasch vun Tische runger; daderbei risse awwer de scheene jroße Tasse met, die Krausens Olga ehren Voater ierscht vorigte Weihnachten geschenkt hotte, un uff die met joldne Buchschtawen der scheene Schpruch schtund: „Froh erwache jeden Morgen!“ De Tasse fiel so unglicklich uffen Fußbodden, daß der Henkel abbrach.
Das brachte Krausen in Wut; e zohken Pantoffel aus un warf darmet nahn Kuter, der ungersch Sofa reterierte.
Nu troaf der Pantoffel zwarschtens de Katze nich, dadavor awwer das Bild, was iewersch Sofa hung, un uff den Vetter Krause als Soldate abgebild’t woar. De Schpitze von Pantoffel traf jerade Vetter Krausen ins Jesichte, un de Jlasscheiwe vuns Bild junk kaput.
Wie Krausens Mutter den Larm heerte, da kam se rasch aus de Kiche gelofen un machte de Schtomstiehre uff.
„Na nu“, meentese, „was jiwets denn hier ?“
Awwer Krause fuhr se an:
„Ene scheene Wurtschaft das! De Butter kost wohl keen Jeld, ,dassersche de Katze vorsetzt? Un Olga hat mich de scheene Tasse wohl gekooft, dasse das ahle varfluchte Katzenschticke zarbrechen sall!“
„Du meine Jiete!“ jammerte Krausens Muhme, als se de Bescheerung saht, „wer hot denn oo ’n ahlen Kuter in de Schtowe gelasen ?“
„Na, wenn du’s nich weeßt, ich kanns doch nich wissen.
Iwerhaupt, erzieht doch eier Viehzeik besser, dasses nich uffen
Tisch jeht.“
„Eener alleene kann sich nich zanken“, dachte de Krausen.
Se sahte also weiter nischt, hob de Tasse metten zarbrochnen
Henkel uff, junk an Jlasschrank un schtellte ehren Mann eene annerte Tasse hen, josse vull Kaffee un junk wedder naus.
Der Kuter hotte den Oogenblick abgepaßt, e sschoß hingersche ze Tiehre naus, un furt woare mets bese Jewissen.
Krause trank sein Kaffee; e aß oo e poar Happen Butterbrot derzu, awwer’s wollen nich schmecken. Na ja, wemmer sich jlei uffen nichternen Magen argern muß, wo sall denn da der Appetit harkummen?
E zok de Schteweln an, nahm de Mitze vun Haken und junk naus uffen Hoff, um de Leite anzuschtelln. Wie e nu zer Haußtiehre naus
kam da heerte, wie de Jroßemahd in Kuhschtalle sung:
„Wer hat bloß den Käse zum Bahnhof gerollt!“
„Natierlich, das Weiwervolk hot weiter nischt wie son Bleedsin in Koppe!“ schimpte vor sich hen. E junk an de Tiehre un schreek in Schtall nin: „Emile, laß deine dämliche Singerei sin un paß liewer uff de Arweet uff!“
Pardautz! de Milchgelte rutschte Emilen vun Schoße, un de Milch loff in de Schtreie.
„Harrejeh, Harr Krause, wie kennense mich denn so derschrecken! de scheene Milch! ’s is nur jut, daß no nich ville in de Gelte drin woar.“
„So – nich ville drin! Ich mißte dich jlei e poar winken.“
E junk weiter nahn Fähreschtalle. Der Jroßknecht saß uff de Futterkiste un las jerade ’s „Wittenbarcher Takeblatt“.
Wie e awwer Krausen kummen heerte, da schprange fix runger un machte sich bei de Fähre zu schaffen, un was der Hengstjunge woar, der jrawelte in de Futterkrippe rum.
„Na, ihr hot wohl heite jar nischt ze tun ?“ knurrtese Krause an.
„Mets Hei-Infahren ward naterlich nischt. Der Jroße fährt vormittaks Jauche uff de Langemaßen. Was nachmittaks ward, wern mer jo sähn. Un du, Justaf, baust’n Holzdiemen wedder uff, denner injerissen hot. Wennern nich so liederlich jebaut hätt, wieres nich passiert.“
„Awwer, Harr Krause“, antwurrte der Jroßknecht, „wer kann denn darfor, wenn der Schimmel metten Woagen darjejen rammelt“.
„Das isses äm; wenn de nich son schlapper Karl wierest, denn wiere das nich passiert. – Da brauchste dich joar nich ze varmunkieren, varschtehste !“
E trat wedder naus in Hoff. Der Rän hotte nahgelasen, ’s nieselte bloß no e bischen. Krause junk in de Schtowe nin, zok de Joppe an, nahmen Schtock un wolle furtjehn.
Wie e jerade zer Haustiehre naus wolle, kam seine Fraue außen Keller. „Nanu,“ sahtese, „wo willste denn hen ?“
„Wo were ich denn hen wollen? Nah de Hengstheenichte will ich un mal nahn Hei sehn.“
„Na, den Weg kannste dich schpoarn. Heite kennen mer doch nich infoahrn, ’s hot jo de halwe Nacht geränt.“
„Da isses äm, was mich argert. Wenns nah mich jejangen wiere, dann hätten mer jestern Oawend no eene Fuhre geholt.“
„Awwer Krause, de mußt doch nich unvarninftig sin. Ich dächte, de Leite hätten jestern ehr meeglichstes jetan un bis in de Nacht jearweet.“
„Ich bin schon verninftig un weeß, was ich mache. Wenn bloß annerte so varninftig sin wollten. ’s wiere iwerhaupt besser, de paßtest besser uff deine Mähde uff, dasse de Milch nich in Schtall schitten tun.“
Dadermett schmisse de Haustiehre hinger sich zu, dasses krachte un junk fort.
