’s is alles schon ema dagewesen, sat mer immer. Awer daß mer e Fasanenhoahn in Rucksacke schießen tut, das is wo no nich dagewesen, un desterwähn will ichs ma erzähln.

In de Diemner Heede jiwets villen un scheenen Wald. Desterwähn brauchten de Wittenbarcher oo nich nahn Harz un nahn Thieringer Wald un mer weeß wohen ze reesen, um Waldluft zu schnappen. Das kennense em so jut un billiger in de Diemner Heede han. Un mer kann da vo baden in de villen Teiche, die ’s da jiwet, un’s Wasser is da reener wie in de Elwe, un mer braucht sich nich vor die ahlen ekligen Wullhandkrabben ze furchten, die jetzt iwerall in de Elwe un in de Kolke un Risse vun de Elbaue rumjraweln tun. Na, wenn das met die Biestersch so weiter jeht, denn weeß ich nich, was da no wern sall.

Es kummen jo vo schon sehr ville Leite nah de Diemner Heede, un nich bloß, wenn’s da Heelebeern un Pilze jiwet, die da massenhaft wachsen. Nee, ’s janse Joahr kann mer Fremde dort sehn, besunnersch seitse da de scheene Schtroaße jebaut han, uff der de Autos wie der Deiwel immer hen un her flitzen tun, daß mer sich hellschen in acht nehmen muß, wemmer nich in Klump gefoahrn wern will. De Kämbarcher sin freilich nich jut uffe de neie Schtroaße ze schprechen, weil die e Bogen um ehre Schtadt macht, un se nu nischt mehr ze sehn krein un nischt mehr vun de Fremden vardienen kennen. Na freilich, mer kann oo ehren Arger vo varschtehn.
Awer oo de Farschtersch sin nich gerade vun de villen Fremden bejeistert. Besunnersch de Leipzger han se uffen Kieker, weil die immer in Massen durch’n Wald loofen un ’n sättsten Schpektakel machen un darmet’s Wild varjrämen tun. Un ’s is doch so wurklich dumm vunse, wennse immer jröhlen:
„Wer hat dich, du scheener Wald, uffgebaut?“
Als ab mer das nich wissen täte!

In der Diemner Heede jiwets nämlich sehre ville Wild:
Rehe, Hursche un sogar Wildschweine. Awer vo uff de Beeme jiwets was ze schießen. Ich meene awer nich de Krahchen un Elstern un Hawichte. Na ja, son Viehzeik ward oo vo geschossen, awer das is doch nischt forn richtigen Jäger. Nee, ich meene de Fasane, die da uff de Beeme un mang de Bische sitzen.

Ins Rewier vun Farschter Sitten jabs recht ville Fasane. E hotte sein Schpaß an die hibschen Vegel un hegtese, so sehre kunne. Eftersch schtunde hinger de Beeme un guckte zu, wie de Häshne um de Hennen rumquurlten, wie wennse varrickt wieren. Na ja, ’s jiwet jo oo Mannsen, die so liewesdusselig sin, dasse sich varn Weiwessen wien Fasanenhoahn benehmen tun. E hätte son Hoahn janz leicht abschießen kennen, awer das tat Sitte nich. ’s sahk oo ze putzg aus, wennse so met hoggehomnen Flettichen un uffgeplusterten Feddern umenammer rumschtreiben taten. Das is oo wurklich e Anblick, daß mer darbei ’s Schießen vargessen tut.

Heit junk Farschter Sitte oo durchen Busch uffs Fasanenrewier zu. Awer diesmah machte keen freindliches Jesichte nich wie sunsten, denn e hotte e furchterlichen Zorn in Leiwe un schimpte immer vor sich hen.

Ungerwegs koamen der Bauer Freiwald aus Bargs entgegen, der das Holz abfoahren tat, wasse uff de Auksjon gekooft hotte.

„Jun Tak, Harr Farschter“, sate un hult metten Woahn an.
„Jun Tak“, antwurrte der kortsch un wolle an varbeijehn.
„Nanu“, meente Freiwald, „so eilig heite, Harr Farschter? Un se machen jo son beeses Jesichte, als abse de Buttermilch varhagelt wiere. Das is mer vun Sie joar nicht gewehnt.“

Sitte blebb denn nu doch schtehn un gab Freiwalden de Hand.
„Na wissense“, sate, „mer kenne oo wild wern.

