Nich alleene in de Schtadt, nee, oo uffs Dorf jiwets eene Reihe hoker un wichtger Parsonen.
Da is zeierscht der Harr Paster un der Harr Kanter, naher der Jemeenevorschteher meten Jemeenediener, was oo jlei der Nachtwächter is, un der Balwier.
Son Balwier hodd uffs Dorf ville mehr zu bedeiten als in de Schtadt, weile da nich bloß Boartschawer un Hoarabschneider is, nee, e muß da oo was vun de Krankheeten bei de Menschen un beis Veh varschtehn, un manche Balwier hodd schon männichen wedder uff de Beene jebracht, den de jelehrten Duktersch aus de Schtadt schone uffjejewen hodden.
Desterwähn sahn jo oo de Leite zu de Balwiersch männichesmah „Dukter“
Se hodden in Trewitz oo son Balwier – Rehoahn huße.
Das woare hellisch fixer Karl, immer lustig un varjniegt, un n‘ Kopp hodde immer vulle Flausen.
Awwer a varschtund seine Sache; nich bloß dasse ’n Mannsen Sunntaks un ahn hoken Festtaken n‘ Boart abschawete un ’n de Hoare nah de neieste Mode abschnitt – oo bei de Weiwessen woare sehre beliewet.
Denn wenn eene ze wenigg Hoare uffn Kopp hodde, da junkse heemlich zun Balwier Rehoahn, un der machtese son lanken, scheenen Zopp, dassen mersch nich ungerscheiden kunne, absen richtiger woar oder n‘ falscher Willem.
Un wenn der Jesankvarein „Liederlust“ zus Schtiftungsfest Theater schpielte, da zeijete der Boartkrater, dasse’n Kinstlär in sein Fache woar; e friesierte un schminkte de Schauschpielersch so jroßartg, dassen mer keen weddererkennen kunne.
Awwer de Hauptsache woar doch, dasse sich uff de Krankheeten bei de Menschen un beis Veh varschtund, un wenn in Schtalle oder ins Haus was krank woar, da schickte mer zeierscht bein Balwier, dasse kummen sulle.
Er kam o immer jlei, luß sich de Zunge zeijen, kukte in de Oogen, fiehlten Buls und jab was in – hohmepatsch nanntes.
Merschtenteels halfs oo – na, un wenns nich half, schaden tats oo nischt.
Nu woar in Trewitz e Kossäte – Kuhnerts Justaf huße – den kunne keener so recht leiden.
’s Bulwer hodde nich derfungn – soaß vier Tiehren darvun wegg, sahte der Harr Kanter immer, alse no bein zer Schule junk.
Awwer forchterlich jeizig woare.
Balwieren tate sich sälwer, um keen Jeld darvor auszejähn, un de Hoare luhße sich bloß alle halwe Joahre emah schneiden, uns schenierten joar nichе, wennsen oo bis ewern Rockkragen hungen.
E woar nich verheiradd; de Leite sahden, e wiere leddig jeblem’n, bloß darmete keene Fraue un keene Kinner ze dernährn brauchte.
E hodde hingern Heischen von Balwier e Schtickchen Acker lähn – ’s kunne e halwer Morjen sin – un Rehoahn häddessen jarne abjekooft, weile sichen Joarten machen wolle.
E botten oo ’n janz ahnschtändjen Preis darfor, awwer der ahle Jeizkragen varlangete eene janz ausverschamt hoke Summe, was der Acker joar nich wert woar.
„Ich kreien schon no“, sahde der Balwier, wenns Jeschpräch druff kam.
„Wie willste denn das machen ?“ frahtensen, „der ahle Jeizkragen läßt nischt runger.“
„Laßt mich nur machen“, jabe zer Antwurrt, „ich kreien schon noch. Kimmt Zeit, kimmt Rat“.
Un so wurres denn oo.
Eenes scheenen Taks jejen Oawend kukte der Balwier aus seine Haustiehre, weile jrade furtjehn wolle.
Da sahke, wie Kuhnerts Justaf de Dorfschtraße länk runger kam un
uff sein Haus zuschteierte, weile sich endlich wedder emah de lanken Hoare schneiden lahßen wulle, die schon sehre weit iwern Rockkragen hungen.
„Warte,“ sahte Rehoahn var sich hen, „heite kreie ich dich ahlen Jeizhalz“.
