Jeder weeßes, daß in Wittenbarch Mittwochs un Sunnoawends Marchtak is.
Frieher woar der Marcht immer uffen Marchtplatze vorsch Rathaus, awwer weil das nu umgebaut is, da hansen nahn Arsinalplatz varläht. Na un da warde wohl nu oo bleiwen, wenns oo de Jeschäftsleite an Marchtplatze nich jefällt.
Freilich Luther und Melanchthon, die nu janz alleene uffen Marchtplatze schtehn tun, wern sich sehre varlahßen vorkummen un sich wunnern, wu all die villen Sachen jebliwwen sin, die Marchtaks immer um se rum schtan’n, un von den immer son Jeruch uffschtek, dasse sich männigesmah jarne de Noase zujehalten hädden, wennse nur de Hände frei jehott hädden.
Uff die eene Seite vun Wochenmarcht da sin oo eene Reihe Fleescherbuden.
De merschten vun de Fleescher sin awwer nich aus Wittenbarch, die sin vuns Dorf.
Un bei die koofen de Wittenbarcher Frauens an liewesten, weiln Städtern de Landworscht an besten schmeckt.
Worum? -nee, das will ich liewer nich sahn; ich mechtes met keen vardarwen.
Frieher (von 1831 bis 1875) war das annersch.
Wemmer da metten Woagen nah Wittenbarch rin wolle, da mußte mer ahns Tor ahnhaln, un da kam’n de Torbeamten, die da vun de Rejierung ahnjeschtellt woarn, un schnubberten in Woagen rin.
und wogen einen. Un wemmer nu Worscht oder Fleesch druff hodde, da mußte mersch wiegen lahßen un naher dichtig darvor berappen. Se hußen das Schlachtschteier
Nu ja, mer han jo heite oo jerade Schteiern jenunk, so ville, daß mer sich drinne kaum zerrechte finget – awwer eene Schlachteschteier han mer nich mehr.
Un das is all jut so, denn scheene woar die Schteier nich, weilse de Woorscht un’s Fleesch varteierte un ville Umstänne un Archer machte.
Mer kunnes dadrum de Leite oo nich vardenken, wennse männichsmah Worscht un Fleesch heemlich nah Wittenbarch rin schafften, ohne dasses de neijierigen Torbeamten ierscht beschnubberten unse darfür oo noch ville Jeld abnehmen taten.c
Na ja, sone Schmuggelei machte jo Schpaß, awwer mer durfte sich nich darbei derwischen lahßen, sunsten woar der Schpoß weg, Worscht un Fleesch awwer oo, un mer mußte noch owendrin Schtrafe zahlen.
Nu woar dazemah in Wittenbarch der Jastwurt Lantzsch, der hotte e Schwager, das woar der Koofmann Jendricke in de Kallejenschtroaße.
Se hodden beede in Rackith e juten Freind – Weißmantel huße – der hodde eene Fleescherei un eene Jastwurtschschaft darbei.
Alles was recht is – seine Worscht woar beriehmt, un Lantzsch un oo sein Schwager se varsch Leben jarne.
Dadrum fuhr oo Lantzsch efter met sein Woagen nah Rackith un holte vun Weißmanteln for sich un seine Jäste e dichtjen Posten Worscht.
’s arjerten awwer jedesmah, wenne zus Elbtor kahm un die hoke Schlachtsteier bezahlen mußte.
Na, e sahk jo zu, dasse sein Schaden wedder beikam, denn wenn seine Jäste Worscht varlangten, da mußtense eben de Schlachtschteier met bezahlen.
Un se bezahltense oo janz jarne, denn de Worscht schmeckte jroßartig.
Wennse nu frahden: „Lantzsch, wo hanse denn die Worscht her? Wittenbarcher is doch das nich“, da sahde jedesmah:
„Nee. In Wittenbarch machense zwarschtens ooch Worscht, awwer sone Worscht wie de Rackither Worscht is de Wittenbarcher Worscht noch lange nich.“
Weil nu der Worschtvorrat alle woar, da schrebbe sein Freind Weißmantel in Rackith, e sollen so e 15 Fund Schlackworscht un e poar Fund frische Worscht zerrechte machen; e wollese uffen Donnerschtak holn.
Wie e nu sein Schwager Willem Jendricken das sahde, da war der jlei darbei, mit nah Rackith ze foahren un sich oo Worscht ze holen.
