Wer schpielt in de Lotterie, varliert sein Jeld e weeß nich wie,
das is un bleiwet e woahres Schprichwort.
Bei mich wenigstens isses so.
Ich hawe nu doch schon ville Joahre in de preißische Lotterie geschpielt – frieher nahm ich’s Los vun Keenigen un naher bei Messerschmidten in Wittenbarch – awer gewunnen hawe ich no nischt, heechstens daß ich ema metten Freilos raus koam.
Freilich, mer sall’n liewen Jott for alles danken, awer ’s hätte wurklich nischt geschadt, wenns e bißchen mehr gewesen wiere.
Na, wenigstens hawe ich mich ewer mein Jewinn nich ze argern brauchen, wie’s Muths Vettern jegangen is.
Un das will ich heite ma derzählen.
Wie mer wo weeß, is in de Schtadt Zerwest alle Joahre
ins Friehjoahr so um Fingsten rum e jroßer Färemarcht.
Da kummen denn de Bauern metsamst de Färezichter un Färehändler vun weit un breet hen, um Färe ze varkoofen un welche ze koofen, oo um welche ze tauschen.
„Wer Lust hot, ze tauschen, der hot oo Lust ze betriegen“,
sat e Schprichwort, un das gilt beis Färetauschen janz desonnersch. ’s is schon mänicher Bauer nahn Zerwester Marchte gezoken un hot sein jutes Färd jejen e annertes vartauscht, weil’n der jute ahle Braune uff emo nich mehr passen tat un e jarne ma was annertes han wolle.
Naher awer mußte insähn, daß das neie Färd, wassen der Färejude uffgeschwozt hotte un was na den seine Rede e woahres Prachtschtike sin solle, e janz arbarmeglicher Schinner un Krippensetzer woar, der var keen Wagen un keen Plug nich jehn wolle.
Bein Zerwester Färemarcht is nu oo allemah eene Lotterie.
De Jewinne hanse immer schon an Marchtake ausjeschtellt, darmet de Leite Lust krein, no de letzten Lose zu koofen.
Nee, was mer da oo alles jewinnen kann:
Färe, Wagen, landwurtschastliche Maschinen, Mewel, Glawiere, janse Zimmerinrichtungen un so allerhand Sachen, vun’s Jreetzte bis ins Kleenste, bis runger zus Schnupptuk un de Haarburschte. Freilich, de villen Nieten, die kreit mer nich ze sähn.
Wie nu Muths Vetter in Wittenbarch woar un bei sein Ziehjarrenfritzen sich e Päckchen „Pastorentowak“ metnähmen tat, da schwatzten der oo e Los vun de Zerwester Färelotterie uff.
„Man muß dem Glück die Hand bieten“, sate zun.
„Herr Muth, es wäre doch schön, wenn Sie vielleicht eine Zimmereinrichtung gewinnen täten. Wie würde sich da ihre Frau Gemahlin freuen!“
„Nee. Jerschtens hawe ich keene Frau Gemahlin, sondern bloß eene eenfache Frau“, sate Muth,
„un zweetens mak ich keene Zimmerinrichtung nich; ville liewer wäre mich eene vun de landwurtschaftlichen Maschinen, die kenne ich jut gebrauchen, un mer muß doch oo met de Zeit furtschreiten.“
„Da haben Sie recht“, meente der Ziehjarrenmann,
„und warum sollten Sie die nicht gewinnen? Man muß nur etwas wagen.
Also nehmen Sie ein Los. Passen Sie auf, Sie gewinnen.“
„Na, wenn se meenen, da kann ich’s jo ma varsuchen. Awer wie erfahre ich’s denn nu, wenn ich was jewinnen tue?“
„Ich kann Ihnen ja die Gewinnliste zuschicken. Die kostet allerdings zwanzig Pfennige. Oder Sie können die Liste etwa acht Tage nach der Ziehung bei mir einsehen. Das kostet natürlich nichts. Und Sie kommen doch öfter nach Wittenberg.“
„Jut, ich were de Liste bei Sie insehen.“
Muths Vetter berappte nu seine Mark forsch’s Los un schtektes in seine Jackenficke.
Wie e nu heeme kam, zeigtes seine Fraue.
