Wer in de Schule bei de Naturjeschichte uffgepaßt hot, der weeß oo, daß de Kuckucks ze faul sin, sich e Nest ze baun.
Awer weilse nu doch oo jarne Eier län wollen, da länsese in de Nestersch vun sune kleenen Vochels un schmeißen eenfach den ehre Eier raus.
Un de kleenen dummen Vochels markens joar nich, dasse betrochen sin un brieten ’s jroße Kuckucksei janz richtig aus un wunnern sich naher, daß nich sune kleene niedlige Jrasmücke oder e Rotkehlchen rauskimmet wiese sälwer sin, un derweile isses sun ahles jroßes Viech, das bloß immer ’n Schnawel weit uffreißt, daß mersch bis in Magen sähn kann un nich satt ze krein is.
Un wer e bißchen vun Aderbau un Viehzucht varschteht, der weeß oo, daß de Enten ehre Eier sehre schlecht ausbrieten tun, un daß mersche desterwähn liewer ’n Hinnern ungerlät, weil sune jute ahle Glucke das Geschäft ville besser besorget.
Wenn nu awer de Kleenen auskrauchen, da markt das ahle dumme Tier den Betruk immer no nich un is janz ensetzt, wenn de Kleenen fortloofen tun un ins Wasser huppen, wuse munter un varjniegt rumherschwimmen.
Un de ahle Glucke leeft denn immer ans Ufer länk hen un schreit un zankt un mechte sich an liewesten de Feddern rausreißen, weilse jlowet, ehre Kinner mißten varsaufen, weil doch Hinner nich schwimmen kennen.
Na ja, das weeß jeder, der ’n bißchen Varschtehstemich vun sowas hot, wie awer aus e Karnarijenvochel e Schparling wern kann, das weeß nich jeder, un desterwähn will ichs ema derzähln.
’s hot jo mänicher Mensch e Vochel, wenns oo nich jerade sun Wellensittch is, wiese zunderweile Mode jeworrn sin.
Der Schuster Moritz hotte oo e Vochel, awer der saß bei’n nich etwa in Koppe, nee in son Vochelbauer met blanke Messingschtäwe.
’s woar nämlich e scheener jelwer Karnarijenvochel.
E hotten vun sein Freinde Justaf Bährsch gekooft, wie der na Barlin junk, weilsen uffs Dorf nich mehr gefalln tat, uns messingene Bauer hotte uff de Vochelwiese in Wittenbarch in de de Grawelbude gewonnen.
Jeder Mensd, hot was, an dasse sein Harze hängen tut der eene hängets an e Mächen, der annerte an was annertes.
Schuster Moritz hotte sein Harze an sein Karnarijenvochel gehangen.
Vun de Mächens wolle nischt wissen; e hotte metse schlimme Arfahrungen gemacht. “ ’s is alles e Kaliewer – falsch un treilos“, satte, wenn eener darvun anfung un meente, e kenne doch nich immer leddig bleim un mißte doch nu oo bahle ma heiraten.
Zu was soll ich denn heiraten? Solange wie ich mein Jeld no alleene varzehren kann, hawe ich das nich neetig.
Ich hawe mein Karnarijenvochel, da ward mich de Zeit nich lang.
Un mir zwee zanken uns wenigstens nich – woahr Hänschen?“ „Piep!“ sate der Vochel un kukte ’n Schuster met seine kleenen schwarzen Oogen an, als aben varschtünne un „Ja!“ san wolle.
’s woar awer so e sehre kluger Vochel, der was jelarnt hotte.
Der Schuster brauchte bloß de Lippen ze schpitzen un ze feifen, da schmetterte ’s Hänschen los un sunk un trillerte, daß marsch in de janse Nachberschaft heeren kunne – ’s woar e richtges Kunzart.
Un wenn der Schuster uff sein Schemel saß un de Sohln uff de Schteweln kloppen tat, da mußte Hänschen meenen, das salle sune Art Wettbewerb sin un da läte ierscht recht los un wolle mets Singen un Schreien ’n Schusterhammer iwerteenen.
