’s jeht doch nischt iwerne frohe, jlickliche Jugend.
Un wenns een schpäter oo no se dreckig jeht, un wemmer oo no so ahlt ward un villes varjißt, was een in Läm passiert is – de Arinnerung an de scheene Jugendzeit bleiwet, unse is wien heller Schtarn in dunkrer Nacht, wie frischer Trunk in heeßen Summer un wie son warmes Kleed in koahlen Winter.
„Wohl den, der seine Jugend jarne jedenket“,
so schtehts schon in de Biewel geschrem’n, un das muß all woahr sin.
Nu is awwer ’s Jugendläm nurgends scheener wie uffs Dorf, un mich han schon immer de armen Kinner leed jetan, die ehre Jugend in de Schtadt zwischen den hoken koahlen Heisern zubreng’n missen, wuse männichesmah nich emah een Hoff zus Schpielen han, un wennse een han, da isse so muffig un so enge, daß nich emah de liewe Sunne nin scheinen kann.
Un kummense uff de Schtroaße, da schtiehnse in Jefoahr, totjefoahrn ze wern oder ’n Schupo in de Hände ze foalln, der an jede Schtroaßenecke schteht unse bei jeden unschulligen Schtreech an Kragen nimmt.
Da läm doch unse Jungens un Mächens uffs Dorf ville freier un įlicklicher.
Ich hawe oo’s Jlicke gehadd uffs Dorf uffzewachsen, un desterwähn will ich emah aus meine Jugendzeit was derzähle.
Unse Harr Paster hodds uns in de Kumfermandenschtunne derklärt, worum Luther janz recht hodd, wenne in Katechismus bei de vierte Bitte zus täkliche Brot oo de jetreien Freinde, Nachbarn und desgleichen zählt, un worum das vorsch Dorf janz besunnersch jilt, weil mer da ville mehr als in de Schtadt uffen Nachbar ahnjewiesen is.
Wir hoddens Jlick, son recht juten Freind und treien Nachbar ze han. E huß Jottlieb Schuwert, awwer ins janze Dorf hußensen „Dragoner Jottlieb“, weile in Schmiddebarch bei de Dragoner jedient hodde, wiese no dort schtun’u, un jarne vun seine Soldatenzeit derzählte.
E hodde oo ’n Krieg vun 1870 metjemacht, un wenne darvun derzählen tat, mußte mer wurklich jlom, daß de Deitschen ’n Krieg bloß jewunn’n hodden, weil Dragoner Jottlieb metvdarbei jewäsen woar, un de jroße Schlacht vun Jrafelotte ,wiere janz sicher varlorn jejangen, wenn Jottlieb nich so kräftig dermank jehaun hädde.
E woar sunsten een jutmietijer Mensch, awwer e kunne fuchsteiwelswild wern, wenn eener seine Heldentaten ahnzweifeln wolle.
Wir Kinner jloweten alles un heerten janz ahndächtig zu, wenn derzählen tat, wie e den jewaltigen Max Mahon varhaun un seine Mitralljösen erowert hodde.
Was das ejentlich for Dinger woarn, kunnten mer uns zwoarschtens nich recht vorschtelln, awwer nach Jottliew’n seine Rede mußten das janz schrecklich jroße Kanonen jewäsen sin, weilse jlei eene halwe Schwadderon uff emah nedderfegeten.
De „dicke Berta“ in Weltkriege kann darjejen bloß’n Kinnerschpiel jewäsen sin.
Un weil mer nu immer so ahndächtig zuheerten un sahten, wenne uffheeren wolle:
„Onkel Jottlieb, derzähle doch weiter“, da woarn mer seine Freinde.
Un wenne nah Wittenbarch junk, was efftersch vorkam, da brachte uns immer was met.
Weil ich nu seine Pate woar, da krichte ich immer was Extraes.
Meine annerten Jeschwister woarn freilich dadrewer neidisch, un ich hawe desterwähn männichen heemlichen Puff vunde inschteecken missen.