„Was meenste, Martha“, sate, „wemmer so’ne landwurtschaftliche Maschine jewinnen täten?“
„Оh“ meente die, „e Glawier wiere mich liewer;
unse Jrete sall doch nu bahle bein Harrn Kanter Glawierschtun’n krein.“
„Quatsch!“ sate Muths Vetter argerlich.
„Wozu braucht die Glawier ze klimpern; se sall liewer in de Wurtschast met zupacken, des is for se dienlicher“
„Das derschtehste nich, Mann; das geheert heite zer Bildung.
Un unse Jrete sall doch nich etwan wie’n Takelehnerkind uffwachsen! Das willste doch wohl sälwer nich. Un se sall doch oo nich hinger Jetterts Jieselan zerrikeschtehn.
Die hot schon seit vorichtes Joahr bein Kanter Glawierschtunne.
De Jetterten tat sich ierscht an Sumtak wedder dicke darmet, was ehre Jiesela schon alles schpielen kinne; se kinne sogar schon auswenig schpiele: „Kommt ein Vogel geflogen“ „
„Na, der braucht ber be Jetrerten nich ierscht geflochen ze kummen, die hot schon sowieso e Vochel.“
„Du, das lasse awer jo nich heern.
Die jloowet doch wunner wie jescheit se is. Un desterwähn sall unse Mächen oo nich hinger der ehre zerricke schtehn, un desterwähn musse oo Glawierschpielen larnen.“
„Das sehe ich nu awer joar nich in“, sate Muth.
„Wenn Jetterts so iwerkandiedelt sin, da brauchens mir no lange nich nahzemachen. Unse Jrete sall liewer was Tichtiges in de Murtschaft larnen, wasse brauchen tut, wenn se sich ma varheirat’t, das is jescheiter.“
„Ja doch, Mann, das sall se jo oo. Awer desterwähn darf se doch ehre Bildung nich hingneansetzen. Un zu de Bildung geheert doch nu ema zundertalleweile, daß eene Glawier schpielen kann.
Un kuk e ma, Fardenand, ’s wierе doch sehre scheene, wemmer so alle beede awends nach de Arweet uffs Sofa sitzen un unse Mächen schpielt uns was uffen Glawier vor, wie meinswegen;
„Juter Mond, Du jehst so schtille“ oder dein Lieblingslied
„In scheensten Wiesenjrunde“ oder son recht scheenen Walzer.“ „Worum denn nich: Du bist varrickt mein Kind!“
ungerbrach se ehre Mann arjerlich.
„Heere du, mach mich nich fuchtig!“ roff Muths Mutter.
Muths Vetter awer lachte helleweg, e faßte seine Fraue um de Tallje, was bei der ehre Dickte joar nich so leicht woar, un sate:
„Mutter, mir sin do e poar putzige Leite. Da schtreiten mer uns nu um den Jewinn aus de Färelotterie un wissen iwerhoopt no nich, ab mer was jewinnen tun.“
„Hm“, meente de Muthen, „recht haste jo.
Awer wemmer e Glawier jewinnen tun, naher muß unse Jrete oo ’s
Glawierschpielen larnen; annersch tue ichs nich.“
„Na ja, awer ierscht missen mersch’s Glawier han, naher
kennen mer jo weiter driwer schprechen“, sate Muths Vetter.
„Awer jetzt muß ich ma in Schtalle nahsehn, ab der Knecht oo de Färe orndlich gefittert hot, denn wenmer nich sälwer iwerall is, da jehts nich. De weeßt doch, wies Schprichwurt sat:
„Des Harrn Ooge macht das Färd fett.“ „
Un dadermet junke aus de Schtowe.
Der Zerwester Färemarcht kam ran.
Muths Vetter wiere diesma jarne hengefoahren, awer ’s Jeld taten leed, un de Arweet uffs Feld drängete oo.
Desterwähn luß es bleim.
Awer e kunne kaum de Zeit erwarten, bis de Ziehung vun de Färelotterie jewesen woar.
Un wie e nu ins „Wittenbarcher Takeblatt“ las, daß de Jewinnliste ingetroffen wiere, da machte sich jlei ’n annerten Tak nin nach Wittenbarch.
Sein ierschter Jank war bein Ziehjarrenfritzen.
Kaum trate zu de Ladentiere nin, da koamen der schon entgegen.
„Ich gratuliere, Herr Muth“, sate, „Ihr Los hat gewonnen! Habe ich es Ihnen nicht gleich gesagt: Man mußdem Glüde die Hand bieten.“
Muth kriegte orndlich e Schreck.