Nu hotte jo Moritz de Arweet wurklich nich erfungen, un de Woche hotte bein mänichesma recht ville blaue Montake, wu de Schuhks un de Schtäweln, die e besohln oder beflicken salle, in de Ecke län blem un sich was metenanner derzähin kunnten.
Der Schuster awer schtund vorsch Bauer un machte meten Karnarijenvochel Kunzart.
Desterwähn woar bein oo immer ’s Jeld hellschen knapp, un wenne ma was hotte, das hult sich nich lange.
Zwee Mark in de Ficke die zanken sich, un eene alleene die furcht sich, so huß es bein – un furt woarnse.
Nu hunge bein Lederhändler in Wittenbarch schon sehre Lange met de Rechnung forsch ’s Leder.
Der hotten schon eftersch gemahnt, un weil das nischt half, zeletzt e Zahlungsbefehl geschickt.
Awer Jeld hotte desterwähn doch nich gekriecht, un desterwähn kam eene Taks der Jerichtsvullzieher Hoppe zun Schuster.
„Herr Moritz“, sate zun, „ich habe hier einen Vollstreckungsbefehl wegen der Zahlung an ihren Lederlieferanten in Wittenberg.
Wollen Sie den Betrag zahlen?“
„Ja, Harr Jerichtsrat,“ antwurrte der Schuster, „das is nu sone Sache. Wollen hawe ich wohl, awer vollbringen das Jute, das finde ich nich, so schtiehts schon in de Biewel.“
„Nun ja, das mag schon so drin stehn, so genau weiß ich da nicht Bescheid, aber das weiß ich, daß in der Bibel steht: Der Gottlose borget und bezahlt nicht. Un weil Sie doch so gut die Bibel kennen, da wollen Sie doch gewiß nicht zu den Gottlosen gehören und werden das geborgte Leder bezahlen.“
„Awer freilich will ich das, Harr Jerichtsrat; ich bin no keen Menschen nich was schuldig geblem, awer alleweile hawe ich keen Jeld. Un hanse schon ema eenen jesähn, der bezahln tat, wenne nischt hotte?“
„Mein Lieber, das tut mir ja leid, aber der Lederhändler will nicht länger warten, und wenn Sie nicht zahlen wollen -“
„Kennen, kennen, Harr Jerichtsrat.“
„Na denn meinetwegen: nicht zahlen können, so muß ich eben zur Pfändung schreiten.“
„Tunse, wasse nich lassen kennen“, meente der Schuster, „denn mit des Jeschickes Mächten is keen ewger Bund ze flechten“, sat der jroße Dichter Jehte.
„Na, ’s ist wohl Schiller“, varbesserte der Jerichtsvullzieher.
„Ab Schiller oder Jehte – is allens eene Pastete“, dichtete der Schuster.
Hoppe kukte sich in de Schtowe um, wasse wo an besten fänden kinne.
Moritz bemarktes un sate:
„Lassense bloß de Schteweln un de Schuks da ’n Ruhe, die geheern mer nich. Un meine Bauern mißten sunsten uff de Schtrimpe loofen, un das würrese schlecht bekummen un mich oo.“
Hoppe kukte no immer.
Da schtund e Bette, e Tisch, e Schtuhl, der Schusterschemmel metten Schustertisch un’s Handwartszeik druff un eene kortsche Feife – das woarn de jansen Mewels vun Schuster.
Der schtund da un hotte de Hände in de Hosenficken geschtect un freite sich, daß der Jerichtsvullzieher nischt fung, wassen nähmen kunne.
Un wie der no immer met de Oogen in de Schtowe rumsuchen tat und joarnischt fingen tat, da funge an ze feifen:
„Ich weiß nicht, was soll es bedeuten, daß ich so traurig bin.“
Das singen un feifen jo de Leite an liewesten, wennse recht varjniegt sin.