Awwer desterwähn hodden mer uns doch sehre lieb, un heite, wo uns das Läm außenanner jerissen hodd – unse Bruder Artur is all schon ville Jahre tot – da wiere ich jlicklich, wemmer uns no emah so wie als Kinner puffen kennten.
Besunnersch ze Weihnachten zok Onkel Jottlieb – so huße bei uns – de Schpendierhosen ahn.
E frahde uns vorher immer, was mer uns bein Weihnachtsmann beschtellt hodden, un der brachte uns dann oo merschtenteels was mer uns winschen taten.
Jedesmah awwer schtunden ungern Christboome neie Bleisoldaten, un da setzte sich Onkel Jottlieb zu uns un schpielte met uns de Schlacht vun Jraselotte.
E luhß sichs oo nich nähmen, jedes Joahr bei uns ’n Weihnachtsmann ze machen.
Kortsch varn Heiligenoawend frahde der ahn, ob mir Kinner oo artig jewesen wieren.
Var jewehnlich kame ’n Sunntag vorsch Fest.
Mir Kinner soaßen in de Schtowe un sungen de Weihnachtslieder, die mer in de Schule jelarnt hodden.
’s dunkerte schon, un de Lampe schtak unse schpoarsame Mutter nich ehrter ahn, als bissese sälwer neetig brauchte.
Uff emah schluhks meeter Rute an de Tiehre.
Mer fuhren alle derschrocken zesamm’n, denn mer wußtens janz jenau: das woar der Weihnachtsmann!
De Tiehre wurre vun draußen een bischen uffgemacht, un eene tiefe Baßschtimme frahde:
„Sind die Kinder auch artig?“
„Ja,“ kams ängstlich vun unse Lippen.
„Könnt ihr beten?“ frahde de Schtimme wedder.
Mer pufften uns heemlich, denn keens wolle zeierscht ahnfangen.
„Na,“ klungs vun de Tiehre her, „da betet doch mal!“
un e Schlak met de Besenrute ungerschtitzte den Befehl.
’s Jepusse junk wedder los, bis endlich unse Schwester Ida, die immer sehre beharzt war, ahnfunk:
Liewer juter Weihnachtsmann,
sieh mich nich so beese an,
schtecke deine Rute ein,
will auch immer artig sein.
“ ’s is jut“, antwurrte de Baßschtimme.
„Nun bleiwet immer hibsch brav, damit eich der heilige Christ auch was scheenes bringt.“
Daß der Weihnachtsmann son wunnerbares Jemische vun Hochdeitsch un Elbauendeitsch schwatzte, das ful uns in unse Angest weiter joar nich uff.
De Tiehre wurre no e bischen weiter uffjemacht, un dorchen Schpalt kam eene Hand, die Äppel, Nisse un Zuckerzeik in de Schtowe woarf.
Jerscht schtuzten mer no, abbe nich doch no rin kieme, denn unse Mutter hoddes uns estersch derzählt, daß der Weihnachtsmann männichesmah in de Schtowe kieme un unartge Kinner varhauen täte – na un son reenes Jewissen hodden mer jo allehofe nich. Jerscht jestern hodde ich vun Werfelzucker in Jlasschranke jenascht, un de Mutter, die mich darbei derwischte, hodde jesahd: „Na warte, das sahe ich ’n Weihnachtsmann.“
Absessen wurklich jesahd hodde? – Mir wurre bei den Jedanken janz schwummerlich zemute.
Awwer de Schtomstiehre wurre zujemacht, de Haustiehre junk, un draußen tappstes furt.
Jott sei Dank!
De Mutter hodden also nischt jesahd.
Du jute Mutter! wie oft haste unse dummen Schtreeche meten Mantel deiner jroßen Liewe zujedeckt un jeschwiegen, oo jejen ’n Voater, bei den de Hand un der Schtock merschtenteels recht locker saßen.
Wie mer nu sicher woarn, haste nich jesähn, da junks ungern Tisch, de Schtiehle, ungersch Sofa, ungern Schrank nah de Harrlichkeeten, die der Weihnachtsmann rinjeschmissen hodde‘.