Da hegt mer nu de Fasane, un naher kimmet son Karl aus Barlin un willse een wegschießen. Da schreiwet mich der Harr Baron, iwermorgen kieme eener aus Barlin, e Kummarzienrat, oder wasses forn hoges Tier is, un der mechte jarne een Fasanenhoahn schieße. Un nu soll ich darvor sorgen, dasse e recht scheenen Hoahn treffen kinne. Natierlich, was die sich denken! Die schießt mer so mir nischt, dir nischt! Ich will nich fluchen, awer da sall doch jlei e heiliges Kreizdunnerwetter drein schlan!“

„Awer, liewer Harr Farschter, was argern se sich denn dadrewer? Wenn der Kummarzienrat, oder wasse is, nischt trifft, das is doch ehre Schuld nich.“
Das sahnse so hen, Freiwald. Awer wenne nischt trifft, da isses ’n Baron nich recht. Der will sich doch vor den Besuch met seine Jagd e bißchen dicke tun, un ’s scheinten oo sehre ville dran ze lähn, daß der was schießt.“
„Na, Harr Farschter, daß wernse schon machen. Un ’s ward jo oo ehre Schoaden nich sin. Sone hogen Harren kimmets doch bei die Gelegenheet uff e Zwanzigmarkschein nicht an.“
„Och, die sin maniches ma sehre Inietschig. Awer ich muß sehn, was sich machen läßt, schon wegen ’n Baron.“ Un dadermet junke weiter.
Mer sahksen an – e simmelierte iwer was. Uff ema lachte laut var sich hen. „Ja, so wards jehn“, meente zu sich, „so wards gemacht.“

E bog vun Wege ab un junk nahn Platze, wu de Holzarweeter scharwerken taten. E Weilichen kukte zu, wiese de umgehauenen Beeme zarsägten. „Boos!“ roffe, „kumm doch ema her!“
Boos koam, un der Farschter junk metten e Schticke abseits, dasses de annerten nich heeren sullten.
„Boos“, funge an, „nu heere ma genau zu, was ich dich san tue. Morgen kreit unse Harr Baron Besuch aus Barlin – son hoges Tier, e Kummarzienrat. Un der Harr Baron will, daß der akkerat e Fasanenhoahn schießen sall. Nu weeß mer jo awer schon, wie jottsjämmerlich sone Schtädtersch schießen – meerschtenteels nämlich darnem. Nu paß ema uff, wie mer die Sache deichseln, daß der Barliner sein Willen kreit oder wenigstens jlowet, e hätte was getroffen. Ich were morgen uffen Anschtand jehn un e Fasanenshoahn schießen. Den schtecke ich dich in ’n Rucksack, un du kletterst darmet iwermorgen frieh um finfe uff de jroße Buche un drickst dich in de ewerschten Aeste, daß mer dich nich sieht. Un wenn de uns kummen heerst – ich were e bißchen laut sprechen – denne fängest an, wie e Fasanenhoahn ze balzen; das kannste jo. Ich brenge ’n Kummarzienrat unger de Buche un lassen nuff mang de Aeste schießen. Un wenne denn nu losgeballert hot, da wurfste schnurschtracks ’n Fasan runger, dasses akkerat so aussieht, als aben der Kummarzienrat wurklich geschossen hätte. Haste mich varschtan’n?“
„I, das wohl, Harr Farschter, awer – awer – “ Boos kratzte sich hinger de Ohren.
„Was willste denn san met dein Awer?“
„Ja, sehnse, Harr Farschter, das ich mich doch ene kitzliche Sache. Wenn nu der Harr Kummarzienrat mets Gewehr mich trifft – mer kann jo alles nich wissen?
Der Farschter lachte und sate: „Da kannste ohne Sorge sin;
ich laden ’s Gewehr met Platzpatronen.“
Boos lachte oo un meente denn: „Na, wenn’s so is, mags gehen.“
“ ’s sall oo dein Schade nich sin“, sate Sitte weiter. „Wenn sone hogen Harrn was schießen tun, naher freien se sich, un tun sich oo erkenntlich zeigen. Uff e Finfmarkschtick kannste immer rechnen. Na, un wennes wurklich vargessen sulle, was ich awer nich jlowe, denn bin ich jo immer no da un were an dich denken. Also, willste de Sache machen?“ ,“
Awer gewiß, Harr Farschter, die Sache ward gemacht.
Das jiwet jo e Fez. Der Harr Kummarzienrat soll sein’n Fasanenhoahn schießen, wenns man oo bloß e toter is.“