Zunderweile awer woarsch vun Schuster eene Dummheet, denn wie das der Karnarijenvochel ins Bauer heeren tat, da jlowete der, der Schuster wolle meten wedder e Kunzart machen un schmetterte denn nu los haste was kannste.
’s Jesicht vun Gerichtsvullzieher varklärte sich orndlich – awer nich vun wegen den Jesang. „Ah!“ sate, „da ist ja ein Kanarienvogel! Das ist Luxus, den kann ich nehmen.“
Un dadermet klewete įlei an Vochelbauer ’s Jerichtssiegel, was mer ’n „blauen Kuckuck“ heeßt.
Unse Schuster blebb der Ton zwischen de Lippen schteden; e schtund da mets schpitze Maul, so woarn der Schrecken mang de Jlieder gefahrn.
„Awer liewester, bester Harr Jerichtsrat“, schtotterte, „das wärnse mich doch nich antun un mich mein eenzigste Freide nähmen, die ich uff de Welt noch hawe.“
„Ja, das tut mir ja leid“, sate der, „aber ich muß meine Pflicht tun. Oder haben Sie sonst noch etwas anderes Pfändbares?“
Wartense ma“, meente der Schuster. „Ich hawe no e Kuter, e scheen schwarzen Kuter. E ward wohl draußen in Schtalle uff de Meisejagd sin. Den kennenje meinswegen varsiegeln. Ich wern jlei ema suchen.“
Un dadermet wolle zer Tiehre raus.
Der Jerichtsvullzieher hielten an Arme fest
„Bleiben Sie nur da, Ihre Katze kann ich nicht gebrauchen; die kauft doch niemand.“
„Harr Jerichtsrat, ’s is awer e sehre juter Mausefänger.“
„Mag schon sein, aber es ist kein Pfandobjekt. Es muß also bei dem Kanarienvogel bleiben. Wenn Sie nicht binnen acht Tagen bezahlen, muß ich ihn zwangsweise versteigern.“
„Das iwerläwet der nich, da jrämt der sich ze Tode. Woahr, Hänschen?“
„Piep!“ sate der Vochel, der schon lange mets Singen uffgeheert hotte un vun seine Schtange ganz ängstlich den fremden Mann ankukte.
„Da heernses“, meente der Schuster, „e sat ja!
Son Tier hatse nämlich oo sein Varschtand.
E weeß janz jenau, desses sich um seine Parson handeln tut.“
„Na, na“, lachte Hoppe, „machen Sie ’s nur halblang. Na, Sie wissen ja Bescheid. Und nun schreiben Sie mal Ihren Namen hier her.“
Darbei schobe ’n Schuster e Schriftschtick hen.
Un als der ungerschrem hotte, packte seine Schreiwerei in un junk furt un luß ’n Schuster metsamst sein Kanarijenvochel betriewet zerricke…
Zwee Take druff schtund ins „Wittenbarger Takeblatt“ ze läsen
Zwangsversteigerung
Mittwoch, den 5. Mai, soll in M. im dortigen Gasthofe ein Kanarienvogel (guter Sänger) samt Messingbauer zwangsweise gegen bare Bezahlung meistbietend versteigert werden.
Hoppe, Gerichtsvollzieher.
Wie nu der Mittwoch ran woar, da kam denn oo der Jerichtsvullzieher nach M.
Jerscht wolle ’n Jungen vun Wurt zun Schuster Moritz schicken, dassen Kanarienjenvochel holn salle, awer der Voater derlowetes nich; e meente, der Schuster wiere eener vun seine besten Jäste un desterwähn kinnen so was nich antun.
Da jab Hoppe ’n annerten Jungen zwee Jroschen, dasse ’n Vochel holte, un das machte der denn oo un brachten metsamsts Bauer, was Moritz mets jewerfelte Schnupptuk zujebungen hotte.
Der Schuster kam jlei sälwer met, als Trauergefolge wie e sate.