An manche Äppel un Nisse jlänzte sojar schon Jold un Silwer, alsen Vorjeschmack vun de joldige Weihnachtszeit.
Awwer markwurdj – jedesmah kortsch nahn Varschwinden vun Weihnachtsmann da junk de Schtomstiehre wedder, un rin kam unse, liewer Onkel Jottlieb.
E tat janz varwunnert, als mern derzählten, dassen der Weihnachtsmann da jewesen wiere un wasse uns metjebracht hodde.
In unse Eifer markten mer joar nich, daß Onkel Jottlieb darbei so schelmisch lächelte.
Nu ruhst du liewer juter Freind oo schon lange uffn Jottesacker näm unse kleene ahle Kerche, wu de immer Sunntaks so laut singen tatest, daß de sogar de ahle quietschije Urjel iwerteentest – „scheene nich, awwer laut“, sahde unse Harr Kanter immer, der sich dadrewer arjern tat.
Unse Mutter wolles immer nich leiden, dassen uns Onkel Jottlieb beschenken tat – se meente, mer würren varwehnt.
„Jevattern, laß mich doch mein Schpoaß,“ sahde da jedesmah,
„ich hawe doch keen’n, den ich eene Freede machen kann.
Un ab nu meine Arwen e poar Taler mehr oder wenniger krein, das ward sich wohl įlei bleiwen.“
Un darbei schtrich e‘ uns iwer unse Wutschelkeppe.
Unse Mutter suchtes jo wedder įlei ze machen, un wennse was Jutes gebacken oder jekocht hodde, da wurre Onkel Jottlieb injeladen, un e kam jarne.
Ich jlowe, unse jute Mutter trogg sich met ’ne schtille Hoffnung for ehre Kinner:
Dragoner Jottlieb woar nicht varheirad.
E fiehrte seine Wurtschaft, die jut inschtanne woar, met zwee Mähden un een Knechte.
De „ahle Miene“, die schon bei seine Eltern jedient un Jottliem met jroßjezochen hodde, wuschen un kochten, so jut wieses varschtund.
E hodde sich wie e no junk woar arnsthaft met Heiratsjedanken jetrahn.
Eene lanke Zeit woare met Miller-Jretchen jejangen, awwer wie nu e junker, recht schneidiger Kanter in unse Dorf kam un sich umse bemiehte, da luhße Jottliem sitzen un nahmen Kanter, weilse meente, da brauchtese nich so ze arweeten, denn de Arweet hoddese nich derfungn.
Der arme Jottlieb awwer hodde sich de Jeschichte so ze Harzen genummen, dasse seit der Zeit keen Weiwessen mehr ankukte un leddig blebb.
Un weile keene nähern Varwandten hodde, da jlowete nu unse Mutter, dasse in sein Testemente ehre Kinner, ze weniggsten mich seine Pate, bedenken würre.
Nu woar das awwer sone Sache;
Jottlieb woar nämlich nich darzu zu bewäjen, e Testement ze machen.
E woar e bischen awerjleibsch wie ville Bauern un doachte, wenne ierscht ’s Testement jemacht hädde, naher müßte bahle schtarwen. Un wenn ’n nu unse Mutter zusetzte, e salle doch um Läms un Starwens halwer ‚e Testement machen lahßen, dadermet daß seine Arwen sich nich nah sein Tode schtreiten un zanken täten, da sahde jedesmah:
„Recht haste, Gevattern, awwer das hodd jo no Zeit, denn ich will doch no nich schtarwen!“
Un darbei blebbe, un wenn ’n unse Muttervoo no so ville Jeschichten derzählte vun Leiten, die in ehre besten Joahren un janz pletzlich jeschtorben wieren.
Un so wurres denn o met Onkel Jottliem.
E hodde in Harwest eene Fuhre Holz vun de Heede jeholt un woar darbei in e Ränewetter jekumm’n.
Darbei hodde sich derkält, un dadraus woar eene Lungenentzindung jeworrn.
