Krausens Erich wolle heiraten.
Seine Braut – Else huße – woar sehre weit her, – aus Kleenhagen in Pommern. E hottese in Schtendal kennen jelarnt, wue Owerkellnär ins Hotel zus „Joldene Lamm“ woar, wasses allerfeinste dort sin sall. Nah de Hochzeit wulltense alle beede ene Bahnhofswurtschafft iwernehmen, awer zundertalleweile woar Erich derheme bei seine Eltern in Dorne.
De Hochzeit sulle natierlich bei de Eltern vun de Braut in Kleenhagen jefeiert wern. Wenns nu freilich oo sehre weit furt woar, Krausens Voater wolle desterwähn doch metkummen, un oo Erichs Bruder Walter aus Wittenbarch met seine Frau un de beeden Kinner Jretchen un Max. Bloß Krausens Mutter wolle nich met, weilse zundertalleweile nich recht uffen Posten woar un sich var die weite Reese furchten tat. Erich mußte also metten Voater alleene vun Dorne nah Wittenbarch foahrn, wuse met Maltern un seine Familije uffen Bahnhoff zesammentreffen wullten.
E hotte sich sehre fein jemacht. E hotte e neien hellen Summeranzok an un drewer e jrauen Summermantel unnufss weiße Owerhemde e neien bunten Schlips – na ja, forn Breitjen jeheert sich das oo.
’n Frakanzok hotte metsamst de weiße Binde un’n Ziehlinder in Reesekoffert. Der Ziehlinder woar so e neimodscher zus Zusammenklappen.
Darnem schtak jo nu freilich Krausens Voater sehre ab. ’s woar zwoarschtens schon sehre woarm, denn mer hatten bahle Fingesten, awer e hotte doch no sein ahlen Wintermantel angezochen, weile keenen Summermantel nich hotte un son, „Hochmutsrock“, wie er’s heeßen tat, nich leiden kunne. E meente, was jut for de Kälte is, das wiere oo jut for de Hitze. Uff Tallje wolle awer oo nich jiehn; e sate,
mer brauchtes doch nich jlei an Bratenrock ze sähn, daß mer uff de Hochzeit reesen tat.
Erich hotte zwarschtens jewollt, e sulle sich zu seine Hochzeit e neien schwoarzen Rock machen lassen, weil doch sein ahler schon janz aus de Mode wiere un schon jrienlich schimmern tat.
Awer da woare scheep anjekummen.
„Der Rock is all no lange jut“, sate sein Voater, „un wenn de dich met mich schämen tust, da kann ich jo heeme bleim“
Da mußte Erich schtille sin, denn e wußte, in solche Sachen varschtund der Ahle keen Schpaß nich.
Wiese nu alle beede in Wittenbarch ausen Eilenburger
Zock schteeken, da schtund Walter met de Frau un de Kinner schon da und wartete uffse.
Jretchen nahmen Jroßvoater de jroße Hutschachtel ab, umse ze trahn. „Jroßvoater“, sahtese, „awer die Schachtel is schwer. Was haste denn da drinne?“
„Na, Mächen, was wards denn sin? Mein Ziehlinder isses – natierlich son richtger un nich son varricktes neimodsches Ding, was mer ierscht zesammendrickt un naher, wenn mern uffsetzen will, ierscht wedder uffklappen muß, dasses knallt un de Leite darnem zesammenfoahrn.
E is no vun meine Hochzeit, awer no sehre scheene. Ich ham dazemah vun Schimmeln in Wittenbarch jekooft. Na, un was hawe ich denn no drinne – meine Jummimanschetten, weil ich die doch uff de Reese nich brauche, un wozu salln mich denn die Dinger immer um de Jelenke klappern. Ja, un denn hawe ich no eene Bratworscht in Ziehlinder ninjetan. Mer foahrn doch nah Pommern, un die in Pommern tun sich immer sehre dicke met ehre Jänsebriste, un da sallnse ma sähn, daß mer in de Elbaue oo was jutes ze essen han. Ich jlowe, sone scheene Worscht kennense in Pommern joar niche. Ich hawe mich oo de jreeßte un scheenste ausjesucht.“
Der Zock, der nah Barlin fuhr, koam un se schteeken allehoofe in.
