Das ist immer mein Wort jewest, un das is do heite na so.
De jroße Leite han oo äre Sorjen, wie se sällen s Jeld ungerbringen, un se brauchen sehre vill Leite, un die kosten Jeld, vun de ville Steiern joornich ze räden.
Jemauset ward oo sehre bei se, denn vun uns kleene Leite kennen se nischt nämn, mir han jo selwer nischt, nur jroade, was mer selwer
brauchen far unse Veh. Wer Veh hat, der muß oo mausen, wenn sein Zeick will fett krein.
Das is oo son ales Sprichwort.
Abs woar is, weeß ich niche. – Na, wemmer sich nu so en janzen
Summer mit seinen kleenen Kroam jeplackt hat, denn freiet mer sich, wemmer immen Harwest kann ne Zicke schlachten.
S, Schwein loaßen mer bes ze Weihnachten; erscht missen de kleene Kartoffeln alle wern.
Nu jiwwets jo Leite, die soan, se kennen keen Zickenfleesch essen.
Wenn se awwer vunnen Flescher das teire Hammelsleesch koofen, denn is das was Feines! Un meestlich isses oo man blos Zicke!
Wu fällen denn oo de janze Hammels her kummen?
Mer sieht da joar keeneSchoaf mehr un der ale Kruzius vun Proate un der ale Hibsch vun Eitsch, die met de Schoafe uf de Brache zochen, die sin oo oll lange tot.
Awwer zum Andenken an die ale Schäfersch met ären Strickestrump doa singen se bale in jeden Jesankverein met Vorliebe Schäfers Sonntagslied:
Das ist der Tag des Herrn!
Un ich hawwe jo joarnischt derwedder, das is en sehre scheenes Lied, awwer uf de Zicken loaß ich doarum da nischt kummen.
Na, kortsch un jut, mir schlachten ne Zicke un mir essen se oo, un se schmeckt uns sehre jut.
Zus eerschte Middagesbrot doa jiwwets Tiegelworscht met runde Kartoffeln. Doa schnippert de Fraue en poar Heller ale Semmel un weecht se in Milch, denn wards Blut durchen Durchschlag nin jejossen, in de Pfanne orntlich Speck un Ziwwel jebroaten un denn kimmtes Blut met Milch un Semmel doa nin, recht scheen Jewarze nan, Sahlz un Feffer un Neijewarze un en bischen Lorweerblatt un denn recht scheen durchjebroaten un meinshalmn ne saure Jurke derzu. Doa tausch‘ ich met keenen Keenig! Die kennen sich oo nur satt essen. Un weil se alle Dage was Feines han, machen se sich zerletzt joar nischt mehr draus.
Sunndages jiwwets denn Kartoffelbrei met jebroatene Lewwer un zu de Karmse ne orntliche Pfanne vull Broaten.
De Keilen un de Vorderblätter lät mer eerscht ne Woche in Schlappermilch un denn broaten mer se met Speck un Butter un Buttermilch innen Backoben.
Awwer doa ward je spachtelt!
Der Moagen un de Lunge ward sauer injemacht zu Limmel un denn met sauer un sieße Soße jekocht zu Kartoffeln.
Das schmeckt oo sehre scheen!
Doa hammer jut un jarne 4 Wochen Fettlebe, wemmer ne Zicke jeschlacht han un wenns ne ale woar, na länger.
Natürlich, wemmer janzen Dack annen warmen Oben sitzt un nischt macht, denn ward eenen das labbrige Zeik bale äwwerdreeße, mer muß sich ämnder hungrig arweeten, un das kennen mir, Jott sei Dank. Denn innen Harwest is oo na allerhand Arweet eerscht met Mistfoaren und Säen un denn jehts Holzhacken los.
Straue muß mer oo harken. Mer muß oo moa en Joartenzaun flicken un an de Schweinebucht en Brett annoageln. Un wenn janz schlechtes Wetter is, denn sitzen mer in de Kiche un schnippern
Harkenzähne odder bingen Besen.
Uns ward de Zeit nich lank. Drum denk ich so in meine dumme Jedanken, wem mer so vill vun arweetslos heert un vun Hunger un Elend. ’s wiere besser, de Leite säßen nich so dicke in de jroße Städte, wuse nischt ze brechen un ze beißen han un ploageten sich liewer ufs Dorf, denn hädden se Arweet un oo Brot un kiemen nich uf dumme Jedanken.
Denn doaderzu han se joar keene Zeit, wenn se äre bischen wollen in Stande han. Un wie freiet mer sich ins Frihjoar, wenn innen Joarten de eerschte Schneejlöckchen bimmeln un de Streicher jriene
Spitzchen krein un wemmer en bischen Jras kann holen far de Zicken un en poar Disteln farsch Schwein.
Un jeden Dack erlewet mer was Neies un keener is wie der annere. Jesund bleiwet mer oo, denn zus Krank sin hat mer joar keene Zeit. Wer soll denn s Veh besorjen un de Kartoffeln stechen.
Un schließlich is nischt jesinder wie richtige Arweet, denn ward mer recht scheen miede un kann in de Nacht schloafen unmacht sich keene Sorjen.
Es bleiwet ämnder mein Wort:
Ein kleines Gütchen – ein frohes Gemütchen!
van alen Besemann
Quellen: Vun ale un neie Moden
(Kleine Erzählung in der Mundart der Wittenberger Elbaue)