E junk rasch in de Schtowe zarrick nahm ’n Schpiejel vun de Kunnsohle runger un lähnten varkehrt ahn de Wand näm Jlasschrank.
Außen Schranke nahme e annerten Schpiejel un schtellten uff de Kunnsohle varn Balwierschtuhl.
’s woar awwer keenn richtjer Schpiejel,
’s woar e Vexirspiegel – e Hollschpiejel heeßt jo wo son Ding – dersch Jesichte varstellt un varzarrt.
E hodden sich neilich aus Barlin metjebracht.
Jlei druff kam Kuhnerts Justaf zer Thiere rin:
„Jun Oawend“ sahde.
„Jun Oawend, Harr Kuhnert,“ sahde der Balwier,
un wollen de Hand jän.
E fuhr awwer jlei wedder zarrick, als wiere sehre derschrocken, un roff: „Harrejeh, Harr Kuhnert, was is denn metse passiert! Wie sähnse denn aus?“
„Was sall denn mit mich passiert sin ?“ frahte Kuhnert und riß de Oogen uff, denn a hodde sich sälwer derschrocken, alsen der Balwier so ahnschreck.
„Nu jo“, meente denne, “ ’s woar mich ja heite nich so recht; ich hawwe mich е bischen derkält, weil ich gestern beis Jauchefoahrn naß jeworrn bin.
Awwer das hodd doch weiter nicht zu sahn“.
„Nee, nee, das isses nich“, meente Rehoohn, „das muß was vill Schlimmeres sin. Kukense doch in Schpiejel – ’s is schade, ’n großen hodd meine Ahle zerschlahn, se is heute frieh beis Auskehrn meten Bäsenschtiel nin jefoahrn – sunften kunntesens no ville bessersähn.“ Darbei hulten ’n Schpiejel vorsch Jesichte.
Kaum hodde Kuhnert e Blick nin jetan, da fuhre insetzt zarrick, alse sein uffjedunsenes und verzarrtes Jesichte sahk.
„Rehoahn“, sahte, un wurre janz blaß,
„was is das met mich? Is das mein Kopp oder isses nich ?“
„Freilich isses“.
„Da bin ich wo varhext!“ schreke.
„Varhext – das is Unsinn, Kuhnert, awwer dahinger schticht sicher eene schwere Krankheet.“
„Eene schwere Krankheet ? – ’s muß wo so was sin, denn mich ziehts so in de Jlieder“.
Un darbei warfe wedder e scheien Blick in Schpiejel.
„Awwer was kinne denn das forne Krankheet sin ?“-
„Das missen mer äm noch festschtelln. Setzen se sich ierscht ehmah hen.“
Un darmet drikten Rehoahn in Balwierschtuhl nedder und funk an, Kuhnerten ’n Buls zu fiehlen.
„Hm,“ sahte nahner Weile, „Fiewer hanse.“
Un naher schtrichen ewersch Jesichte an knippen darbei in de Backen, dasse vor Schmarz schrek.
„Tuts weh?“ frahte besorget.
„Freilich, freilich,“ wimmerte Kuhnert.
„Na, da weeß ich schon, wasses is. Ich hawes mich doch jlei jedacht.“
„Was isses denne?“
„Derschrekense nich ’s is Jesichtswassersucht – Elefas indikus, wie die Jelehrten sahn – uff deitsch: Elefantenschäddel.“
„Is das jefährlich?“
„Na freilich. Se sähn doch sälwer, wies Jesichte zusähens anschwillt.“ Un dardamet hulten wedder ’n Schpiejel vor.
„Un da, un da de roten Flatschen – das isses sicherschte Zeechen.“
(De roten Schtellen woarn natierlich bloß vuns Dricken un Kneipen gekumm’n.)
„Sähnse, Harr Kuhnert, “ fuhre furt, „wenn nu de Jeschwulst no weiter furtschreitet, da dringetse zuletzt ins Jeharne – un aus isses.“
„Nee, nee!“ schrek Kuhnert, „ich will no nich schtarwen.
Rehoahn, helfense mich, daß ich nich schtarwe!“
„Nu ja, ich will sähn, was ich tun kann, awwer“…
der Balwier machte ’ne Pause.
