Bei Jriehls solle iwer vurzehn Take Hochzeit sin.
Jriehls Frieda heirate Teichmanns Helmuten.
“ ’s ward jo all Zeit, daß de Beeden endlich zesammenkummen; se sin lange genunk mettenanner geloofen,“ sahten de Leite ins Dorf.
’s is jo immer so: wenn eener heiraten will, da warde schlecht je macht, un wenn eener schtarwet, naher warde jelowet.
Nu kunne awer wurklich keener Jriehls Friedan un ehren Helmut was schlechtes nahsahn.
Un dasse alle beede so lange schon zesammen junken, ohne ze heiraten, dadervor kunnten se oo nischt; dadran woar bloß Jretens Voater schuld, der de Peitsche nich aus de Hand gän un desterwän nischt von e Schwiegersohn wissen wolle.
Jrichls Frieda woar nämlich ’s eenzigste Kind und kriegte derheeme ’s Jut.
Se hotte desterwän oo unger de Borschen ’s Gereiße un ’s Gezerre wie de Fanne vor Fingsten.
Se blebb awer ehren Helmut trei, un der luhs oo nich vun se, wenn’n oo Jriehls Voater vun de Seite ansahk un deitlich ze varschtehn jab, dasse no lange nich daran denken täte, de Wurtschaft ze iwergän.
„Mer kennen jo no warten,“
sahte Helmut allemah, wenn’n Frieda ehr Leed klagte,
„de Hauptsache is doch, daß mer uns trei bleim.“
Endlich awer lähte sich Jriehls Mutter ins Mittel, der ehre Frieda leed tat.
„Willem,“ sahtese zu ehren Mann,
„ich weeß oo joar nich, was de dich denkst von wejen unse Frieda un Helmuten. Die Beeden jehen nu schone e poar Jahre metenanner, un de Leite haln sich all schon lange drewer uff.
Gegen Helmuten kannst doch wurklich nischt sahn; e is ’n ordnlicher Karl, den mer nur jarne han kann.
Seine Sache varschtehte oo, denn der ahle Teichmann schenkt seine Kinner met de Arweet nischt, un Jeld brengete do met – na mehr kannste doch wurklich nich varlangen.
Un dasses unse Frieda jut bein han ward, dadruff kannste dich varlasen; e tuter alles, wassersche an de Oogen absähn kann.
Daß die Beeden uns nich darwen lasen, da biste sicher.
Awwer de kannst jo vorneweg wejen Auszuk alles in Ordnung brengen, daß de beruhijt bist.
Un wenn de no weiter met wurtschaften willst, Helmut ward jewiß nischt dargehen han.
Ich meene awer, de hast dich in dein Läm geplakt genunk un kenntest dich deine poar Jahre no Ruhe gönnen.
Wenn de dich no lange schparrst, mußte gewartig sin, Helmut varliert endlich de Geduld un sucht sich eene annerte.
Unse Frieda würre das nie verwingen kennen.
Willste denn dein eenzigstes Kind unjlidlich machen?“
„Na, machs man halblank,“ meente Voater Jriehl,
„awer wenn de mich de Helle so heeß machst, da muß ich jo wohl kleen beijän. Also meinswejen kennen se heiraten;
ich will keene Vorwarfe han.“
So wurres denn beschtimmt, daß nah de Arnte de Hochzeit sin salle.
Keener woar jlicklicher als Frieda.
„Awer weeßte was,“ sahtese vurzehn Take vor de Hochzeit zu ehre Mutter, „mer wern doch wohl e bißen ville Arweet krein.
Wolln mer nich Schitzens Jretchen inladen, dasse uns e poar Take met helfen tut?
Die tut’s jarne, un der Onkel un de Tante han jewiß oo nischt darjejen.“
Schitzens Jrete woar nämlich eene Kusiene von Friedan.
Ehre Voater, der e Bruder vun Jriehls Muttern woar, woar Tischlermeester in Torgau.
Se woar nich mehr janz junk – se woar all siemzwanzj Joahre – se hotte awer immerno keen abjekriegt, denn se woar e bißchen mäklig.