„So… ich hawe wurklich jewunnen?“ schtotterte,
„Was hawe ich denn jewunnen?“
Der Ziehjarrenmann langete jlei de Jewinnliste un zeigete uff de Schtelle, wo Muths Vettern seine Nummer woar, un dahinger schtund:
„1 Haarb“.
„… E Haarb… e Haarb. Jo, wos sall denn das heeßen?“ frate.
„Ja, was das heißen soll, ist mir auch nicht ganz klar“,
meente der Annerte.
“ ’s ward doch nich etwan sone neimod’sche landwurtschaftliche Maschine sin?“ meente Muths Vetter, un darbei fiehlte, wien’s Hartze orndlich vor Freide kleppen tat.
„Hm, das wäre möglich“ sate der Ziehjarrenmann,
„in den Sachen kenne ich mich nicht aus. Aber weil es doch eine
landwirtschaftliche Veranstaltung ist, da kann es schon so was sein.
Das beste ist, Sie schicken das Los ein, dann bekommen Sie den Gewinn zugeschickt. Die Kosten werden Sie freilich tragen müssen.“
„Das sanse nu so hen; wenns nu doch sone Maschine is, denne kost mich das ze ville Fracht, un schließlich ward derbei uff de Eisenboahne oo no was rungeniert. Da isses besser, ich foahre metten Wagen nah Zerwest un hole se mich.“
„Da haben Sie nun wieder recht, Herr Muth. Und so eine Spazierfahrt nach Zerbst ist doch auch nicht zu verachten.“
Weil doch nu Muths Vetter zeigen wolle, dasse oo wurklich in de Lotterie jewunnen hätte, da koofte sich eene Jewinnliste, un der Ziehjarrenfritze ungerschtrichen seine Nummer dick metten Rotschtifte.
Zer Feier des Tates koofte sich oo no e halwes Dutzend Ziehjarren, denn for geweniglich roochte bloß de kortsche Feife, un bloß Sunntaks wenne in Jasthoff junk, schteckte sich eene Ziehjarre an.
E junk nu mets Los furt.
“ ’s is bloß jut“, dachte bei sich, „dasses keen Glawier is, sunsten wiere ich met meine Ahle jlei wedder in Schtreit jeraten vun wegen de Glawierschtunne for Jreten.
De Beeden weren freilich scheene kuken, denn se hotten doch uffen Glawier gerechnet.
Na, da will ich se zun Troste wenigstens was metnehmen.
E koofte bei Tengelmanns an Marchtplatz e Vurtelfund Kaffee un for
Jretchen eene Tafel Schotolade for zwanzig Fennige.
E schteckte beedes in de Ficke un junk nahn, „Schwarzen Bär“,
wo e immer ausschpannen tat, denn e meente, uffen Lotteriejewinn kinne sich schon e Jlas Bier leisten.
In de Jastschtowe trafe sein Freind Minklär aus Siejerähn.
„Nu“, sate der zun, „Fardenand, de machst jo heite son varjniegtes Jesichte.“
„Kann ich oo, Franz“, antwurte Muth, ,“ich hawe in de
Zerwester Färelotterie jewunnen.“
„Dunnerlittchen!“ roff Binklär.
„Da jrateliere ich oo. Ich bin met mein Lose durchgerutscht.
Was haste denn jewunnen?“
„Hm, das is em de Sache.“
Muth zok de Jewinnliste aus de Ficke un zeigete uff de ungerschtrichene Schtelle.
„E Haarb“ ... las Winklär.
„E Haarb – was is denn das forn Ding?“
„Das is mich em oo no e Rätsel. Ich denke mich awer, ’s kinne so was wie ’ne landwurtschaftliche Maschine sinп, so eene vun die neimod’schen, varschtehste, weils doch merschtenteels Jewinne sin, die met de Landwurtschaft was ze tun han.“
„Hm, das kinne amende schtimmen, awer e Haarb… e Haarb… putzig is das, mer weeß nich, was mer drauß machen soll. Awer desterwähn kannste immer een uff den Jewinn ausgän.“
Muths Vetter woar jo sunsten e bißchen knietschig, awer e wolle sich doch nich lumpen lassen, und so ließe denne for sich un sein Siejerähnschen Freind e poor Jlas Aktienbier inschenken un begoß metten ’n Lotteriejewinn.
