Wem’mer vun Kämbarch noa Diem’n nuff macht durch den jroßen Busch, far den se Diem’ner Heede soan, denn kimmet mer an’n jroßen Steen varbei, der de mittewäje usff de Stroase läht, daß de mer de met Färe kimmet, drum rum foahrn muß.
Das is dr Luthersteen.
N poar jrose Beeme stehn um’n rum, un ’ne Bank is oh drbei.
Wenn ich nu heeme in de Ferijen woar, denn bin ich oh vill in’n Busch rumjeloofen un bin oh ofte an’n Luthersteen jewäst.
Dr denkt wo bei’s Heelebärnblicken?
Ei nee, das woar mich ze knieperich, un denn die ahle Mietschken.
Wem’mer doa so kuwert un denn beis Blicken schwitzen duht,
denn kimmet des ahle Jeziefer un bebockt un beißt eenen.
Un wem’mer denn sich de Finger met Heelebärn bemaddert hat un sich denn kratzen duht, denn bemaddert mer sich’s Jesichte oh na. Nee, das is nischt far miche.
Nu awwer, ich wulle jo vun’n Luthersteen drzehln uu nich vuns Heelebärnblicken.
Emoa nu, wie ich oh wedder moa durt woar un uff die Bank sazte, denn koamb ne ahle Fra met ne Hucke Holz uff’n Buckel un setzte sich oh uff die Bank un ruchete sich ’n bißchen aus. Se hudde jo sehre vil uffjelott. Se doade mich de Zeit bieten un froade mich denn oh, wu ich denn här wire un was ich so in’n Busch bejinnen däde.
„Nu ja,“ foade se denn, „ihr hat zunt emoa nischt ze duhne, un denn
looft’r so in’n Busch rum, dass’es Essen wedder schmeckt.
Ja, bei uns kummen zunt oh vill sonne Leite varbei, mennichmoa sin oh Weiwesen drbei.“
S’joab denn een Wort s’annere, un ich froade se denn oh, ob se nich wissen däde, wu där jrose Steen här wire.
„Nu,“ soade se, „hat’r denn das nich in de Schule jelernt?“
„Far was jeht’r denn immer na in de Schule.“ Nu, soade ich denne, ich hidde moa jeheert, daß dr Deibel noee Luthern met den Steen jeschmissen hidde, weil hä no’e Leipzig nuff machen wulle, mu’e met
eenen ze dischkerieren hudde, met dän hä nich äusereenkoamb.
Dr Deibel hidde nich bloß met dän eenen Steen no’e ’n jeschmissen, nee, met na mehr. Met die annern hidde jlei joarniche jetroffen. Eeener drvunt läht in’n Reenarzer Busch, eener nich weit vun Barx’s; sillen jo oh na mehr jewäst sin. Nu ja, un denn zeletzt hidde dr Deibel denn den jrätsten Steen jenummen, där de nu hie läht, awwer jetroffen hudd’n oh wedder niche, weil’n jo emo’a nischt anhonn kunne. Un denn hidde sich jearjert un sich dammseichte jemacht. Nu, soade denn die ahle Fra, dadrvunt hidde se na nischt jeheert, ’s kinne jo sin, awwer se jloomete’s niche.
Un äwerhaupt, met’n Deiwel hidde se emoa nischt in’n Sinn.
„Nee,“ soade se denn, „das is annersch met dän Steen.
Dr ahle Schinser, was mei Jroßvoater woar, där hat’s mich drzehlt; där wußt es vun seine erschte Frau ähre Jroßmutter; die is je wo na kleen jewäst, wu’s bassiert is, un denn ward’s jo oh woahr sin.
Ja, mei Jroßvoater, was äm’n dr ahle Schinser woar, där soade immer: „Kinner,“ soade, „ab’er’sch wollt jloom’n odder nich, dän Steen, den hat dr Dr. Luther in’n Schuhk jehad, weil hä is noa Leipzig jemacht. Un des is jo jewäst.
Jlei hingern Wachmeester, wu’s ’n Barch derheeje jeht, doa woar dr Wäk sehre schlecht, un de Färe vun sein’n Kutschwoan, die kunn’n ’s nich mehr drmachen. Das barmte nu’n Dr. Luthern sehre, un denn is ‚e ausjestähn un beihär jeloofen. Wie ‚e nu hie an dän Fleck jewäst is, doa daod’n uff emoa dr Schuhk dricken un ä mußt’n austrecken.
Un denn doad’r ’n kleen’n Steen fing’n, der de jedrickt hudde, un dän schmiß hä denn hie uff’n Wäk, un des is nu dr Luthersteen jeworrn, bloß daß ‚e nu ämn jewachsen is. Denn sonne Steene, die wachsen doch oh; wu kinne denn sinsten so jroß sin?
Ja, jo is des jewäst, so un nich annerschter.“
„Nee,“ soade se denne, „nu hamwe ich mich hie varschlawwert. Ich muß machen, daß ich na var Dunkern heeme kumme. Ich muß ja ’s Veeh na was jähn.“
Ich doade se denn ähre Holzhucke uffhelfen, un denn machte se sich furt. Ich bleb ehr na sitzen. Das met das Wachsen vun die Steene, das wulle mich jo nu nich deichten. Ich hudde‘ ja uff de Schule annersch jelarnd. Awwer, soade ich so far miche, sonne ahle Leite, die han jroade männichmoa recht; worum sille das nich woahr sin?
Ich hudde jo oh jelarnd, daß aus alles, was unse Dr. Martin Luther moa anjepackt hudde, was Jroßes jeworrn is.
Un denn junk ich oh heem.
Dr. Galle
Quelle: Unser Heimatland vom 27.09.1930