„Na loof doch, du ahles Brummmard, un kullere dich aus“, dachte de Krausen. „Als wenn eener was darfor kennte, dasses geränt hot. Ja, ja, so sin de Mannsen: Wenn den emah was jejen Schtrich jeht, da mechtense sich jlei met Jott un alle Welt zanken.“
Krause junk’s Dorf nunger un nah de Hengstheenichte zu.
’s letzte Haus woar Schuster Botten seins. Bott hotte e jroßen hibschen Hund, Leo huße. Wenn Krause kam, schtunde jewehnlich vor de Hoffstiehre. E hotte sein Jefallen an den Hunde un roffen immer ran un schtreichelten, wasse sich sehre jarne jefallen ließ.
Heite schtunde oo wedder da. Wie’n Krausens Vetter awwer roff: „Leo, kumm her!“ da funge an ze bellen un se knurrn un zeigte de Zähne, als wenne beißen wolle.
„Du dämliches Vieh, was fällt dich denn heite in!“
roff Krause un junk e poar Schritte zerick.
Schuster Bott, der das jesähn hotte, kam metten Schtock außen Hause geloffen un schreek: „Leo kimmste har!“ E hauten eens metten Schtocke iwern Buckel, daß der Hund schreek und met knurrn in seine Hitte kroch.
„Was hot denn das dumme Tier heite?“ meente Krause.
„Ach, der is schon seit etliche Zeit so. Ich jlowe das Luder ward alt un muß bahle geschlacht wern“, sahte der Schuster.
„Hm, schade drum.“ Dadermet junk Krause weiter.
Wie e nu nah de Wiese kam, da ungersuchte de Heihoofen; se woarn klitschmoadennaß. Un weils nu oo wedder
sätter ze rän anfing, da wurre seine Laune nich besser. E maschierte wedder heeme, un wie e in de Schtowe kam da schmisse argerlich’n Schtock in de Ecke un de nasse Mitze uffen Tisch.
De Krausen saß jerade ans Fenster un schtoppte Schtrimpe.
Se woar eene kluge Fraue, un desterwähn tatse, als abse seine schlechte Laune nich markte.
„Nee“, meentese, um was ze sahn, „de Schtrimpe halen heitzetake oo joar nischt mehr“.
„Warum koofter denn son Schpinnewemzeik! Schtrickt doch eire Schtrimpe sälwer, wie’s frieher woar. Awwer nee, ihr mißt jede Dummheet metmachen. Mich wunnerts bloß, dasser eich noch keen Buwikopp hot schneiden lasen. Na, das kann ich eich sahn —
„Ach, Krause, reg dich doch nich uff. Dadervor biste sicher. Awwer was de Schtrimpe un de Kleeder anbelanget, da kannste wurklich nich verlangen, daß mer altmodisch sin sollen. Willste etwa, dasse unse Olga auslachen. wennse mets lanke Schleppekleid un met dicke wollne Schtrimре ankimmet?“
„Wer ward denn lachen? Doch bloß de Dummen, die sich liewer de Beene derfriern als dasse e jescheiten Schtrump anziehn.“
„Weeßte, Vater, mer wolln uns nich dadrewer schtreiten. Dadervun varschteht ihr Mannsen nischt. Da laß nur mich machen. Ich sorge schon darvor, daß de Kerche ins Dorf bleiwet.“
„Ach so, dadervun verschtehe ich wedder emah nischt“.
schimpte Krause un schluk met de Faust uffen Tisch.
„Awwer das varschtehe ich, dasses e Hoofen Jeld kost, wenn alle
acht Take neie Schtrimpe jekooft wärn!“
Seine Fraue hotte eene scharfe Antwurt uff de Zunge; se besann sich awwer, trat janz dichte an ehren Mann ran un lähten de Hand uff de Schuller.
„Arnst“, sahtese und kukten so recht treiharzig an, „sak mich emah, was is das met dich? Das woar doch sunsten nich; du bist ierscht de letzte Zeit so jeworrn“.
Wie das Krause heerte, da jabsen pletzlich e Schtich ins Harze.
E mußte an Botten sein Hund denken, un wie der Schuster sahte: „Das Luder ward alt un muß bahle jeschlacht wern.“
Schtunds so metten? Woare wurklich schon so alt? –
Ach nee, e woar doch ierscht knapp fufzig Joahre.
Un das woar doch noch keen hokes Alter.
Ja, wenn e so iwer sechzig gewäsen wiere, naher hätte wohl Jrund gehot ze knurrn, awwer so —
E nahm seine Fraue in Arm un sahte:
„Laß jut sin, Mutter; ’s woar nich beese gemeent. ’s woar dumm vun mich, daß ich mich vun Rän de Laune vardarwen luß. Awwer’s sall nich wedder vorkummen.“
Um dadermet dricktese an sich und jabse e harzhaften Kuß.
Un so wurres denn oo. Wenne wedder emah schtäksch wärn wulle, da fuln jedesmah Botten sein Hund in, un e heert’n Schuster sahn: „Das Luder ward alt und muß bahle jeschlacht wern.“
Das half.
So hotte Schuster Botten sein Hund Krausens Vettern
kuriert.
Richard Erfurth
Quellen: Unser Heimatland vom 16.02.1928