Die beeden Mannsen varschtauten de Reesekofferte ins Jepäcknetz, un Jroßvoater Krause lähnte sich so recht jemietlich in eene Ecke vuns Kupee un meente: „Nu kanns lusjiehn. Ich were jlei e bißchen Damp machen. Un dadermet jriffe in seine Rockficke un langete seine kortsche Feife raus, un aus de Mantelfike zoke ’n Towaksbeitel.
„Jroßvoater“, sate Max, der seine Oogen iwerall hotte, awer hier darf doch wo nich geroocht wern. Da schtieht: „Nichtraucher!“
„Nee, das jiwets niche“, antwurrte der. „Uff die lanke Foahrt muß ich meine Feife han, sunsten danke ich.“
„Da missen mer em ins Roocherabteil“, sate Walter.
Se treckten nu de Reesekofferte wedder aus Jepäknetz un schteeken in annerten Wagen. Der Zock fuhr nu oo jlei ab.
Krausens Voater hotte wedder eene scheene Ecke arwischt; e langete wedder de Feife un’n Towaksbeitel raus, schtoppte de Feife un dampte nu wie son Fawrikschornschteen.
Ene junke Frau, die uff de annerte Seite saß, kukten ierscht recht jiftig an un jochte met de Hand ’n Rooch furt. Awer e luß sich nich schteern un dampte ruhig weiter. Da funkse janz arbarmeglich an ze husten un machtes Fenster uff.
„Nee, nee“, sate, „das jieht nich, das zieht. Wennses Roochen nich vartrahn kinnen, da missense em nich ins Roocherkupee foahrn.“
„Bauer!“ satese janz laut, packte ehre Sachen zesammen un junk weiter nah hingene.
„Jawoll“, antwurrte Voater Krause, „ich bin e Bauer; awer wenn de Bauern nich wieren, da hätten de Städtersh nischt ze essen. Markense sich das!“
In Barlin mußtense ausschteijen. Se wullten metten Autobusse nahn Schtettiner Bahnhoff foahren, wu der Zock nah Pommern junk. De beeden Mannsen truken de Reesekofferte, un Jrete nahm wedder de Hutschachtel. Wiese nu de Treppe in Anhalter Bahnhoff rungerjingen, da junk uff ema der Bindfan uff, un aus de Schachtel kullerte der Ziehlinder un immer de Treppe länk nunger, un de Jummimanschetten klapperten hingerdrin un oo de Bratworscht.
Der Ziehlinder un de Jummimanschetten koamen an weitesten; se huppten vun eene Schtufe zu de annerte, bisse ungene woarn.
Jrete schreek var Schreken laut uff.
„Du Dumme, was schreiste denn da so!“ sate Max un schtauktese in de Seite. E loff hinger de Ausreißer her, hob alles uff un tat’s wedder in die Schachtel nin un bung ’n Bindfan wedder feste.
„Laß mich de Schachtel trahn“, sate zu se, „Du bist ze dumm darzu.“ Die villen Leite, die de Treppe ruff koamen un das jesähn hotten, lachten helleweg. „Die ahlen dummen Barliner“, brummte Krausens
Voater argerlich, „als ob sowas nich passieren kinne, wenn de Schtrippe uffjeht. Un wiese alle gaffen, die Schpärlawen! Wasses da wo ze sähn jiwet!“
„Nu“, meente Walter un lachte, „son fein Ziehlinder un sone scheene Bratworscht hanse in Barlin woahrscheinlich no nich jesähn.“
Wiese nu ausen Bahnhoff rauskoamen, da woar draußen e Lemn un Treimn un e Larm, daß mer beinahe sein eegenes Wurt nich varschtehn kunne.