Un wie e endlich ’n Dokter aus Wittenbarch kummen luhß, da woarsch all ze schpete, un nahn poar Taken woar unse jute Onkel Jottlieb tot.
Mer hanallehofe sehre um ’n jeweent, denn mer hodden wurklich alle vun Harzen lieb.
Wies unse Mutter vorausgesahd hodde, so wurres oo:
Weil keen Testement da woar, ferieten sich de Arwen – ’s woaren lauter Varwandte, die sich bei Läbzeiten nich um Jottliem jekimmert hodden – beis Teelen mächtig in de Hoare, un weilse nich eenig wurren, da wurre de scheene Wurtschaft zerschlahn un verkooft.
Ich met meine Jeschwister awwer junken leer aus.
Unse Mutter woar dadrewer sehre arjerlich un machte ehren Harzen Luft met die Worte:
„Ich hawes den ahlen Esel doch immer gesahd, e salle e Testement machen, awwer e hodd nich uff mich geheert.
Nu hammer de Bescheerunk.“
Dadermet kambse awwer bei unse Voater scheeb an.
„So darffste nich vun Jottliem schprechen“, sahde
“ ’s woar e juter, liewer Nachber. Na ja, e hodde seine Eejenheeten – awwer die hodd e jeder.
Un mer hoden doch jar keen Anschpruch druff, vun was ze arwen. Mer sin doch bis jetzt ohne Hilfe vun annerten fartig jeworren, un mer wärn wohl oo vun alleeneweiter kumm’n.
Un wemmer unse Kinner oo keene jroßen Reichtiemer hingerlahsen kenn’n, desterwähn wärnse ehre Furtkomm’n oo fingen.
„Na ja,“ meentese, „de hast jo Recht, awwer hibsch wires jewäsen, wenn e weniggsten seine Pate e poar nundert Taler varmacht hädde.“
Freilich hibsch wiere das jewäsen, das hawe ich mich männichesmah oo jesahd, wenns bei mich schpäter mah knapp harjunk.
Desterwähn sin mern Onkel Jottliem nich jram jewesen, mer han sein Ahndenken immer in Ehren gehaln un sein Jrab jefleget, weil sich de reichen Arwen nich drum bekimmerten. –
Hingen in sein Joarten hodde Dragoner Jottlieb eene ahle Scheine; e brauchtese bloß no, um Schtroh ungerzebrengen, denn vorne hodde sein Hoff met eene neie Scheine zujebaut.
De Joartenscheine woar bei uns Kinner sehre beliewet, denn da drinne luhß sichs so scheene Varschteckens schpielen.
Se woar nich sehre hok un hodde no e Schtrohdach.
Dichte dernähm schtund e krummer Appelboom, jerade als wieres eene Bricke, die uffs Schtrohdach fierte.
Mer hanse oo fleißig benutzt un rutschten uffs Dach nuf un runger, jrawelten uffen Dachfärschten länk hen, dasses nur sone Oart hodde.
Dragoner Jottlieb wolle freilich nischt vun unse Varjniegen wissen, weilsen sein Schtrohdach rungenierte, un wenne uns darbei derwischen tat, da jabs was raus, denn da varschtunde keen Schpaß nich, un wu der Dragoner vun Jrafelotte henschluk, da blebben blaue Flecke.
Wemmern dadrum beis Dachrutschen kummen heerten, da hußes:
Rette sich wer kann!
EEnes scheenen Sunntaks nahmittaks machten mer wedder allehofe uffs Scheinedach unse Rutsch- un Kletterpartie, un dasses darbei nich ohne Lärm abjunk varschteht sich vun sälwer.
Uff emah junk de Joartentiehre uff, un Dragoner Jottlieb erschien meten Schtocke in de Hand.
Haste nich jesähn rutschten de annerten ’s Schtrohdach länk runger un rissen aus.
Weil ich nu awwer jerade oom uffn Dachfurschten jeritten hodde, da kunne ich nich so fix hingerhär.