„Da haste recht,“ meente Mutter Jriehln,
„Jretchen kann uns helfen, die hat derheeme nischt ze varseimen.
Se kimmet jo emah zu de Hochzeit, und da kimmet se äm e poar Take frieher.
Vielleicht kennen mer se bei die Jelejenheet eenen varschaffen, denn es heeßt doch immer, daß eene Hochzeit de annerte nahziehn tut.“
„Na Jretchen nimmt awer oo nich all un jeden; sunsten hättese all lange schon kennen varheirat sin.“
„Ich wees oo joar nich, uff was die no lauert.
Se hott doch no zwee Schwestern darheeme, un da wards doch wurklich Zeit forse, dasse Platz macht.
Na schreibse nur įlei heite no, dasse schpätestens iwer acht Take kummen sulle.
’s woarn no nich acht Take varjangen, da kam Schitzens Jretchen.
Se brachte oo įlei for ehre Kusiene e Hochzeitsgeschenk met:
e varsilwerten Tafelufsatz.
Se hotten uffs Torgauer Schitzenfest in de Jrawwelbude jewonnen.
„De sallst dich doch awer nich so in de Jeldkosten schmeißen,“
sahte Jriehls Mutter, un oo Frieda meente das.
„’s is schon jut jenunk, daß de uns helfen tust.“
Se freiten sich awer doch iwer das Geschenk – se taten wenigstens so.
„Jretchen,“ sahte Jriehls Mutter wiese Kaffee jetrunken hotten,
“ ’s ward bei uns metten Platz e bißchen enge zujehn.
Mer missen doch forsch junke Poar eene Schtowe inreimen, un for de ahlen Leite, die bei de Hochzeit iwer Nacht bleim, missen mer oo Platz schaffen.
Da werschte wohl emah uffen Bodden schlafen missen.
Awer ’s is jo weiter nich schlimm.
Mer ricken ’s Bette jejen de Wand un schtellen de schpansche Wand darvor, die unse Voater neilich uff de Auktion in de Farre jekooft hat. De furchtest dich doch wohl nich?“
„I wo wäre ich mich furchten; mich maust keener,“ meente Jretchen. Sejunk įlei forsch met an de Arweet, un alse oawends zu Bette junk, da woarsche todmiede un schluf oo įlei in.
Den annerten Morjen woarn Jriehls schon zeitig uff de Beene, bloß Schitzens Jrete schluf no janz feste hinger de schpansche Wand.
„Laßt se ausschloafen,“ sahte Mutter Friehl,
,,de Schtadtleite sin nu eemoal ’s Lankeschloafen gewehnt.
Se ward wohl oo vun de Reese no miede sin, un jearweet hottsse jestern oo įlei feste met.“
So jejen siemne kam der Schornschteenfeger Harnisch, um ’n Schornstein ze kehren.
’s woar der Sohn vun Schornsteinfegermeester Harnisch, der vun sein Voater ’s Jeschäft iwernähmen sulle.
„Jerscht musse awer varheirat sin,“ sahte der jedesmal, wennsen frahten, obbe sich nich bahle zer Ruhe setzen wolle.
Edeward, so huß der junke Harnisch, woar e fixer Karl.
E hotte schon lange ’s Alter zus Heiraten, denn er woar schon außen Schneider.
„Mich will keene,“ sahte immer, wennsen dadermet schtichelten.
„Se han alle Angst, daß mersch sähen tut, wenn ich eener e Kuß jäwe. Als obs nich Wasser un Seefe jiwet.“
Edeward machte sich jlei an de Arweet.
E luß de eiserne Kugel in Schornschteen un kloppte ’n Ruß ab.
Naher junke in die Kiche un nahmen außen Schornschteene raus un schitten in die Aschengruwe.
Wie e nu dadermet fartig woar, schteeken wedder uffen Bodden, um seine Letter ze holen.
Wie e nu an de schpanische Wand varbeijunk, da heerte uff emah darhinger was schnarchen.
„Na nu,“ doachte bei sich, „sollten das amende Ratten sin?