Wie er nu heeme koam un in de Schtowe trat, da fraten Muths Mutter jlei: „Na, Voater, wie isses meet de Zerwester Lotterie? Haste was jewunnen?“
„Na allema, Mutter, hawe ich was gewunnen.“
„Was denn – was denn? – Docdh nich etwа e Glawier?“
„Glawier – Glawier – du met dei dämliches Glawier!
An was anertes denkste wohl joar nich mehr?“
Muths Vetter wurre argerlich; seine Fraue awer oo.
„Na, was haste denn jewunnen?“ satese,
„da sag’s mich doch jlei un laß mich ni ierscht zehnmal fran.“
„Ja, siehste, so genau kann ich dich das oo nich san“, antwurrte.
„Na, da schlak doch eener lank hen!“ roffse.
De hast jewunnen un weeßt nich was? Das muß doch in de Jewinnliste schtehn.“
“ ’s schteht oo drin – da kuk her.“
E zok de Liste aus de Javkenficke un zeigete uff de Schtelle metten Rotschtist.
„1 Haarb“, las se laut, „1 Haarb. Ja Mann, was is denn das, e Haarb?“
„Ja siehste, Frau, nu biste em so jescheit wie ich oo. Ich denke mich awer, dasses eene vun die neimod’sche landwurtschastlichen Maschinen is.“
„Hm, das denkste dich, weil de jarne eene han mechtest.
Jrete, komm doch ma her“, satese zu ehre Tochter, die gerade aus de Schule kam, ,“un lies ema, vas da schtehn tut.“
Jrete buschtawierte laut: „1 H-a-a-r-b«.
„G-a-a-r-b“, machtese ehre Voater nach,„H-a-a-r-b, das kann ich oo lesen, du Schoaf, awer de sallst mich san, was das is.“
Jrete zuckte met de Schullern un junk fort; se woar beleidigt, weilse ehre Voater e Schoaf geheeßen hotte.
„Ihr wißt alle beede oo joar nischt“, sate Muths Vetter jiftig.
„Da were ich doch ma zun Harrn Kanter gehn, der ward mich wo san kennen, was e Haarb is.“
„Das mache man“, meente seine Fraue, „de kannst de Frau Kantern oo jlei beschtellen, dag ich se morjen met Jretchen e poar Tauben schicken wolle. Da kann se sich mets Mittagessen druff inrichten.“
Wie nu Muth zun Harrn Kanter kam, da saß der gerade ans Glawier un schpielte ’n Badenweiler Marsch.
„Entschuldigen se, wenn ich schtere, Harr Kanter“, sate Muth.
„Ach wo – Sie stören nicht, Herr Muth“, antwurrte der un klappte ’s Glawier zu.
„Bitte, setzen Sie sich – bitte, hier aufs Sofa.“
„Lange will ich mich awer nich uffhaln. Ich wollese nämlich bloß ma was fran. Ich hawe nämlich in de Zerwester Färelotterie jewunnen.“
„Das freut mich, Herr Muth, da gratuliere ich.“
„Danke scheen, Harr Kanter.“
„Was haben Sie denn gewonnen, wenn man fragen darf?“
„Das isses em, worum ich zu se komme. Harr Kanter, kennen se mich san, was e Haarb is?“
Der Kanter kukten janz varwunnert an.
„Eine Haarb, Herr Muth?
Das Wort habe ich noch gar nicht gehört.“
„Awer so schtehts in de Jewinnliste, sehnse da.“
Muth zok de Liste aus de Ficke un zeigte uff de Schtelle.
Der Kanter las:
„1 Haarb. – Wahrhaftig, das steht da – komisch.
Aber warten Sie, das wollen wir gleich haben; wir brauchen bloß im Konversationslexikon nаchzusehen, wo alle Wörter drinstehen.“
Es schtund uff un langete ausen Biecherschranke e großes, dickes Buk.
E blätterte eene janse Weile drinnen rum, kunne awer nischt fingen.
„Das ist doch aber höchst sonderbar, Herr Muth, im Brockhaus steht das Wort nicht, obgleich doch darin alles steht. Ich weiß wirklich nicht, was ich mir unter dem Worte vorstellen soll.“
„Harr Kanter“, sate Muth, „ich hawe mich schon gedacht, ’s kinne amende wohl so’ne neimod’sch landwurtschaftliche Maschine sin, weil doch de Zerwester Färelotterie so’ne Art landwurtschaftliche Lotterie is un oo lauter Sachen varlost wern, die mer in de Landwurtschaft brauchen tut.“
„Das ist ein guter Gedanke, Herr Muth!“ roff der Kanter.