Wie nu awer der Jerichtsvullzieher ’s Schnupptuk vuns Bauer wegzok, da prallte zerricke un schtund da wie vun Dunner jeriehrt, denn was da ins Bauer rumhuppen tat, das woar doch keen Karnarijenvochel nich, das sahk akkerat aus wie e jewehniglicher jrauer Schparling.
„Was soll denn das heißen!“ roffe, „das ist doch nicht der Kanarienvogel. Moritz, wie kommt der Sperling in das Bauer?“
De Leite, die in de Jastschtowe woarn, lachten alle helleweg, an sättsten awer der Bauer Hillebrandt, der sich vor Lachen janz ausschitten wolle.
Der Schuster blebb janz ruhig un varzok keene Miene.
„Schparling, Schparling“, sate, „Harr Jerichtsrat, ich weeß man joar nich, wasse immer met ehren Schparling wolln.
Das is doch der Karnarijenvochel, den se varsiegelt han un den se nu heite varkoofen wolln.
Seit se nämlich ehren blauen Kuckuck uffs Bauer geklebt han, da woar das Tierchen janz wie umgewandelt, weile wo markte, was metten jeschehn sille.
Na un da hotte sich em so jejrämt, dasse sich var lauter Jram varfärwet hot un nu jrietzegrau jeworrn is.
Sowas kimmet doch sogar bei de Menschen vor.
Harr Jerichtsrat, se han doch jewiß oo in de Schule jelarnt, wie unse Turnvater Jahn in eene eenzigste Nacht jraue Hoare jekriecht hot, wie de Preißen in de Schlacht bei Jene vun Napolijon geschlan wurrn.
Sähnse, so isses mein armen Karnarijenvochel oo jejangen. Un wenn Sie das passieren täte, dasse sallten varauktieniert wern, da würrense oo vor Jram jrau wern. Woahr, Hänschen?“
„Schilp, Schilp!“ sate der Vochel.
“ Sähnse“, meente der Schuster, „sojar de Schprache hot sich bei das arme Tier vor Jram verännert.“
De Leite krieschten alle laut uff, un der Bauer Hillebrand hult sich ’n Bauch var Luchen.
Nu awer wurre Hoppe fuchtig; e fiehlte sich in seine Amtswirde gekränkt.
„Moritz“, fuhre ’n Schuster an, „wenn Sie denken, Sie könnten mich zum Narren halten, dann irren Sie sich. Schaffen Sie sofort den Kanarienvogel zur Stelle oder Sie sollen sehen, was Ihnen passiert. Sie scheinen nicht zu wissen, daß auf Pfandbruch schwere Strafe steht. Wenn ich die Sache anzeige, dann werden Sie eingelocht, verstehen Sie?“
„Nu, das wiere oo so schlimm nich. Wo jetzt de Leite barweß oder in Holzlatschen loofen, da jiwets ema nich ville ze tun. Awer ich kann doch wurklich nischt darvor, wenn der Karnarijenvochel var lauter Jram jrau jeworrn is.“
„Nun ist’s aber genug!“ roff Hoppe wietend. „Lassen Sie endlich Ihren Blödsinn! Ich sage es Ihnen zum letzten Male: Schaffen Sie sofort den Kanarienvochel her, wenn Sie sich nicht ins Unglück stürzen wollen.“
Nu läte sich der Bauer Hillebrandt ins Mittel.
„Na, Harr Hoppe“, sate, „Se wern doch e Schpaß varschtehn.
Was sall denn der jraue Karnarijenvochel kosten?“
„Mit den Kosten machts acht Mark funfzig Pfennige.“
„Jut, ich wern koofen.“
Un dadermet langete ’s Jeld aus de Ficke un lätes uffen Tisch.
„So, Schuster“, sate, „da haste dein varzauwerten Kαnarijenvochel weder. De kannst ’s Jeld abarweeten.“
„Schilp, schilp!“ sate der Vochel ins Bauer, was wohl „danke, danke!“ heeßen sulle un luß zer Bekräftigung was fallen.
Richard Erfurth
aus: Unser Heimatland vom 24.11.1934