Jlicklicherweise bemarkte ich awwer e Loch ins Schtrohdach un heidi krauchte ich dorch un plumste uffs Schtroh, was ungern Dache lak, un varschteckte mich hinger e paar Schtrohbunde.
Eene Weile blebb ich janz schtill lähn, bis ich de Joartentiehre wedder jehn heerte – Onkel Jottlieb woar wedder furt.
Ich jrawelte mich aus Schtroh raus, un wie ich mich umkukte, da sahk ich nich weit vun mich was Weißes schimmern.
Als ichs nächer ungersuchte, da woarns zehn scheene weiße Eier, die sone eejensinnige Henne heemlich hieher jeläht hodde.
Ich nahm de Eier, schtektese in meine Ficken un kletterte dorch de Luke uns Schtrohdach runger.
Awwer was sollte ich nu meten Eiern machen?
Unse Mutter durfte ich se nich brengen, die nahm nischt ahn, wasse nich zukam.
„Ein fremdes Ei macht een jroß Jeschrei“ woar ehre Schprichwort.
Un vullens wenns vun Nachbar Jottliem was woar, da ierscht recht nich.
Un Onkel Jottliem kunne ich de Eier doch oo nich jän, der wurre frahn:
„Was haste in meine Scheine ze suchen?“
Pletzlich ful mich was in: ich wolle met meine Kameraden e Eierfest verahnschtalten.
Draußen vorsch Dorf woarn Wiesen, un uff de Seite, wu der Kolk woar, schtann’n Weiden.
Wemmer da in Harwest nahs Jrummetmachen de Kiehe hieten mußten, da machten mer uns immer e Feier ahn, un in de heeße Asche woarfen mer Kartoffeln, die mer uns vuns Feld mauseten, un die desterwähn besunners jut schmeckten, wennse oo halb varbrannt woarn.
An de Schtelle salles Eierfest sin, denn da hodden mer jlei Wasser un Holz zus Eierkochen.
Ich suchte nu de annerten; se schtaken hingern Zaun un kukten, abben Dragoner Jottlieb oo wurklich furtjegangen wiere un nich etwa no hinger der Joartentiehre schtünne.
Ich zeigtese, was ich in de Scheine gefungen hodde un machtese ’n Vorschlak vun wejen Eierschmaus.
Se woarn oo allehofe įlei darmet invarschtann’n.
Bettgersch Harmann darbot sich, Topp un Schtreichhelzer ze besorgen, un Hackemessersch Emil wolles Sahlz un Brot vun derheeme metbrengen.
’s dauerte oo joar nich lange, da woarn mer alle finnewe met allens was neetig woar draußen bei de Weiden an Kolke varsammelt.
Nu schleppten mer Schteene un Holz zesamm’n, schtachens Feier ahn un setzten Topp mets Wasser drewer.
Wie nus Wasser kochen tat, lähte ich de Eier nin un zählte:
eens, zwee, dreie, viere – wie ichs bei unse Mutter jesähn hodde, wennse Eier kochen tat.
’s funk schon an ze dunkern, un mer kunnten de Zeit kaum derwahrten, bis de Eier jekocht woarn.
Bis neinunsechzig woar ich mets Zählen all jekumm’n – da roff uff emah eene Schtimme:
„Da soll doch jlein Dunnerwetter nin schlan, ihr Schpitzbuwen!“
„Der Keiler! der Keiler!“ schreken alle un loffen, wasse loofen kunn’n un varkriemelten sich zwischen de Schtreicher.
Hinger de Weiden kam der Feldhieter vor, den mer Keiler hußen – worum weeß ich nich, denn eejentlich huße Zwiesigk.
Ich kunne nich so fix loofen wie de annerten, weil ich no de Hälfte Eier in de Hosenficke hodde.
Awwer derwischen salle mich der Keiler doch nich.
Jlicklicherweise schtund janz in der Nähe eene holle Weide, in die zwängte ich mich nin.
Ich kunne nu sähn, wie der Keiler an Topp rahntrat, un wie e iwersch janse Jesicht lachte, alse de scheenen Eier drin sahk.