„Nu, da schlak doch jlei eener länk hen“, sahte Voater Krause, „das is jo een Jekriwele und Jewimmele wie in e Bismiernhoofen. Da is mer jo seines Lemns nich sicher.“
„Ja, da heeßt’s uffpassen,“ antwurrte Malter.
„Frieda, nimm du de Kinner; ich were ’n Voater nehmen.“
Un dadermet schobe ’n Voater sein Arm unger.
„Na, mach’s man halblank“, meente der, „ich bin doch keen kleenes Kind niche“
„Besser is besser!“
Se koamen jlicklich iwern Platz un bis hen, wu der Autobus schtund.
„Foahrn mer om’n oder ungene?“ frahte Walter.
„Voater, ich will om ruff! Da kammer alles besser sähn!“ roff Max.
„Ich oo“, sahte Jrete.
„Un ich mechte mer oo Barlin vun om besähn“, meente ehre Jroßvoater.
„Na, denn man alle Mann an Deck!“
„Nee, die Hinnerletter klettere ich nich hok“, sate de Mutter.
„Ich bleiwe ungene.“
„Ich bleiwe bei dich“, meente Erich, „lasse loofen.“
Der Autobus ratterte nu lus. E mußte alle Oogenblicke tuten, dasse nich met de villen Autos un Motorräder un de Ellektrischen zesammenrammelte oder e Menschen ewerfuhr.
Jroßvoater un de Kinner woaren ’s ierschte ma in Barlin un schparrten Maul un Noase uff. Walter zeigtese de markwurdigsten Jebeide un was sunsten ze sehn woar.
„Wannehr kummen mer denn nahs Schloß un ans Brandenburger Tor un nahs Reichstaksjebeide?“ frate Max.
„Da kummen mer heite ewerhoopt nich hen“, antwurrte sein Voater. „Awer wemmer wedder vun de Hochzeit zerricke kummen, da nähmen mer uns e Tak Zeit un besähn uns alles orndlich.“
„Nu ja, Barlin is jo ene janz scheene Schtadt“, meente Jroßvoater Krause, „awer wohnen mechte ich da niche, das is jo een Jehetze un Jejoche un een Larm, daß mer janz rammdösig in Koppe ward.
Un wemmer da ewer de Schtroaße jiehn will, muß mer ejal jewertig sin, daß mer umjefoahrn ward. Da lowe ich mich doch unse Dorne; da läwet mer doch ruhiger un jliklicher.“
„Da magste recht han, Voater, awer ’s muß doch oo Leite jän, die in Barlin wohnen tun.“
Wiese nu an Alexanderplatz varbeikoamen, wu de jroße Fijur vun de Barolina schtieht, da frate Voater Krause:
„Was is denn das forn unflätschijes Weiwessen sallthie?“
„Das is de Barolina“, antwurrte Walter.
„Das is mich awwer e putzger Noame. Karoline, das hawe ich schon jeheert; so heeßt die eene vun unse Kiehe – weeßte, de dritte rechts im Schtalle – awer Baroline – nee. Mas wernse denn no for Noamen uffbrengen!“
Walter lachte. „Voater, Barolina das sall nämlich heeßen Barlin.
Die Fijur sal de Schtadt Barlin vorschtellen. Desterwähn hotse oo de linke Hand ausgeschtrekt, als wollese de Fremden willkummen heeßen.“
„Na denn scheenen juten Tak oo, Baroline. Awer Not sieht mer die nich an, un wenn alle Barliner Weiwessen so füllig sin, denne kennense froh sin.“
„Das wollense awer doch joar nich, Voater. Heitzetake is doch de schlanke Lienje Mode.“
„Freilich, zundenalleweile is em alles vardreht jeworrn. Ich mechte awer keene sone lanke, dinne Bohnenschtange zer Frau han.“
„De Jeschmäcker vun de Publikümer sin em varschieden.
Der eene ist jarne Honnigk un der annerte schwoarze Seefe, sahte der ahle Jemeenediener Mewius in Dorne immer.“
Wiese nu bein Schtettiner Bahnhoff ankoamen, da koofte Walter for alle jlei de Foahrkoarten, un se junken uffen Bahnschteik, wu schon der Zock nah Pommern daschtund.