„Rehoahn, helfense mich!“ roff Kuhnert wedder und
bewerte darbei wie Eschpenloob,
“ ’s soll eier Schoaden nich sin. Wennse mich helfen, sullnse oo’n Acker bei ehren Hause krein – janz umsunsten.“
“ Wurrnse awwer oo Wurt haln?“
„Janz jewiß, Rehoahn, janz jewiß.“
„Wissense, Kuhnert, das wullmer doch liewer schriftlich machen; mer weeß männichesmah nich, wie’s kimmet.“
E langetes Papier un Tinte un schrebb:
Hierdurch verpflichte ich mich, dem Barbier Rehahn hierselbst das hinter seinem Hause liegende Ackerstück unentgeltlich zu geben, wenn er mich von meiner Gesichtswassersucht heilt.
Alse fartich woar, lähtes Papier Kuhnerten zus Ungerschreim hen. Der lahses dorch un meente mißtrausch:
„Wullmer dach nich liewer ’n Dukter aus Wittenbarch kumm’n lahßen ?“
„Das hodd keen Zwack nich; ehmmer den rahne krein, isses ze schpät,“ sahte der Balwier.
„Na da bleiwet mich nischt annertes iwrij,“ meente Kuhnert un schrebb sein Namen ungern Schein.
E seifzte darbei awwer sehre tief, denns ’s wurren ahlen Jeizkragen schwer, sich vun’n Acker ze trennen.
„Awwer nu mache fix, dasses nich ze schpäte ward“, sahte zum Balwier.
Der hädde sich kringeln meejen vor Lachen, awwer er luhß sich nischt marken, packt ’n Schein wegg un sahde:
“ ’s ierschte is, Se missen jlei ins Bette un tichtig schwitzen.
Ich kumme jlei met un pakese in, damets oo richtig jemacht wurd.
Naher wollmer sähn, wassen mer weiter machen missen.“
E packte sein Kram zesammen, nahm Kuhnerten, der sich vor Angest kaum uff de Beene halen kunne, ungern Arm un schleppten hemе. Wiese nu zer Hofstiehre nin traten, da kam Minna, was de jroße Mahd war, außem Schtalle.
Alse nu saht, daß der Balwier ehren Herrn ahngeschleppt brachte un dasse sich kaum uff de Beene halen kunne, da fuhlse vor Schrecken der Emmer aus de Hand.
„Harrejeh!“ roffse, „was is denn passiert ?“
„Schtille Minna“, sahde Rehoahn, „Harr Kuhnert is krank jeworrn und muß jlei ins Bette.“
„Du mein Jott, e woar doch noch janz jesund, alse fuhrten furtjunk!“
„Ja sowas kimmet männichesmah rasch .“
„Isses gefährlich ?“
„Na, leicht is de Jeschichte nich, awwer ich denke, mer wärens schaffen, dasse bahle wedder jesund is, wenner meine Ahnordnungen jenau befolget. Brenge mich zeierscht mah warmes Wasser; ich wärn derweile ins Bette packen.“
E half Kuhnerten, der an alle Jlieder bewerte – weile sich vorsch Schtarwen forchte – aus de Sachen un schoben ins Bette.
Naher machten e Klistier, fiehlten ’n Buls, lähten e woarmen Umschlahk uffen Bauch un e kahlen uffs Jesichte un jaben e Bulwer in; e lähte no e Deckbett uffen druff, dasser tichtg schwitzen sulle. Nаh e poar Schtun’n wolle wedder nahsähn – un junk heeme.
Kuhnerts Justaf lak meischenschtille – e fiehlte sich schon ornlich derleichtert. ’s dauerte oo nich lange, da funke ahn ze schwitzen, un dadrewer schlufe in.
Als der Balwier nah drei Schtun’ne wedder nahfrahde,
da schlufe immer no janz feste.
E nahm’n Umschlahk vuns Jesichte und lähte sachtehen e neien druff – Kuhnert markte nischt, e schluf weiter.
„Mer sin iwern Barch“, sahde draußen ze Minnan, die’n ängestelich frahde.
„E hodd de Krisis iwerschtan’n.
De Jeschwulst is schon marklich zarrickjejangen. De warscht sähn, morgen isse wedder jesund. Awwer lassen mich nich ehrder uffschtehn, als bis ich dajewäsen bin, ’s kinnte sunsten e Rickfall intreten, un das wiere naher ville schlimmer. Minna, de mußt iwer Nacht bein bleiwen, de kannst dich jo uffs Sofa lähn.“
„Das will ich jarne tun, Harr Rehoahn. Ich will schon uffpassen, dasse keene Dummheeten macht.
’s is all jut, dassensen wedder so weit jebracht han.