Awer nee, so klinget das nich.“
E lehnte de Letter an de Balken un schteek de Schprossen hok, um iwer de schpanische Wand ze kuken.
Harrejeh, was sahke da!
Hinger de Wand ins weiße Bette da lak e junkes hibsches Mächen.
Se hotte sich janz schmucke Backen geschloafen.
Zwee dicke braune Zeppe hingense vun Kopp bis uff de Bettdecke.
Die Hände hottese uff de Bettdecke geläht, daß mer de weißen Arme sehen kunne.
„Wie e richtger Engel,“ dachte Edeward.,
E schteek no noch eene Schprosse höger un bog sich nah de Seite um no besser kuken ze kennen.
Vun die Bewäjunk awer kam de Letter ins Rutschen, un hoste nich jesähn, ehe nahn Balken jreifen kunne – pardautz! sauste Edeward iwer de schpansche Wand weg un met seine rußigen Sachen mangs scheene weiße Bette un jeroade nems Mächen hen.
Jretchen wurre munter un riß de Oogen uff.
Da sahkse nu nem sich uffs Bette den schwarzen Karl, der de Oogen vardrehte, daß mersch Weiße drin sahk, was sich in den schwarzen Jesichte janz furchterlich ausnahm.
Se kriegte e furchtbaren Schrecken, schtießne lauten Angstschrei aus, schprank uff un rannte ins Nachthemne de Trepp nunger.
Jriehls Mutter kam jeroade metten Arm vull Wäsche aus de Owerschtowe.
„Der Deiwel, Tante, der Deiwel!“
schreek Jretchen un klammerte sich ahn se an.
Se bewerte an janzen Leiwe.
„Awer, Mächen, was is dich denn? De hast wohl schlecht jetreemt?“
Da sahkse ’n Schornschteenfeger, der wie e bejossener Pudel de Treppe runger kam, un da junkse e Licht uff.
Als awer Jretchen de schwoarze Jeschtalt bemarkte, da schreekese wedder:
„Der Deiwel, der Deiwel!“ un varschteckte sich hinger Jriehls Mutter ehren breeten Ricken.
„Awer Mächen,“ sahte die, „das is doch keen Deiwel nich, das is doch bloß unse Schornschteenfeger. Der tut dich nischt.“
Edeward blebb var de beeden Weiwessen schtehn un wolle was sahn.
E brachte, awer nich įlei was raus un vardrehte bloß de Oogen, dasses Weiße vorkam, was wedder janz furchterlich aussahk. Jretchen varkroch sich immer sätter hinger ehre Tante un wimmerte janz arbarmeglich.
„Na, Schwoarzer, da jehnse doch weg hiesode,“ sachte de Jriehln argerlich.
„Se sehn doch, wiese sich vor se furchten tut.“
Edeward schlich de annerte Treppe runger, wie der Lohgerwer, den de Felle furtgeschwommen sin, nahm sei Handwarkszeik un junk zun Hause naus ins Dorf.
De Arweet wollen awer heite joar nich vun Flecke jehn.
Immer mußte an das hibsche Mächen denken un wie e bei se uffs Bette jefallen woar.
Was die wohl vun’n denken mußte?
E hätte sich kennen selwer ohrfeigen.
Awer Edeward wußte, was sich geheert.
E machte heite bahle Feieroawend un fuhr mets Road heeme.
E wusch un kämmete sich, zok seinen Sunntaksanzok an un machte sich janz fein.
Naher holte’s Road wedder außen Schuppen un wolle furtfoahren.
„Nanu,“ sahte seine Mutter, „was is denn heite in dich gefoahren.
Du hast dich jo jeschniegelt un jebiegelt, als ob de zu ’ner Festlichkeet wolltest. Wo solls denn schone wedder henjehn?“
„I hawwe was varjessen,“ sahde Edeward – un furt woare.
Ungerweg koofte bei’n Järtner Walter e Schtrauß Rosen un fuhren Weg zerick, den er var zwee Schtun’n gefoahren woar.