E fischte eens raus un schältes ab, un weils jut woar, setzte sich nedder, langetes Brot un Sahlz ran un funk so recht jemietlich ahn ze schmausen.
Un dadermets besser rutschen salle, da zoke seine Schnapsflasche raus, die e immer in seine Rockficke hodde – weilsen efter schlecht wiere, wie e sahde, un nahm e tichtgen Schluck.
Wie ich nu sahk, dassen unse scheenen Eier, uff die mer uns so jefreit hodden, in unrechten Magen kummen sullten, da packte mich de Wut, un mich fuhr der Jedanke dorchem Kopp ’n Keiler ze derschrecken, denn furchtsen woare, das wußte ich.
Wie e nu nahn zweeten Ei langete, da varschtellte ich meine Schtimme un roff so recht tief:
„Unrecht Jut jedeihet nich!“
Aus de holle Weide klung das jewiß recht jeisterhaft.
Der Keiler luhß vor Schreck ’s Ei wedder in Topp nin fallen un kukte sich janz varschteert um.
Weile awwer keen sahk, da schiddelte metten Kopp un sahde ze sich sälwer: ,
„Dummheet – ’s is nischt.“
E bickte sich, um de Eier außen Topp zu langen.
Da klungs wedder wie außen Jrawe:
„Unrecht Jut jedeihet nich!“
Das woarn awwer doch ze ville – e jriff nach sein Schtocke un murmelte ängstelich:
„Alle juten Jeister lowen Jott den Harrn!“
De Eier awwer wolle nich in Schtich lahßen un jriff darnach.
Awwer jlei klungs zus drittemah no ville lauter un jeisterhafter: „Unrecht Jut jedeihet nich!
„Au!“ schreck der Keiler, denn e woar vor Schrecken met de Hand ins kochende Wasser gefoahrn, un wieese zarrickzok, da schtieße an Topp, der kippte vun de Schteene runger, uns Wasser metsamst de Eier loff ins Feier.
Das zischte un qualmte, un de Funken schtieweten umher.
Der Keiler jlowete jewiß, daß eene Jeisterhand ’n Topp rungergeschtoßen hädde, denn e sahde noch emah janz laut:
„Alle juten Jeister lowen Jott den Harrn!“
un ohne sich no emah umzusähn rannte furt so geschwinde met seine krummen Beene kunne.
’s sahk ze schpaßig aus, un ich mußte hellewegg lachen.
Ich krauchte nu aus de Weide raus, um de Eier, die in de Asche gekullert woarn, ze retten.
Uff emah markte ich, wie mer was Nasses de Hosenbeene länk runger loff.
Ach harre jeh! wie ich mich ‚dorch das Loch in de Weide zwängete, da hodde ich de Eier zarquetscht, un die hodden nu Beene jekricht. Ich fuhr mete Hand in de Hosenficke – da drinne woarsch scheenste Riehrei met Eterschalen.
Rasch krempeltch de Ficke um, schitte de janse Mengänke raus un wischtes Fickenfutter met Jras ab.
Awwer feicht un jlitschrig blebbs doch, un wie ich ’n Hemmnezippel besahk, da woar der oo janz jäl, dassen mer bahle was annertes denken kunne.
Unse Mutter muß das wohl oo jedacht han, denn wiese bei de Wäsche mein Hemmne in de Hand krichte, da zeigtese ufffn jälen Zippel un drohte mich meten Finger.
Se sahde awwer nischt, weil der Voater in der Nähe woar – un ich sahde oo nischt.
Rausjekumm’n is de Jeschichte oo nich, denn varraten tat keener vun meine Kameraden was.
Un der Keiler hodd oo nischt jesahd; e schämte sich doch wohl, dasse son Hasenfuß jewäsen woar.
Ierscht ville schpäter hawe ich meine Mutter vun das varunjlickte Eierfest derzählt.
Da lachtese ierscht, naher awwer sahdese arnst:
„Da siehste wedder, mein Junge, daß das Schprichwort doch woahr is:
„Unrecht Jut jedeihet nich.“