Wies nu Donnerschtak woar, da kahm Jendricke įlei nahs Mittakessen zu sein Schwager. Se schpannten Lantzschen sein ahlen dicken Braunen ahn un fuhren alle beede los un zus Elbtor naus.
Wiese nu na Broade kahmen, da bok der Braune įlei vun selwer nahn „Freischitz“ rewwer.
Jendricke wolle zwarschtens nischt vuns Inkehren wissen, awwer Lantzsch meente:
„Laß nur jut sin, Willem, ich bezahle. Vorbeifahren dersen mer niche; daß würre mein Kalleje Wust sehre iewel nehme.“
Se schteken also vun Woagen runger un ließen ’n Braunen vor de Tiehre schtehn – denn vun alleene loff der nich furt – un junken in de Jastschtowe rin.
‚ s woarn e poar vun de Broadschen Bauern da, die ehren Nahmittaksschoppen tranken:
Hoffberndt, der dicke Noack un Brehsens Vetter.
Un weil die nu alle bei Lanzschen inkehren taten, wennse nah Wittenbarch kahmen, da mußten sich de Beeden zuse ahn lanken Mitteltisch setzen un sich mettse ungerhaln.
Un so kahms, dasse länger sietzn blewwen un mehr tranken, alse eegentlich jewollt hadden.
Jendricke trebb awwer, dasse weiter machten, un so schtekense endlich wedder uffen Woagen un fuhren furt.
Weil awwer der Wegg ewer Wachsdorf dazemah sehre schlecht woar, da fuhrense ewer Eitsch.
un wiese nu an Teich kahmen, da bok der Braune wedder vun janz alleene rechts ab un zun Jasthoff rewer.
Jendricke jriff nahn Ziegel un wollen zerickziehn, awwer Lantzsch lachte und sahde:
„Willem, lassen nur sein Willen, der kennt ’n Wegg schon.
Un mein Kalleje Hillebrandt freit sich oo, wenn mern beehrn.
Mer nehm bloß een in Vorbeifoahren.“
E wolle zwarschtens nahn erschten no eens beschtelln, awwer sein Schwager wehrte ab:
„Nee, ierschts Jeschäft, un denn ’s Varjniejen.“
Sie drehten also ’n Braunen wedder um un woaren bahle in Rackith un schpannten bei Weißmanteln aus.
Wiese nu in de Jastschtowe kamen, da wolle Jendricke jlei vun de Worscht ahnfangen, awwer Lantzsch meente:
„Nee, Schwager, in Eitsch isses nah dich jejangen:
Ierschts Jeschäft un dann ’s Varjniejen; jetzt will ich emah meinen Willen han:
Ierscht ’s Varjniejen un dann ’s Jeschäft – denn ich hawwe Durscht.“
„So isses richtig, Kalleje,“ sahde Weißmantel.
„Iwrigens hawwe ich Eich de Worscht schon zerechte geläht.“
„Na also trinken mer ierscht e Treppchen, un denne machste uns e jutes Vesper, denn Hunger han mer oo jekriecht uff Eier ekliges Flaster.“
„Na, hat Eich man nich so, Eier Flaster in Wittenbarch is oo nich besser, un wemmer dorch de Kollejenschtroaße fährt, da kann mer Darmvarschlingung krein, so schlecht isses Flaster da.
Un das will oo no de Hauptschtraße sin.“
„Awwer nu wulln mer uns nich mehr wäjens Flaster schtreiten,“ meente Lantzsch.
„Brenge uns liewer was orndliches ze essen un ze trinken.“
Das meene ich oo, das is jescheiter,“ sahde Weißmantel.
Un ’s dauerte oo nich lange, da schtanden uffen Tische e poar Teppe Bier, e jroßer Teller met Worscht un Butter un Brot.
De Beeden luhßen sich denn oo nich netigen und hauten orndlich in, denn se hodden in de frische Luft warklich Hunger jekricht, un weilse darzwischen e Schnaps trunken un naher met Bier tichtig ahnfeichteten, da rutschtes no besser.
De Worscht schmeckte awwer oo dellekat, daß mußte mer sahn.
Un wiese nu de ierschten poar Teppe Bier aus hodden, da ließense sich no e poar inschenken un denne no e poar.“
„Du, Schwager, wie wärsch, wenn mer schtatt zwanzig Fund Worscht įlei dreißig nähmen, da kummen mer doch besser uff unse Kosten,“ sahde Jendricke, der immer uff sein Vorteel bedacht woar.