„Da können Sie recht haben. Das Wort ist wahrscheinlich verdruckt worden. Warten Sie mal: Haarb – das könnte Harke heißen; der Setzer hat wahrscheinlich beim Setzen die Buchstaben verwechselt.“
„Awer wie is denn sowas nur meglich, Harr Kanter?“
„Ach, das ist noch gar nichts. Man kann da die tollsten
Sachen erleben. Deswegen redet man ja auch vom Setzerteufel.“
„Na ja, der Deiwel muß schon seine Hand ins Schpiel han, wenn sowas vorkommen tut“, meente Muth.
„Nu jeht mich e Seefensieder uff: Eene Harke – eene Harke- das kann doch bloß eene Schleppharke sin, vor die mer’s Färd vorspannen tut.“
„Sicher ist’s das“, sate der Kanter, der froh war, for das Wort eene Deitung gefungen ze han.
„Das Einfachste ist, Sie schicken das Los ein, dann schickt man Ihnen
den Gewinn zu.“
„Neе, neе! Wenn’s wurklich sone jroße Harke is, da kimmt mich de Fracht uff de Boahne ze teier, un ’s kinne oo ungerwegs was dran kaput gehn. Desterwähn mechte ich liewer sälwer metten Wagen nah Zerwest foahren un das Ding holen.“
„Das würde ich an Ihrer Stelle auch machen, Herr Muth.
Solche Wagenfahrt jetzt im Frühling macht doch auch Spaß.
Wenn ich nicht Schule hätte, würde ich gleich mitkommen.“
„Awer unse Jrete kann ich doch wo metnehmen, Harr Kanter?“
„Gewiß, auf einen Tag kommt’s nicht an. Wann wollen Sie denn fahren?“
„Am liebsten jlei morgen, denn da hawe ich gerade Zeit.“
„Gut. Da wünsche ich Ihnen glückliche Reise und viel Vergnügen. Ihre Frau nehmen Sie doch auch mit?“
„Egentlich wollte ich das nich, denn die kann schlecht aus de Wurtschaft abkommen. Awer se han recht, Harr Kanter – e Tak musses schon ma jehn, un se sall oo еmа ehre Varjniejen han.“
„So ist’s recht, Herr Muth“, sate der Kanter un kloppten uff de Schuller.
„Also nochmals glückliche Fahrt und viel Vergnügen, und grüßen Sie bitte Frau Muth von uns.“
„Danke scheene, Harr Kanter. Ich salle jo oo vun se а scheenen Jruß beschtellen.“
Un dadermet junke furt.
Das vun de Tauben hotte awer vargessen.
Wie e nu heeme koam derzählte, dasse nu rausgefungen hätte, daß de Haarb eene Harke, und zwoarschtens eene jroße Schleppharte wirre, dasse awer ’n Kanter ierscht hätte uff’n Trichter bringen missen.
Muths Mutter un Jrete freiten sich mächtig, als der Voater sate, se wollten morjen alle Dreie metten Wagen nah Zerwest foahrn, um de Harke abzeholen.
An annerten Morjen schtunden se allehofe sehre zeitig uff.
De beeden Weiwessen zoken ehren Sunntaksschtaat an, un der Voater schpannte de beeden Fichse varn Letterwagen.
Om druff lähte e poar Bund Schtroh, wo de Beeden sich druffsetzen taten; e sälwer setzte sich in de Schoßkelle – un furt junks zu Dorfs naus un nah Zerwest länk hen.
’s woar schon bahle Mittak, wie se an de ierschten Heiser vun Zerwest koamen.
Se fuhrn de Dessauer un naher de Bahnhoffsschtroaße nunger un koamen uffen Marchtplatz, wo’s Rathaus schteht metten Rolande darvor, der e jroßen mächtigen Säwel in de rechte Hand hot un janz forchtsen aussieht.
Dichte darbei schteht uff ’ner hoken Seile no eene annerte varjoldete Figur; de Butterjumfer sahn se zu se.