Der Jroßvoater schteierte jlei uffs Roocherabteel zu. E arwischte jliklich wedder eene scheene Ecke in Wagen un langete jlei de Feife aus de Rockficke.
„Voater“, sahte de Schwiegertochter, „laß ema deine Feife schtecken; mer wulln ierscht ema friehschticken.“ Se machte ’n Reesekoffert uff un jab ehren Mann un de Kinner ehr Teel.
Wiese nu awer ehren Schwiegervoater oo was jän wollе, da meente der: „Nee, nee, behalt man eiertes. Mer han doch sälwer was met, un sone Worscht wie unse Dornsche Worscht is eire Wittenbarcher Worscht doch niche.“
’s schteeken noch ville Leite in, un der Wagen wurre hellschen vull. Wiese nu allehoofe jefriehschtickt hotten, da langete Voater Krause wedder seine Feife aus de Rockficke.
Walter wollen eene Ziehjarre jän, weiln das met de Feife var de Leite schanierlich woar. „Ne“, sahte der, „roocht ihr feinen Leite nur eire Ziehjarren, ich rooche liewer meine ahle Feife.“
Un dadermet schtakese an. ’s dauerte awer nich lange, da woare injenickt, weile sehre miede woar, denn e woar heite sehre frieh uffjeschtan’n. Dabei rutschten de Feife aus Maul, un de Asche fuhlen uff de juten schwoarzen Hosen. De Schwiegertochter klopptesen vorsichtig ab un schtachen de koahle Feife in de Rockficke.
E markte nischt un schnarchte ruhig weiter.
’s dauerte sehre lange, bisse nah Demmin koamen, wuse wedder umschteijen mußten. Wiese nu uffen Bahnschteik woaren, da schtunden da zwee Zieje. Bei dem eenen schtund:
„Nach Großhagen!“ un bein annerten: „Nach Kleinhagen!“.
„Harrjeh“, sahte uff ema Onkel Erich un wurre janz varlähn,
„nu weeß ich wurklich nich jenau, wohnt meine Braut in Jroßhagen oder in Kleenhagen.“
„Na nu schläts awer dreizehn.“ roff Walter. „Hat denn eener schon sowas jeheert, nu weeß der Breitgen nich, wu seine Braut wohnen tut!“
Erich kriegte e janz roten Kopp.
„Ih jlowe doch, ’s is Kleenhagen. Else hot mich jeschrem, ’s salle e Letterwagen met Sitzen an Bahnhoff schtiehn.“
„Awer doch nich hie in Demmin. Na denn man rin in Zock nach Kleenhagen“, sahte Walter, „darmete uns nich var de Noase wegfährt.“ Wiese nu de Reesekofferte varschtaut un sich jesetzt hotten, da meente Onkel Erich kleenlaut:
„Wißter, ich meene doch, se wohnt in Jroßhagen.“
„Na denn man wedder raus un in Zock nah Jroßhagen!“
Se treckten de Reesekofferte wedder runger vuns Brekt un kletterten in annerten Zock.
Mer saks awer Erichen an, dasse no nich sicher woar.
Walter marktes, un als nu der Schafsnär koam, der for de Kleenboahn die Billjette varkoofen tat, da frahten:
„Heernse, Harr Schafsnär, mer wollen zer Hochzeit foahrn, awer mein Bruder weeß nu nich jenau, ab seine Braut in Kleenhagen oder in Jroßhagen wohnen tut. Kennense uns das wo san? Se heeßt Else
Feske.“
Der Schaffnär kukte Waltern janz vardutzt an, e mochte wo denken, daß dern varklapsen wolle. „Sei maken woll Spaß“, sahte.
„Nee, nee, ’s is so; e weeßes wurklich nich jenau.“
„Doe kann ik sei nu frielich oo keene Utkunft gewen“, meente denne.