„Recht haste,“ meente Lantzsch.
„Mer sin emah da, un wenn mer de Fleeschriecher ahns Elbtor schon eene Noase drehn, denne oo eene recht jroße. ’s frahd sich bloß, ob Weißmantel so ville Worscht iwrig hodd.“
„Na freilich,“ sahde der. „Ich hawe jo heite įlei zwee Schweine jeschlacht. ’s eene hänget no draußen an Haken.
„Das muß ich mich naher mal ansähn,“ meente Lantzsch wedder. „Awwer ierscht mechten mer doch de Worscht varschtaun, dasse de Fissetatersch ahns Elbtor nich fingen.“
Weißmantel brachte de Worscht, diese in Kutschkasten varschteckten un met Hei zudeckten.
Un weilse vun de Arweet woarm geworrn woarn, da junkense wedder in de Jastschtowe un tranken noch eens.
Nah e Weilechen junk Lantzsch emah nahn Hoff, un da sahkes Schwein hängen. ’s woar schon ausgenommen, un der Leib schtand uff, dadermet ’s besser auskiehlen salle.
E blebb vor de Sau schtehn un iwerlähte; se schien sehre ze jefalln. Seine Betrachtungen hodden wohl e bischen lange gedauert, denn uff emah kahm Jendricke, den de Zeit lang geworrn woar.
„Wo bleibste denn, Arnst? Ich dachte schon, ’s wäre dich was passiert.“
„Willem, komm mah her,“ sahde Lantzsch.
„Na, was jiwets denn?“
„Guck dich emah das scheene Schwein ahn. Is das nich appetitlich?
Mer kennes jlei ahnbeißen.“
„Ja, ’s is nich schlecht scheene dorchwachsen.“
„Du, was meenste, wenn mersch met nah Wittenbarch nähmen? Das jäwe doch e Hauptfez. So wärn de Fleeschriecher ahns Elbtor no nich an de Noase rumjefiehrt worrn.“
„E janzes Schwein! De bist wohl nich jescheit.
Wie wolln mer das denn in Woagen ungerbrengn?“
„Ich hawe een Jedanken, Willem, ich sae dich, een Jedanken, der nich vun Pappe is:
Mer ziehn de Sau wie e Weiwessen ahn.
De Weißmanteln borget uns de Kledasche met e Umschlaketuk un e Hut meten Schleier.
Naher setzen mer ’s Tierchen in die Kutsche uffen Ricksitz, un ich nehmes in Arm, dasses nich rungerrutscht.
De Fissetatersch wern denken, ’s is meine Ahle, die doch beis Schpazierefoahrn oo immer ’n Schleier varsch Jesichte zieht.“
„E varrickter Infall, awwer e jefällt mer,“ meente Jendricke.
„Das jiwet jo e Hauptschpoaß, wenn mer met de Schweine-Madam bei dich in de Jastschtowe kommen un fiehrense alle beede an Arme durch de Schtowe.“
„Also jut, machen mersch.“
Met Meester Weißmanteln woarnse wegen Preise bahle eenig.
Nu handelte sichs bloß no um de Kledasche.
Wiese de Frau Weißmanteln de Sache vorschtellten, da lachtese hellewegg, awwer weilse sich iwer de Fissetatersch ahns Elbtor oo immer schon jeärjert hodde, da woarsche jlei darbei un holte de neetigen Sachen.
De Sau wurre nu in de kleene Schtowe jeschafft un ahnjekledascht; ze ungerscht e ahler Barchentungerrock, dadrewer e jroßkarriertes Wollmusselinkleed.
De Ärmel woarn zwarschtens e bischen ze lank, awwer das woar all jut so, denn se hungen iwer de Poten, daß mersche nich sähn kunne. Un iwer ’s Kleed kam e schottscher Mantel.
Uffen Kopp awwer krichtes Schwein e jroßen breitkrämpigen Hut meten Schleier, wiese dazumah Mode woarn.
Wiese nu mets Ankledaschen fartig woarn, da holtense de Kallesche un setzten de Schweine-Madame rin.
Koarl, was der Fleischerjeselle woar, mußte sich dernähm setzen un se haln, dasse nich umfallen salle, bis Lantzsch un jendricke fertig woarn.
