Letzt wiere mich bale der Apptit varjangen, wu mich ne Maus in meinen scheenen Schwarzsauer varsoffen woar, awwer zundertalleweile kunne wo menchen der Apptit aus janze Lämn varjehn, wenn e denkt, was innen Winter wärn sall.
Eene Fabrike noa de annere macht zu, un de Arweeter missen uf de Stroaße rumlungern. Un weil se keen Jeld han, dasse was koofen kennen, doa macht wedder ein Jeschäft nas annere zu, denn was
helft de scheenste Woare, wenn se keener kooft. Un doa wärn denn wedder so un so vill Leite brotlos. Un der Bauer kann janzenjoar nischt wärn, wenn e far seine Kartoffeln nich moa das kreit, was sen selwer an Arweetslohn jekost‘ han, un wenn de Schweine billjer sin als wie was e far Futter ningestochen hat un was e far Steiern un Varsicherung bezoalt hat.
Ja, wenn das so weiter jeht, denn drehet sich bale keen Rad mehr.
Hat der Bauer Jeld, denn hats de janze Welt. Zund hat awwer de janze Welt keens, nich moa de reiche Engländer.
Na in de Jroßstadt, wu se nischt innnen Keller un innen Stall han, doa is jo das ville schlimmer wie bei uns ufs Dorf.
Mir han unse Schwein innen Stall, das schlachten mer ze Weihnachten, denn hammer Worscht un Speck un doa hammer s janze Joar was ze kochen.
Nadierlich alle Sunndage Kottlett un Oabends en Teller vull Schweinejehacktes, das hammer niche, awwer das is oo nich
neetig un mir vardarmn uns nich en Moagen bei unse harte Schwoartenworscht.
Doa kammer joarnich so vill essen, weil se vill ze zach is, doa muß mer lange kauen, bes mer se kleen kreit.
Das is alleene ne Arweet.
Awwerhaupt, wemmer zund so vill von arweetslos heert – bei uns ufs Dorf hat mer eejentlich immer Arweet. Wemmer sein bißchen Joarten un Acker hat, doa hat mer ejal ze tune.
Ins Frihjoar lauert mer all, bes der Schnee weg is, un s is so dreehe, daß mern Mist aus en Stall karren kann un en Joarten jroamn, un denn wärn zereerscht moa Mohrriemn jeseehet, denn die nehmen
sich Zeit, bes se keimen. Denn kimmet der Sallat un de Runkelriemn un en bißchen Spinnat un en poar Schoten.
Vill jo niche, denn zu das feine Jemiese braucht mer Zeit, un die hammer niche.
Awwer en poar Ziwweln un Peterzilche un Meiran zu de Lewwerworscht muß mer jo doch han un noaher en poar
Jurken un Karwese, de jriene Bohnen nich ze varjessen.
Un weil unse Mutter so sehre far Blumen is, doa seehet se oo
en poar Astern un Reseda un Kressen annen Joartenzaun, das sieht denn scheene bunt innen Harwest, un en poar Jeorginenknollen stechen mer oo, die hat mich Scheibens Mutter in Pannicke geschenkt.
Wenn de zeidige Kartoffeln raus sin, denn setzen mer de Jrienkrautpflanzen, die mer na en Sallat jeseehet han, denn hammer
oo innen Winter was ze kochen zus Pökelfleesch.
Doa jiwwets Sunndages Fleesch un Kleese un Mondages Kartoffelstickchen met en bischen jereicherte Blutworscht un recht vill Meiran un Dienstages Jrienkraut un Mittwochs Kartoffelkleese met en bischen Speck nanjebroaten un Donnerstages Kohlriemn un Freidages Reis un Reiwenudeln un Sunnoamds Kartoffelbrei, denn is de Woche varbei un es fenget wedder vun vorne an.
Doa braucht sich unse Mutter nich ze steimen:
Was sall ich denn bloß morjen kochen? – das weeß se vun janz alleene un bein Fleescher braucht se oo nich ze loofen.
Doa hammirsch da ville besser wie de Leite in de Stadt, die ejal
s Portmannee in de Hand nehmen missen un de Jroschen zählen, abs na zurecht zu en Litter Milch. Doafor hannmir jo unse Zicke. Nadierlich Arweet hammer tichtich, un mir missen die poar Fennje
Vardienst vun de Besen sehre zesammennehmen, wemmer uns en poar Farkel koofen wollen un ins Frihjoar en poar kleene Jänse.
’s Futter is oo nich umsunst, vun pure Disteln un Kartoffeln ward keen Schwein fett, doa muß ne janze Masse Anstampe sin.
Awwer innen Harwest ist‘ da scheen, wemmer was schlachten kann un wenns jut jeht, kammer oo en Schwein un en poar Jänse varkoofen, denn een Schwein alleene fittert sich nich, zesammen fressen se beffer.
’s is jroade wie bei de Menschen:
Eener alleene is nich scheene,
Awer eener alleene un eene alleene
un denn alleene – das is scheene.
So soat mer, wemmer jung is, awwer wemmer met Seine ahlt geworrn is un mer kann in Winter met se in de warmе Stuwwe sitzen, das is oo scheen.
Innen Harwest is jo na allerhand Arweet mets Kartoffellangen, zemoale wenns ejal ränt un es schmiert un baart denn so, un nu janzenjoar beis Rübenausmachen, doa bleiwet eenen der halwe Acker an de Stiwweln hängen.
Awwer wemmer denn heeme kimmet un mer kann die ale schwere
Stiwweln vun de Beene ziehn un sitzet denn bei ne warme Tasse Kaffe un ne Musbamme in de Stuwwe, un in Oben bullerts Feier schen, das is oo jemietlich.
Mir han jo Zentralheezung so jut wie de Reichen, eene Stuwwe hammer blos un feiern tun mer vun de Kiche aus, doa kochen mer denn jlei s Essen un de Futtertöppe farsch Vieh.
Ne jude Tasse Kaffe leisten mer uns oo, mer han jo de Mohrrüben selwer. Die wärn nas Brotbacken in Backofen schwarz jedreehet ufs Kuchenblech un denn innen Marschel kleene jestampt.
Mir loaßen unse Jeld nich ins Ausland jehn far die teire Kaffeebohnen.
Doback zus Feifestoppen bauen mer oo selwer.
Far mich kennen de Franzosen uf äre Joldklumpen sitzen.
Ich will joarnischt han.
Was frag‘ ich viel nach Geld und Gut,
Wenn ich zufrieden bin.
Gibt Gott mir nur gesundes Blut,
So hab‘ ich frohen Sinn,
Und sing mit fröhlichem Gemüt
Mein Morgen- und mein Abendlied.
van alen Besemann
Quellen: Vun ale un neie Moden
(Kleine Erzählung in der Mundart der Wittenberger Elbaue)