Se derzähIn vun se:
’s mirre e junkes Mächen aus Zerwest jewähsen, die hätte e Jrasen vun Lindau, der dunnemals der Harr iwer de Schtadt Zerwest woar un de Bauern met ehre Butter un Eier nich in de Schtadt rin lassen wolle, ehre janses Jeld gegäm, dasse de Bauern rin lassen täte.
Desterwähn han de Zerwester for se das Denkmal gesetzt, un das Ding, was se in de Hand hot, das sall ehren Jeldbeitel vorschtellen. Jrete schparrte Maul un Noase uff, denn se woar no in keene annerte Schtadt gewäsen, wie bloy in Wittenbarch.
„Voater, kuk mal“ roffse, „das joldene Mädchen da uff de hoke Seile!“
„Das is de Butterjumfer“, sate ehre Boater.
„De Butterjumfer“, meente Jrete, „och, die hot wohl immer so scheene Butter gemacht, un desterwähn hanse ehr wohl das Denkmal gesetzt?“
“ ’s kann schon sin“, anwurrte Muth.
“ ’s hots mich ma eener erkläret, wie ich in Zerwest zun Färemarcht woar, awer das is schon e poar Joahre her, un genau weeß ich das nich mehr. Awer met de Butter hungs zesammen. ’s ward wohl so sin, wie de gesat hast.“
Jrete awer meente:
„Da muß unse Mutter oo e Dentmal krein, denn die macht doch oo scheene Butter.“
„Das kann jo no wern“, sate der Voater un lachte, un de Mutter lachte oo.
Weilse nu alle Dreie vun de lanke Foahrt Hunger un Dorscht gekriegt hotten, da hult der Voater vorn Jasthoff „Zum goldnen Löwen“ an un se junken in de Jastschtowe nin.
„Was wollmer denne essen?“ frate de Muthen.
„Na, wemer in Zerwest is“, sate Muths Voater,
„da ißt mer natierlich eene Brägenwurscht un trinkt darzu
Jlas Zerwester Bitterbier.
Heite salls mich ma nich druff ankummen.“
E beschtellte oo wurklich drei Brägenwürschte un zwee Jlas Bitterbier.
„Das Zeik schmeckt“, sate Jrete un haute mächtig dermang, un ehre Eltern schmecktes oo.
„Mer wolln uns awer nich lange uffhaln“, meente der Voater, wiese gegessen un getrunken hotten, „ierscht wollmer ’s Jeschäft abmachen. Naher kennen mer jo no in eene Kanditerei eene Tasse Kaffee trinken un e Schtickchen Torte essen, un Ihr kennt Eich oo e bischen de Schtadt ansähn.“
E bezahlte ’n Kellnär un fraten, wo’s die Jewinne vun de Färelotterie jewen täte.
Der saten Bescheed un meente: ,
„Ach, Sie haben wohl gewonnen?“
„Freilich“, antwurrte Muths Vetter un tat janz schtolz, wie e das sate.
„Da gratuliere ich auch“, sate der Kellnär.
E dachte, nu würre e jroßes Trinkgeld krein, awer da hotte sich jeschnitten.
De Dreie schteken nu allehofe wedder nuff uffen Wagen un fuhrn hen bis vorsch’s Haus, wo’s de Jewinne vun de Färelotterie jäm tat.
Der Voater junk nin, un de Mutter un Jretchen schteken runger vun ehre Schtrohbunde, um beis Uffladen vun de Maschine met ze helfen.
Ins Komtor drinne saß e Mann hingern Schreibtische.
„Sie wünschen?“ frate.
„Ich wolle mein Jewinn aus de Lotterie abholn“, antwurrte Muth un lätes Los uffen Tisch.
Der Lotteriemann kukte sich de Nummer vuns Los an un suchte in de Gewinnliste.
Dadruff junke furt un kam nah ne Weile zerrick met e Pappkästchen in de Hand, ’s wohl wohl e bißchen iwern Finger lank un zwee Finger breet.
E lätes for Muths Vettern hen un sate:
„So, bitte, hier ist Ihr Gewinn.“
Der awer schtund da wie vun Dunner jeriehrt, un’s woarn, wie wenn sich de janse Schtowe um’n drehen tat.
„Wа – was sall das sin?“ schtotterte.
„Nun Ihr Gewinn – eine Haarbürste“, sate der Lotteriemann.
„Awer – awer in de Liste schteht doch was annertes, da schteht doch:
e Haarb.“
Der Annerte lachte helleweg:
„Nun ja“, sate, „eine Haarbürste. Da lesen Sie doch!“
Und darmet hulte Muthen de Jewinnliste hen.