Denn vun de Arweet hodden beede wedder Dorscht jekricht, un se wollten nu no emah zun Abschied un uffs jute Jelingen eenen trinken.
Wiese nu met Weißmantel wedder in de Jastschtowe traten, da woarn, da zwee aus Wittenbarch – der Zimmermeester Klaus und der Renntje Knape, die beede meten Woagen in Dorne jewäsen woarn.
Wie die Latzschen un Jendricken sahn, heertense jlei uff mit de Frau Weißmanteln zu schprechen; se machten awwer sehre varjniejte Jesichter un kunnten sichs Lachen kaum derhaln.
Lantzsch un sein Schwager doachten sich awwer weiter nischt darbei, zemah de beeden bahle wedder fortfuhren – se häddens sehre eilig, sahdense.
„Na denne prost un Jlick zu de Foahrt, „ sahde Weißmantel und schtieß met seine Jäste ahn.
„Hoffentlich jlickt der Schpaß.“
„Das laß nur meine Sorge sin,“ meeente Lantzsch.
„De wirscht sehn, de Fleeschriecher drehn mer eene Noase, wieesn noch keener jedreht hodd.“
Wiese nu ausjetrunken hodden, schtekense in de Kutsche – ’s woar eene meten Halbvardeck – un jaben Koarl e jutes Trinkgeld.
Lantzsch setzte sich uffen Ricksitz ungersch Vardeck un nahm de Sau in Arm.
Jendricke awwer schtek uffen Kutschersitz, knallte mete Peitsche, un der Braune, der markte, dasses heeme junk, setzte sich in scharfen Trabb.
„Willem, varsch Dunnerwetter, foahre doch nich so forsch uff das elendige Flaster!
De Schweine Madam is jo sunsten nich ze haln un hoppft uff ehren Sitz in de Höchte, als wollese Jalopp met mich tanzen.
Der Fedderhut meten Schleier is schone janz schief jerutscht.“
Jendricke zok de Leine ahn, dasses Fährd lanksamer junk; ’s dauerte awwer nich lange, da funks wedder ahn ze loofen, daß Lantzsch in der Kutsche drinne e Hopser nahn annerten machte, wie Schulzens Fritze met sein Schatz uffen Tanzbodden.
„Arnst, Arnst!“ roffe, „biste denn varrickt!
Wer soll denn das Jeschtaukere aushaln met sone Last in Arme?
Das Luder rutscht mich jo runger, un de janze Kledasche varschiewet sich. Wenn de ’s Fährd nich rejiern kannst, denn laß mich foahrn un balje du dich met de Schweinemamsell rum.
„Na wenn dein ahler Schinner so’n Dorchjänger is, da kann ich doch nischt darvor,“ brummte Jendricke arjerlich.
E paßte awwer nu doch besser uff.
’s woar schon janz dunker geworrn, alse nah Broade kahmen. Jendricke wolle jerade aus nah Wittenbarch foahrn, awwer sein Schwager beschtand druff, dasse ierscht no emah vorn „Freischitz“ ahnhielten.
„Was denkste denn,“ sahde, „wie mich das ahngeschtrenget hadd, das Schweinebiest ze haln. Ich bin orndlich woarm jeworrn, un da muß ich ierscht emah trinken. Ausschteijen wolln mer jo jar nich.“
Wie nu de Kutsche hult, da kam der Jastwurt Wust raus.
„Wollter denn nich ausschteijen?“ frahde, alse de Beeden sahk. „Nee,“ antwurtete Jendricke, „mer hans eilig.“
Un leise setzte darzu:
„Mer han ungerweggs Damenbejleitung jekricht, und die kenn’n mer doch nich alleene sitzen lahßen.“
„Nee, das jeht nich, Jevatter,“ sahde Lantzsch.
„Hole uns nur zwee Jlas Bier; de Dame will nischt trinken.
Awwer deine Fraue soll mah rauskommen, de Dame mechtese jarne schprechen.“
Wust woarf e Blick in de Kutsche, kunne awwer in de Dunkerheet un varn Schleier nischt wegkrein.
E wunnerte sich awwer nich schlecht, daß Lantzsch de „Dame“ so an
sich drickte.
„Na, wen han denn die ungerweggs uffjejawelt?“ doachte.
„Das mißte bloß de Lantzschen wissen, daß ehre Oller met son Weiwesbild in de Kutsche pussirt.“
E sahde awwer weiter nischt un schickte seine Fraue mets Bier raus.
