Wie Pannen Fritze na Bargs gekummen is, das weeß ich sälwer nich. E wohnte ins Gemeenehaus un woar Gänseharte.
Zwischen Bargs un Kämbarg läht doch de Gänsefurschte, un da hitte Fritze immer de Gänse vun de Bauern.
Morjens holte de Gänse, tatse ’n Tak ewer hieten un brachtese oams weller heeme.
Eenes Morjens da treb Fritze de Gänse weller naus. An Teiche koame immer nich jut varbei. Da machten nämlich de Gänse immer nin. Fritzen woarsch jo enjahl, der hottes nich so eilig. E sezte sich unger de Papeln – da schtun’n nämlich zu die Zeit no mächtge Dinger. Wie nu Frike da sitzt, da kimmet der Wachmeester, schtelt sich hinger eene Papel un lauert uff de Postkutsche. Dazemah fuhr nämlich no de Postkutsche vun Kämbarg na Bargs.
Der Wachmeester dachte: ,“Wenn der Posteljon wedder e Blinden metgenummen hot, den läßte varsch Dorf ausschtein.“
Fritze hotte’n Wachmeester awer bemarkt un dachte:
„Den wäre ich ower heite ma tichtg argern.“
Wie nu de Postkutsche bahle ran is, schreit Fritze:
„Postelljon, Schpitzhut! Postelljon, Schpitzhut!“ un zeigte na de Papel, wu de Wachmeester schtund.
Der Postelljon winkt met de Hand, als wie e weeß schon un fährt trabb varbei.
Wie nu der Wachmeester de Kutsche argerlich nachkukt, kimmet Fritze uffen zu un saht:
„Etsch, etsch!“
„Was fällt dich denn in, du Esel“, fährten der an.
Fritze macht e Schprunk nin in Teich un schtieht bis an de Kniechen ins Wasser un saht weller:
„Etsch, etsch! de hast mich jo doch nich jekriecht.“
Was wolle nu de Wachmeester machen?
E lachte un junk seine Wege. – – –
An een Take nu da woarsch mächtig woarm. De Gänse,
die lächzten wie nich gescheit un krauchten in Schatten.
Fritze lak unger eene Eeche; sein Brotkower hotte an e Ast gehangen.
Da kimmet eene Kutsche vun Kämbarg her, un da drin soaß der Harr Amtmann.
Fritze schreet uff ema: „Hilfe! Hilfe!“ Der Harr Amtmann dachte: „Nu, was is denn da Ios? Fahre ma newer“, sahte zu sein Kutscher.
Wie e nu ran kahm, sahte zu Fritzen:,
„Worum schreist e denne um Hilfe?“
„Nu, weil ich Hunger hawe“, sahte der.
„Na denn muß ich dich wo was ze essen gän.“
„Jo“, meente Fritze, „de brauchst bloß mein Kower vun Aste ze langen. Ich kumme nämlich nich hok var Hitze.“
Der Amtmann wurre janz rot var lauter Arger, weiln Fritze so jeleimt hotte. E nahm sein Kutscher de Peitsche aus de Hand un wolle Fritzen eens ewerziehn. Der awer – haste nich jesähn, eens, zwee, drei, de Eeche hok. Der Amtmann reechte met de Peitsche nich nuff un mußte weiterfahrn, un Fritze lachte sich eens. –
Wie nu de Kollngruwe uffjemacht wurre, da hanse de Gänsefurschte zu Acker gemacht, un Fritze wurre nu arweetslos.
Da lusen de Bargser Fritzen Arweet machen, die e zehnjähriger Junge varrichten kunne, denn mehr kunne mer vun’n nich varlangen.
Een Tak da kimmet nu der Harr Paster an Fritzen varbei:
„Fritze“, sahte zun, „willste nich mein Kiß in Joarten breetkarrn?“
„Jo“, meente der, „vun wen hasten denne holen lasen?“ ,
„Awer Fritze“, meente der Harr Paster, „mer saht doch nich zu jeden du. Mer muß doch e bißchen Ahnschtand zeigen.“
Fritze denkt:, „Das will ich mich marken.“
Wie e nu bein Paster ’n Kiß karren tat, da schtiehten der in de Quere. Fritze denkt an sein Ahnschtand un saht:
„Jehnse wag, Harr Paster, sunsten ewerkarre ich dich.“ – Der Harr Paster junk beiseite un dachte:
„In den is emah nischt nein ze breng’n.“-
Was Vogts kleene Mahd woar, die sahte immer, dasse sich var nischt furchten täte – o nich varn Deiwel.
Der Knecht wollest nu ema ze fürchten machen, un daderbei solle Fritze helfen. Eenes Oamds bungense Fritzen in e Bund Schtroh in, un e mußte sich so in de Scheine schtelln. Dernähm lähtense no e anertes Schtrohbund. Nu junk der Knecht zu de kleene Mahd un sahte, se solle no de zwee Bund Schtroh aus de Scheine holen.
„Zu was denn das no?“ sahtese. , “ ’s is jo schon janz dunker.“
„Nu, ich denke, de furchst dich nich?“ sahte der Knecht,
„denne kannstese doch oo no holen.“
„Nee, ich furchte mich oo nich“, meentese, „das wurschte jlei sähn.“
Se junk also in de Scheine un nahm ierscht das eene Bund. Wiese nu zu de Scheine raus is un will die Tiehre zumache, kimmet uff emah das annerte Bund Schtroh hingersche her.
Se schmeißt das Bund weg un left nahn Kuhschtall un schreit:
„In de Scheine schpukts!“
„Awer Mächen“, saht der Knecht, „ich denke, de furchst dich oo varn Deiwel nich?“
Da kimmet oo schon Fritze zun Kuhschtall nin. Metten Kopp kukte bloß aus Bund Schtroh raus un saht:
„Jo, var mich hotse mehr Reschpekt als wie varn Deiwel.“ – –
De letzte Zeit tat Fritze jor nischt mehr. Da hotte alle acht Take Jeburtstak, band sich e rotes Band an Arm un junt fechten.
Wenn nämlich Fritze Jeburtstak hotte, da krichte immer vun jeden was jeschenkt.
Eenes Takes wurre varmißt. Wiese nu ins Gemeenehaus koamen un in seine Schtowe kukten, da läht Fritze uffs Bette un is tot.
E is nu tot, awer seine Dummheeten, die e jemacht hot, die ward wo keener so leicht varjessen.
R. Köppe
Een Orijinal – in Bergwitzer Mundart
Quellen: Unser Heimatland vom 23.05.1931