Ich hawes jo immer jesahd: wemmer unse Balwier nich hädden, da wurre männiches schlimm wärn“.
Un daderbei wischte sich de treie Seele meten Scharzenzipel e poar Tränichen vun de Backe.
Kuhnert schluf de janze Nacht wien Ratz, un ’s woar schone häller Tak, alse munter wurre.
„Minna- Minna!“ roffe.
Minna kam fix geloffen.
„Wie schpäte hammersch?“
“ ’s hodd äm neine jeschloan.“
„So schpät schon?“
„Se darfen awwer nich uffschtehn,“ sahdese, wie e sich uffrichten tat, un drickten wedder uffs Kissen nedder.
„Ich jlowe, mir fählt joar nischt mehr; ich fiehle mich wie neijeborn.
Jibb mich doch emah e drehes Hemne, ich hawe jo keen drehen Faden mehr an Leiwe.“
„Nee, nee!“ roff Minna.
„Der Balwier hodds mich uff de Seele jebungn, ich sallse nich ehrder uffschtehn lahßen, bisse dajewäst is; ’s kinne sunsten e Rickfall intreten, un das wiere naher ville schlimmer.“
„Na, da will ich doch liewer lähn bleiwe, awwer hoffentlich bleiwet Rehoahn nich ze lange. – Awwer weeßte,“ meente nahner Weile,
„de kenntest mich emah ’n Schpiejel herjän.“
Minna wunnerte sich zwarschtens, wasse meten Schpiejel wolle, awwer se brachten.
Kuhnert nahmen Umschlahk vun de Schterne un bekukte sich. „Woarhaftg,“ roffe, „de Jeschwulst is wegg!
Das muß mern Dokter lahßen, e varschteht was. Ich häddes nich jedacht, daß ich so rasch darvun kummen wurre.“
Wie e sich no so bekukte, kam der Balwier zer Tiehre rin.
„Jott sei Dank!“ roffe, „met unse Patienten scheints jo besser ze jehn.“ „Freilich, Dokter, ich fiehle mich wedder sauwohl.“
„Na, da wullmer doch jlei emah nahsähn.“
Der Balwier fiehlten ’n Buls un schtrichen iwersch Jesichte.
„Hm,“ sahde, “ ’s Fiewer is wegg_un de Jeschwulst oo. –
Harr Kuhnert, ich jrateliere, se sin noch emah mets blaue Ooge darvun jekummen. ’s hädde schlimm abloofen kenn’n, denn met sone Jesichtswassersucht is nich ze schpaßen.
Wenn die ins Jeharne tritt, is keene Hilfe meeglich.
Se in zwarschtens wedder jesund un kennten uffschtehn, awwer ich
ratese doch, bis Mittak no lähn ze bleiwen – besser is besser.
Un nu ziehnse sich e drehes Hemne ahn, dasse sich nich derkälten. Iwerhaupt hietense sich vor Erkältunk;
Erkältunk is immer jefährlich, un de meerschten Krankheeten
riehren vun Erkältunk her.“
„Ich wills mich marken.“ – Er druckste e weilichen und sahde denn: „Awwer wissense, Rehrahn, daß meten Acker das woar dochen bischen iwereilt. Se han doch met mich keene sehre große Miehe jehodd, denn de Krankheet is fix vorbeijejangen, un da kenntense doch was forn Acker jän. Se solln for das Jeld krein, wasse mich jebotten han.“
„Ach nee, Herr Kuhnert, so hamer nich jewett.
Wenn ich nich jewäst wiere, da wiernse heite schon tot un uffen Freitak wurnse all schon bejram.
Na un was häddense denn da darvun?
’n Acker kinntense da oo nich metnäm.
Neе, Herr Kuhnert: een Mann, een Wurt, un was jeschrem’n is, das is jeschrem’n.“
Un so blebbs oo. –
Ins Dorf wolltense zworschtens nich recht ahn Kuhnerts Justafen seine Jesichtswassersucht jlom, weilmern doch vorher nischt ahngesähn hodde, awwer e varsicherte hok un teier, dassen sein Jesichte in Schpiejel schon so dick jewäsen wiere, wie ’n Vertelsmoaß, un der Balwier sahde das oo.
Heemlich freilich lachte sich eens, zemah wenn in sein scheen
Joarten schtund, dene sich hingersch Haus vun Kuhnerts
Justafen sein Acker ahngeläht hodde.
Richard Erfurth
*