„Schenn jun Qawend,“ sahdese un jab beeden ’s Bier. ,
„De hast mich schprechen wolln, Jevatter Lantzsch?“ meentese.
„Ich eejentlich nich, awwer meine Dame da,“ antwurte der.
„Awwer jib uns ierscht emah de Hand.“
De Wusten hielt de Hand hen, un Lantzsch lähte ehr de Schweinspote nin.
Wiese nu awwer das kahle, glitschrige Ding ze packen krichte, da derschrakse un schrek laut uff.
„Die is jo wohl tot!“ roffse.
„Ja, die is tot,“ sahde Lantzsch janz ruhig.
„Un das sahste so ruhig, als wenns weiter joar nischt wiehre?“
„Na, was soll ich denn da machen, wenn se nu emah tot is?“
„Nee, das is mich denn doch vardächtig,“ meente de Wusten, als se sich vun ierschten Schrecken derholt hadde.
„Heinrich, Heinrich!“ roffse zer Haustiere nin,
„brenge doch rasch emah e Licht raus!“
’s dauerte oo nich lange, da kam ehre Mann mets Licht an.
„Na, was jiwets denn?“ frahde.
„I denke dich doch: die han jo e totes Weiwessen in de Kutsche!“
„Awwer Frau, kwatsch doch keenen Unsinn.“
„Wenns nu awwer doch so is,“ sahde Jendricke.
„Kukse dich doch emah ahn,“ setzte Lantzsch darzu.
„Wennse oo tot is, desterwähn is se doch no sehre appetitlich.“
Un dadermet schluken Schleier zerick, un der Schweinekopp wurre sichtboar.
Wust wolle sich kringeln var Lachen.
De Wusten awwer schittelte meten Kopp:
„Na ja, das sieht jo Lantzschen wedder mah ähnlich.
Awwer met solche Sachen salle man doch keen Schpott treiwen.“
„Awwer Anna, markste denn nich, was die Beeden vorhann?
Die wolln ’s Schwein nach Wittenbarch in schmuggeln.
Na hoffentlich derwischen Eich de Fissetatersch nich darbei.“
„Denn woll’n mer schon e X forn U vormachen.
– So hier isses Jeld varsch Bier.
Un nischt for unjut, Jevattern, solle jo bloß ’n Schpoaß sin.“
Se fuhren iewer de ierschte Flutbricke un iewer de zweete un de Schtroaße weiter, die dazemah wäjen de Festunk um ’n janzen Brickenkopp links rum junk.
Wiese nu ahn de Schtelle kahmen, wo heite der „joldene Frosch“ is, da roff Lanzsch:
„Arnst, halte mah!“
„Was is denn? de Schweinemamsell will wo nich mehr schtille sitzen?“
„Mach keene Witze.
Mich isses jetzt in Koppe rumjejangen, warum der Zimmermeester un der Renntje Knape so lachten, als mer in Rackith in de Jastschtowe traten, un worum se sich so rasch furt machten.
Wenn de Weißmanteln nur nich jeschwazt hadd, denn de Weiwer kennen doch nu emah ’s Maul nich haln.
De Beeden kennten uns e Schtreech jeschpielt un’n Fissetatersch ans Elbtor de Sache jeschtochen han.“
„Hm, das wiehre freilich eene sehre dumme Jeschichte.
Mer kämen da in Teifels Kiche.
Awwer vardächtig is mich de Sache oo.“
„Un desterwähn isses besser, mer foahrn nich dorchs Elbtor, sondern durch Schloßtor in de Schtadt.
„De hast Recht, Schwager, mer wollns so machen.“
De Beeden kamen oo įliicklich dorchs Schloßtor.
Der Torbeamte, der Jendricken kannte, frahde bloß:
„Ist was Steuerpflichtiges im Wagen?“
Un als der sahde:
„Nee, bloß mein Schwager Lantzsch met seine Fraue,“
da lachte un meente:
„Na, die können wir doch wohl nicht mit Fleischsteuer belegen.“
Awwer nu den Hallo, als die Zwee met de Schweine-Madam ungern Arme in de jefillte Jastschtowe vun Lantzschen traten un ehr ’n Schleier vuns Jesichte zoken.
——————————————————————————
Ungerdessen jabs ahns Elbtor oo e Hallo, awwer das klunk janz annersch.