Max zuppte Ericher an Ärmel. „Onkel Erich, wie schpricht denn der Mann? Das kammer jo joar nich varschtehn.“
„E schpricht plattdeitsch. Meine Braut kann das oo.“
„Awer was machen mer denn da bloß?“ sahte der Jroßvoater.
„Nu“, antwurrte der Schaffnär, „da müchte ik sei roaten: foahren sei irst nah Großhagen. Un wenn dat nich stimmen deit, denn hewwense vun durt nich to wiet nah Kleenhagen. Awwer sei möten een beten fix maken, de Zuck ward glik furtgeihn.“
„Na denn wedder raus!“ roff Walter.
Se langeten nu de Reesekofferte wedder runger un schteeken in Zock nah Jroßhagen. Beis Rausschteijen blebb Max met de Hutschachtel an de Tierklinke hängen. Der Bindfan riß, un der Ziehlinder metsamst de Jummimanschetten un de Bratwortscht kullerten uffen Bahnschteik.
„Siehste“, roff Jrete un lachte wie’n Kowelt, „in Barlin haste mich ausjeschimpt un oo no jeschtaukt, un nu passierts dich sälwer.
’s is dich schon recht. In Barlin hotten mer wennigstens no Zeit!“
„Halt’s Maul, du Spärrlawe du!“ sahte ehre Bruder.
E jochte hingern Ziehlinder her, der e jroßen Dreckschtreefen jekriegt hotte un taten in de Schachtel, un de Jummimanschetten, die oo e poar jroße Dreckfläcker abjekriegt hotten, schtoppte metsamst de Bratworscht wedder in’n Ziehlinder.
Se woarn kaum in’n Zock nin, da fuhre oo schon ab. Jroßvoater Krause langete sein Feife wedder aus de Rockficke und sahte:
„He, Walter, wie jefällt dich denn das: rin – raus – rin – raus?“
„Nu, ’s is e bißchen anschtrengend – wie beis Manewer: rin in die Kartoffeln – raus aus de Kartoffeln! Ich bin bloß neigierig, ab mer nu richtig foahrn un ab mer heite no henkummen, wu mer henwulln.“
„Argert mich bloß nich no“, sahte Erich.
„Else hot immer vun Hagen geschprochen, un ich hawe nich druff jeacht, abs Jroßhagen oder Kleenhagen woar.“
„Nur Mut, ’s ward schon scheep jiehn,“ sahte der Jroßknecht, „un da woarfes Heifüder um“, meente Walter.
Un ’s junk oo wurklich scheep.
Wiese nämlich nach Jroßhagen koamen un ausschteijen taten, da woar bein Bahnhoff keen Letterwagen ze sähn.
„Paßt uff, mer sin varkehrt jefoahrn“, sahte Max.
De annerten sahten joar nischt, se woarn alle sehre argerlich un
oo miede un hungrig.
Walter junk zun Bahnhoffsvorschteher, der met de rote Mitze un de Fliegenklatsche no daschtund un sich varwunnert die Leite ankukte.
„Heernse, Harr Vorschteher, wohnt hiesote in Jroßhagen e Harr Feske, wu morjen Hochzeit is?“
„Nee, in Jroßhagen nich. Ick glöw, det is in Kleenhagen“, sahte der.
„Na ja, da hammern Sollat! Erick, Erick, min leiw Brauder, wat bist forn Kirl!“ roff Walter, derse zeijen wolle, dasse oo plattdeitsch schprechen kinne.
Awer ’s lachte keener drewer; seine Frau un de Kinner warsch Weenen näher wies Lachen.
„Harr Vorschteher, wie kummen mer denn nu nah Kleenhagen?
Mer missen heite doch no hen, denn mer kennen doch ’n Polteroawend nich varpassen, un was sall denn de Braut denken, wenn der Breitgen nich kimmet?“
„Dat wiere nu frielich een Mallür“, meente der Bahnhoffsvorschteher un lachte.