Boos woar e janz Durchtrimner un hotte schon mäniches uffen Kerbholze, un wenn’s druff ankam, een e Schtreech ze schpielen, da woar e immer ze han.
„Also jut“, sate der Farschter, „awer varschloafe de Zeit nich. Iwermorgen frieh um viere mußte bei mich sin un’n Fasanenhoahn abholen, un um finfe mußte metten omn uffen Boome sitzen. Mach deine Sache jut. Awer ’s Maul haln, varschtehste. ’s darf keener was darvun marken.“
„Uff mich kennense sich varlasen, vun mich erfährt keener keen Schtarmswertchen nich.“
„Jut, Boos, ich verlasse mich uff dich. Un nu jeh weder an deine Arweet, un wenn de Annerten dich frahn tun, was ich vun dich jewollt hätte, da saste – ja, was saste denn jlei? Na, sag, was de willst; ’s Schwindeln varschtehste jo ausen ff.“

Wie nu der Tak kam, wu der Kummarzienrat seine Kunst zeigen wolle, da saß Boos richtig frieh um finfe metten toten Fasanenhoahn omn uff de hoge Buche. E woar bei das lange Sitzen e bischen ingedrusselt, da heerte uff ema ’n Woahn gefoahrn kummen.
Vurne nem Kutscher saß der Farschter un hingene der Harr Baron metten Kummarzienrat aus Barlin.
An de Waldecke hult der Woahn, un Boos heerte, wie der Farschter recht laut sate: „So, meine Harren, jetzt missen mer ausschteigen. Bitte sehr, Harr Kummarzienrat, hier is Ehre Bichse, ich hawese geladen.“
Nu fung Boos haste was kannste an ze balzen. Mer hätte meenen kennen, ’s wiere e richtger Fasanenhoahn.
„Heernses, Harr Kummarzienrat? Dort uff de hogen Buche sitzte!“ roff der Farschter.
Der loof was e kunnte jlei uffen Boom zu, un daderbei benahm sich so dämisch, daß e richtger Fasanenhoahn schon lange iwer alle Barge gewesen wiere.
Wie se nu allehofe unger de Buche koamen, da fung Boos omn wedder wie verrickt ze balzen an.
„Druff, Harr Kummarzienrat, druff!“ roff der Farschter.

„Puff, puff!“ gungs – der Kummarzienrat schoß jlei beebe Jewehrleife ab, un jlei tats e Plumps. Der Kummarzienrat schterzte jlei druff zu un hob – e Rucksack hok. – Boos hotte in de Eile ’n Fasanenhoahn metsamst ’n Rucksack rungergeschmissen!
Awer die Jesichter vun die dreie hätteter sehn sallen! Der Baron pruschte los un hult sich ’n Bauch vor Lachen. Der Kummarzienrat schtund wie varschteinert da un hult ’n Rucksack metten Fasanenhoahn schtorreschteif var sich hen un meente, das wiern doch no nich passiert, dasse e Fasan in e Rucksacke geschossen hätte. Farschter Sitte awer kriegte e roten Kopp wien Kullerhoahn un schreek zun Boome nuff:
„Boos, Du hundsdämliches Luder Du! Wenn de nich jlei machst, daß de runger kimmest, da schieße ich Dich ’n Buckel vull Schrot!“
Der koam nu rungerjejrawelt un schtund da wien bejossener Pudel. Der Baron kloppten uff de Schuller, lachte un sate:
„Das haste awer schlau gemacht. Da haste was for’n Schreck.“
Un dadermet drickten e Zweemarkschtick in de Hand.
Nu hotte sich Boos awer beis Rungerklettern met de Hand e bischen an e Aste gerissen, dasses blutte, un da dachte der Kummarzienrat,
e hätten angeschossen. Desterwähn joben e Zwanzigmarkschein als Schmarzensgeld un frahten, abs schlimm wiere.“
„Ach nee“, sate der, „’s hat nischt ze bedeiten“ un machte, dasse furtkam, weile sichs Lachen nich länger varbeißen kunne. Un der Farschter mußte bei allen Arger oo lachen.

Wie se nu alle dreie wedder nahn Woahn henjungen nahmen der Baron beiseite un sate:
„Farschter, das Ding hottense jo fein ingefädelt, bloß schoade, dasses der Dämelack, der Boos, vardorwen hat. Awer die Sache hätte doch kinnen gefährlich wern, wenn der Harr Kummarzienrat den Mann wurklich getroffen hätte.
„I wo, Harr Baron“, antwurrte der Farschter, ich hot ten jo ’s Jewehr bloß met Platzpatronen geloden.“
Der Baron lachte un sate: „Farschterchen, Farschterchen, ich sehe, Se sin e janz Geriemner. Nu kummense ma met nahn Wachmeester; da wulln mer ’n Fasanenhoahn in Rucksack begießen,“

Richard Erfurth †

aus: „Unser Heimatland“ vom 30.05.1936