Da hult nämlich der Tuchfawrikant Lorenz met seine Kutsche.
E woar met seine Fraue in Melsigg (Melzwig) jewäsen.
Se soaßen alle beede so recht jemietlich hingene in de Kutsche, un vurne soaß ehre Kutscher, der seine neie Lieferee met de blanken Kneppe ahnhodde, denn Lorenzens taten sich jarne e bischen dicke.
Wiese nu dorchs Elbtor foahren wollten, da fuhl der Torbeamte ’n Fähre in Ziejel un roff:
„Halt!“
Lorenz schteckte ’n Kopp aus de Kutsche und frahde arjerlich:
„Was jiwets denn? Was wullnse denn von mich?“
„Das werden Sie gleich sehen,“ sahde der.
„Tun Sie mal gefälligst den Kopf weg, daß ich in den Wagen sehen kann.“
Lorenz zoken Kopp zerick, un der Fissetater troat janz nahe ran un kukte in de Kutsche nin.
Un wie e da de Frau Lorenzen in schottischen Mantel meten Schleier vorsch Jesichte sahk, da roffe:
„Na ja, da haben wir’s ja!“
„Was ham se denn?“ frahde Lorenz, bei den lanksam de Jalle uffschtek.
„Was soll denn das heeßen?“
„Was das heißen soll? Aussteigen sollen Sie.“
„Fällt mich joar nich in.“
„Herr! Wollen Sie gutwillig aussteigen oder nicht?
Ich lasse Sie auf der Stelle arretieren.
„Jut; ich fiege mich der Jewalt.
Ich were ausschteijen, awwer ’s Weitere ward sich finden.“
„Ist schon gefunden.“
Lorenz wickelte sich aus de Reisedecke un schtek aus de Kutsche.
„Das Schwein muß auch raus!“ schreken der Torbeamte ahn.
Das woar awwer Lorenzen denn doch ze schtark.
E hult den annerten de Faust vorsch Jesichte un schrek:
„Sie, Sie! wie kennense sich ungerschtehn, meine Frau in soner jemeiinen Weise ze beleidijen!“
„Ach, tun Sie doch nicht so,“ sahde der Fissetater un lachte.
„Wir wissen alles. Das Schwein muß raus, da hilft Ihnen alles nichts.“
„Aujuste, schteik aus,“ sahde Lorenz zu seine Fraue, un mer marktes, wie’n de Stimme bewete vor Wut.
„Ich were schon mein Recht suchen. De Beleidijunk soll den Kerl teier ze schtehn kommen.“.
„Was fällt denn den Mann in? Was will denn der vun uns?“
ließ sich de Lorenzen ehre Stimme aus de Kutsche heeren.
Der Fissetater schtand da wie vun Dunner jeriehrt, als nu e Weiwessen aus de Kutsche rausjekrawelt kam, uffen zutrat, ’n Schleier vuns Jesichte zok un’n met ehre jroßen Oogen ahnfunkelte wie eene wietende Katze.
E prallte derschrocken zerick un schtotterte:
„Ach, entschuldigen Sie nur; es war ein Irrtum. Ich glaubte, Sie wären ein Schwein.“
„Sie! was ungerschtehnse sich!“ brillte Lorenz.
E woar vor Uffrejung janz kerschrot ins Jesichte jeworrn un machte Miene, sich uffen armen Torbeamten ze schterzen.
„Verstehn Sie mich doch nicht falsch,“ sahde der kleenlaut,
„ich meine natürlich ein verkleidetes Schwein, was man einschmuggeln wollte.
Vor einer haltben Stunde etwa wurde uns gemeldet, es wäre eine Kutsche unterwegs, darin brächte man ein Schwein, das man als Frauensperson angezogen hätte, mit einem karrierten Mantel und Hut und Schleier, um es durch das Elbtor in die Stadt zu schmuggeln.“
„So,“ schnauzte Lorenz jrimmig,
„un da meentense wohl nu, meine Fraue wiehre das Schwein?
Na, mer schprechen uns no. Das lasse ich nich uff mich sitzen, das markense sich.“
Dadermet schtek Lorenz met seine Juste wedder in, un se fuhren furt un lußen den vardutzten Fissetater schtehn.
Der kratzte sich varlähn hinger de Ohren un schimpte:
„Na, so ’ne Schweinerei!