„Der Drucker hat das Wort nur abgekürzt und allerdings den Punkt dahinter vergessen. Sie hatten sich wohl etwas anderes darunter vorgestellt?“
Muths Vettern woarsch, als sille in de Erde varsinken.
„Freilich – allema“, schtotterte, „ich hawe mich jedacht, ’s miere so ne neimod’sche landwurtschaftliche Maschine.“
Der Mann lachte wedder un meente:
„Das tut mir ja leid, daß Sie sich getäuscht haben. Na, vielleicht gelingt’s Ihnen ein andermal.“
Un darmet drickten ’s Kästchen in de Hand.
Muths Vetter wußte nich, wie e aus de Schtowe naus koam.
Draußen koamen jlei de beeden Weiwessen entgegen. ,
„Na, wo haste denn de Maschine?“ frate Muths Mutter.
„Da hastese!“ roff Muth wietend un warfse ’s Kästchen var de Beene, daß jlei der Dekel uffschsprang un de Haarburschte uffs Flaster flog. „Awer, Mann“, sate de Muthen janz derschrocken,
„das is doch keene Maschine nich, das is doch bloß eene Haarburschte.“
„Jawohl, das is de Haarb – de Haarburschte – so sall das nämlich in de Jewinnliste heeßen, wennersch no nich wissen tut. Nee, sone Betriegerbande! Da lassense een ierscht den weiten Weg machen un in Jeldkosten schturzen un e jansen Tat varseimen!
Nee sowas, sowas!“
Jretchen hotte de Burschte uffgehom un bekuktese sich.
„Weeßte, Voater“, meentese, „so’n Ding krein mer in Wittenberch bei Clauß un Schretern for fufzig Fennige.
Desterwähn brauchten mer nich na Zerwest ze foahrn.“
„Na fang du oo no an, du Jrienschnawel!“, fuhrsche der Voater an.
„Jetzt hatter alle ’s jroße Maul, awer de Jewinnliste kunne keens richtig lesen, nich ema der Kanter, der doch immer wunner wie gescheit sin will. Nee, sone Blamasche! Sats bloß keenen Menschen, se lachen uns alle aus.“
„Awer, Voater“, sate Muths Mutter, „de hasts doch sälwer nich gewußt, was das bedeiten sille: e Haarb“
„Schtille bist de!“ roff Muth argerlich.
Un nu vorwärts nuff uffen Wagen, daß mer heeme kumm’n!“
De Muthen kletterte nuff un setzte sich mucksmeischenschtille uff ehre Schtrohbund; se wußte, daß met ehre Fardenand nischt anzefangen woar, wenn e fuchtig woar.
Jrete awer sate weenerlich:
„Ich denke, mer wollten ierscht no in de Kanditerei?“
„Soo – oo no kanditern na soner Pleite!“ roff ehre Voater.
„Nischt jiwets!“
Un dadermet zoke ’n Fichsen eens met de Peitsche ewer, dasse hok jungen un wie varrickt dorch de Schtroaße rannten.
Sone Behandlung woarnse vun ehre Harrn joar nich gewehnt.
Jrete un ehre Mutter huppten uff de Schtrohbunde hok un mußten sich festhaln, dasse nich runger flogen,
Wiese nu an’s Dorf ran koamen, da kriegten de armen Fichse wedder eens met de Peitsche, dasse rennen taten haste was kannste , bloß darmet keener Muths Vettern anhalen un vun wegen de jewunnene Maschine fran kinne.
De nähste Zeit woar bei Muths Vettern schlechtes Wetter, un se junken alle an liewesten ausen Wege.
Un der Harr Kanter, der ’n annerten Tak koam un sich de neie Maschine besähn wolle, kriegtes knippeldicke, un se woarn alle beede eene janse Zeit tiksch mettenanner.
Awer zeletzt läte sich der Schtorm.
Un Muths Vetter mußte sich ze helfen.
Wenn eener fran tat, wo e de Haarb hätte un was das eejentlich varn Ding wiere, da sate:
„Ach, das woar sone neimod’iche Maschine, die unsereens joar nich gebrauchen kann, un da hawe ich mich liewer ’s Geld darvor gän lassen.“
Richard Erfurth
aus: Unser Heimatland vom 24.08.1935
***