Alse bei Jriehls zer Hoffstiere nin kam, da schtund Jriehls Mutter in Hoff un fitterte jeroade de Hinner.
„Da is jo der Schwoarze schone wedder“, meentese varwunnert. „Meine Nichte hot mer alles derzählt.
Das is jo eene scheene Jeschichte, was se da heite frieh jemacht han.
„Ach, Frau Jriehln, seinse mich nich beese; ich kunne wurklich nischt darvor. Ich wolle bloß ’n owerschten Schiewer vun Schornschteen nachsähn, un da is mich de dumme Letter abgerutscht un ich bin runger gefalln.“
„Ja, un ausgerechnet uff mei scheenes weißes Bette.
Na, das sahk jo scheene aus. Mer hans įlei abziehn missen.“
„Das tut mich jo sehre leed, awer ich kunne wurklich nischt darvor. Ich kumme dessertwän, um mich bei das Freilein ze entschuldigen. Wo isse denn?“
„Na, da jehnse nur nin. Jretchen is in der Schtowe. Ich kumme oo įlei.“
’s Harze bubberte Edewarden doch janz geheerig, alse an de Schtomstiere kloppte un de Tiere uffmachte.
Jretchen saß drinne vorn Hoofen Jescherre.
Se wurre janz varlähn, alse Edewarden metten jroßen Rosenschtrauß sahk.
„Wie e Freier,“ dachtese bei sich.
Edeward brachte seine Entschuldigung vor, dasse nischt darvor jekunnt hätte, und wiesen so sehre leed wiere, dassersche so derschreckt hätte, un se solle desterwähn nich beese uffen sin.
„Ja,“ sahte Fretchen un kukten janz freindlich an,
„wenns so is, da darf ich jo oo nich beese sin, denn da woarsch äm e Unfall. Hoffentlich hanse sich keen Schaden darbei jetan.“
„Ach nee,“ meente Edeward treiherzig, „ich bin jo so weech jefalln.“
Se wurre wedder rot bis hinger de Ohren, schoben e Schtuhl hen um sahte:
„Awwer setzense sich doch Harr Harnisch. Un hanse oo scheenen Dank for die scheenen Rosen. Die sin jewiß aus ehren Joarten?“
„Ei freilich,“ schwindelte Edeward.
„Sehnse“, sahte Jretchen nahner Weile un kukten freindlich vun de Seite an, „wennse heite frieh so wie jetzt jekummen wieren, da hätte ich mich oo nich vorse gefurcht.“
Wie nu Jriehls Mutter in de Schtowe kam, da wunnertese sich e bischen, weil de Beeden so freindlich mettenanner taten.
“ ’s wiere ejentlich e janz hibsches Poar“, dachtese bei sich.
– Na jo, de Weiwessen sin jo immer įlei darbei, wennse zwee zesammenbringen kennen.
Als Frieda vuns Feld kam, da derzählte ses ehr įlei, daß der Schwoarze metten Rosenschtrauß dajewäsen wiere un bei Jreten Abbitte jetan hätte.
„Was meenste denn,“ sahtese,
„wolln mern nich for Jretchen zer Hochzeit inladen? Mer han sowieso keen passenden Harrn vorse.“
Frieda woarsch zefrieden un Jretchen oo.
Un’s wurre wedder emah woar, daß eene Hochzeit de annerte nach sich zieht.
Vurzehn Take nach de Hochzeit fuhr Edeward schon nach Torgau, um sich bei Jretens Eltern ’s Jawort ze holen, un e poar Take druff schtand de Varlowung ins Torgauer un ins Wittenbarcher Kreisblatt.
De Beeden sin nu all schon e poar Joahre varheirat, un sin oo schon zwee kleene Schornschteenfeger da.
Edeward is seine Jrete no männichesmah in Arm jefallen, awwer ausjerissen isse varn nich meh.
Se sin sehre jlicklich mettenanner, awwer wie se sich kennenjelarnt han, das sahnse keenen.
Mich hotts Jriehls Mutter derzählt, wie ich vorigtes Joahr zun juten Montak beis Jingste vun ehre Frieda Gevatter schtund.