Nu ja, soade der ale Knurr, met de Flaumen, doa hodden mer jo keen Jlicke, die hodden se uns ähmder jemauset.
Awwer weil mer da innen Winter was
ze essen han will, doa hammer uns en poar Barnen jedreehet.
Es woar doazemoa jroade sun Owestjoar wie zundertalleweile, un doa hodde uns Jarbersch Mutter, dies immer sehre jut met uns meente, en jroßen Korb vull Barnen jejän.
Na was nu en bisken mudicke woar, das hat unse Mutter innen Oben jedreehet, un wie mer uns denn ze Weihnachten ne Jans schlachten taten, doa hat se recht vill Barnen ans Schwarsauer nan jekocht. Schwarzsauer eß ich sehre jarne; Fleesch is jo nich vill drin, den Moagen nimmet sich unse Mutter, se soat, se kann die ale Knochen nich mehr beißen, un ich kreie denn de Poten un en halwen Flettich.
Das is oo nich vill, de Fledderwische schneiden mer da ins Jelenke ab, daß mer n Dreck ufs Kehrblech kehrn kann.
Na, wenn ich denn so an meinen Flettich rumknabbere,
denn kuke ich immer moa so jieperich na den scheenen dicken Moagen, awwer denn soat unse Mutter, eß man tichtig Barnen, die sin oo weech.
Na nu woarsch Silvester geworn un ich jang denn bei Deewerten na de Schenke, doa jabs Freipunsch far de Stammjäste.
Na ich trinke da jeden Eerschten doa meinen kleenen Sießen, un wu mersch janze Joar sein Jeld hentrett, doa will mer da oo moa jehn, wenns moa nischt kost!
Ich kippe nu een Jlas hinger vun das sieße Zeik un na en Jlas, un weils mich jroade schmeckte, oo na s Dritte.
Denn schluks zwelwe un mer schrechen alle:
Prosit Neijoar un de Klocken litten vunnen Dorm, un s woar sehre feierlich. Na nu kunnen mer jo eejentlich heeme jehn, awwer s woar
na so sehre vill Punsch doa, un den mußten mer da alle machen, das sieht jo zu veracht’t aus, wenn so vill äwwerlee bleiwet. Na, met Todesverachtung kippten mer den letzten Rest oo na nunger.
– Weeßte, drin in de Jaftstowwe, doa woar mich janz wohl, awwer wie ich nu raus kamb an de frische Luft, ei heere, do mustich sehre dichte an de Heiser lang jehn un immer jrawweln, bes ich unse Diere funk. Na ich drickte se denn sehre leise uf, dasses unse Mutter nich sälle heern, daß ich so späte heeme kamb, denn die kann et joarnich leiden.
Es woar man een Jlicke, se säjete Bretter un doa wacht se so leichte nich uf. Awwer Licht wull ich da nich machen.
Nu muß ich dich soan, ich hodde seit ze Middage nischt Rechtes innen Leiwe un vun den alen sießen lawwerigen Punsch woarsch mich richtig en bischen schwummerig ummen Moagen jeworn.
I, dacht ich mich: in de Kammer stehn jo na de Schwarzsauerklöse, doa warschte dich drewwer her machen.
Na, ich tappe mich nu innen Dustern in de Kammer un fische mich eene Barne noa de annere raus.
Ich kreie se annen Stiel un lutsche se ab un se sin oo alle sehre scheene weech. Blos die eene, die will joarnich rutschen, ich kaue un kaue un kreie se nich kleen, nanu denk ich, was is denn hie los, die is jo eеmoa zu zach. Na, ich schloae denn Licht un will se mich moa bekuken. Nu, was sall ich dich saon, weeßte was es woar? – Godd‘ ich doa ne Maus annen Schwanz, die woar doa rin jefalln un varsoffen. – Awwer weeßte, doa wiere mich bale der Appetit varjangen!
van alen Besemann
Quellen: Vun ale un neie Moden
(Kleine Erzählung in der Mundart der Wittenberger Elbaue)