„Tau Fot kennense all nich loopen, dartau isses to wiet, un met son ollen Woagen geiht dat to langsam. Awer de Koopmann Schmoll hat son Auto. Vielleicht foahrt der sei hen. ’s is frielich blot son lüttes.“
“ ’s muß em jehn, un jeduldge Schoafe jehn ville in eenen Schtall. Scheenen Dank oo, Harr Vorschteher.“
Alse nu bein Koofmann Schmoll koamen un ehre Anliegen vorbrachten, da sahte der:
„Ja, dat is nu son Sak. Henfoahrn na Kleenhagen mücht ick sei woll, awer min Auto is man blot son lüttes Ding. Doar müßten sei sick bannig tausammendrengeln un de Kinner up den Schot nehmen.“
“ ’s ward schon jehn, Harr Schmoll, foahrnse uns man hen.“
„Na, denn man tau“, sahte der un langetes Auto ausen Schuppen.
Se schnallten de Reesekofferte hingen druff un schteeken in.
’s junk jo freilich e bißchen sehre enge zu, denn Jroßvoater Krause woar e wennigg breet, un seine Schwiegertochter woar jeroade oo keene vun de Schlanksten.
Walter nahm Jreten uffen Schoß, un Max setzte sich bei Onkel
Erichen uff de Knie. Wiese nu zus Dorf raus woaren, sahte Jrete: „Awer ich hawe Hunger!“
„Ich oo“, sahte Max. „Mer han awer doch nischt mehr“, antwurrte ehre
Mutter. „Ihr hott jo ungerwegs immerzu jefuttert. Da mißter em woarten, bis mer nah Kleenhagen kummen.“
„Och, das dauert amende noch lange, bis mer da was ze essen krein“, meente Irete.
„Jroßvoater hot jo in de Hutschachtel no eene Bratworscht.“
„Richtig, de Bratworscht!“ roff Walter.
„Ich hätte oo Appetit. Voater, da hilft nu alles nischt, de mußt de Bratwortscht rausricken. De wulltest dich zwoarschtens darmet dicke tun in Kleenhagen, awer wenn die oo bloß eene Koste krein, desterwähn sähnse doch, dasses in de Elbaue sehre jute Worscht jiwet.“
Jroßvoatern paßtes zwoarschtens nich, dasse die scheene Worscht herjähn sulle, awer sein jutes Harze kunnes doch nich met ansähn, das de Kinner hungern sallten.
Max hotte de Bratworscht schon ausen Ziehlinder gelanget und hultse ’n Jroßvoater hen, un Walter langetes Messer aus seine Ficke un hultsen oo hen. Na un da blem em weiter nischt ewrig.
E nahms Messer un jurkelte for jeden e tichtiges Schticke Bratworscht ab. Awer e hibshes Enne darvun tate wedder in Ziehlinder.
„Ene Koste missen se doch wenigstens han“, meente.
Der Weg nah Kleenhagen woar nich sehre scheene; e woar vull Lecher, uns schtaukerte mächtig, wenns Auto drewer foahrn tat, dasse drinn immer hok huppten.
Se koamen awer jliklich nach Kleenhagen. Un wiese nu nah Feskens henfoahrn taten, da schtunden da varsch Haus de Musekanten un bejrießtense metn kräftgen Tusch.
Wie nu de Braut ehren liewen Erich jesund sahk, da fuhlsen jlei um Hals un jaben var alle Leite e tichigen Schmatz, denn se hotte jejlowet, ’s wieren ungermegs e Unjlicke passiert.
De Musekanten awer blusen das scheene Lied
„Freit eich des Läwens“.
Se junken nu allehoofe in de Schtowe un arzählten, dasse sich varfoahrn hotten, weil Erich nich wußte, wu seine Braut wohnen tat.
Da hansen denn alle tichtig ausjelacht, awer e nahms nich iwel un meente bloß:
„Wer’n Schoaden hot, der braucht forn Schpott nich ze sorgen.“
Un’s wurre e recht lustger Polteroawend un eene sehre scheene Hochzeit.
Richard Erfurth
Ene woahre Jeschichte in der Mundart der Elbaue
