Eine wahre Begebenheit
Wenns Winter is unds zeitich dunker werd, denn kummen uffs Dorf oan Oabend alle Mächens zusammen unn reißen Jänsefeddern.
Des is Sie denn awer oh jädes Moal en Jejuche.
Da sitzen se denn alle um enen jroßen Tisch rum unn denn jehts Ruppen los. Da wärn denn Schauermarchen arzählt, Dummheten ausjeheckt un Schawernck jeübt, daß das Jekichere üwerhaubt nich widder ofhört. Unn wenn denn zum Kaffee unn Kuchen die Burschens noch kummen, nu denn erscht!
Denn jiwitz keen Herstenich unn och keen Siehstenich bei das Jungvolk unn alles Räden nitzt jarnicht!
– Nu neilich och, doa woarn se alle bei Schwarzens un ruppten.
Uff eenmal jäht de Diere uff, unn der oale Schulze kummt rin,
„Oh, Schulzens Vader, des is awer scheene, daß ihr och mal kummt,“ riefen se, „doa ungene schtieht noch’n Schtuhl, da kunnter eich įleich druffsetzen unn uns ne Jeschichte arzähln, ihr sid jrade dran“.
Un se freiten sich, mal widder enen erwischt ze ham.
Was nu Schulzens Vader is, der ließ sich och jarnich lange netigen un froahte:
„Kennt ihr denn och allens die forchtbare Sache, die vor, ach, wer weß wie lange, bei Straach passiert is? – Nee? – Na denn paßt mal uff!“
“ ’s woar dunnemals in recht dreher Summer. Wir hadden jrade noch’s Hei rinjekricht, als en janz forchterliches Jewitter rufzoch. Was nu, Spacklehmanns Karle war aus Straach, der hade uns beis Heimachen jehulfen unn wullte jleich widder heme.
Wir wullten ihn nu abräden, weils so sehre räjente; awer nun, er woar nich zu haalen unn machte sich im tullsten Wetter uffn Wäg. Nu, was sull ich nich san, wir wullen uns äben ans Abendbrot setzen, doa is Spacklehmanns Karle widder doa!
Awer wie! Kaum widder ze kennen war e!
Janz käkich sahte aus unn war janz außer Oatem.
„Herrejeses,“ meente unse Mudder, „Nu Karle, wie siehste denn aus?“ Awer Karle kunnte kaum reden. Ich jaben denn įleich n‘ Bittern, unn denn kamer langsam widder zu sich.
„Nee“, sahter, „ich bin duch nu och beide Soldaten gewäst unn hawe keene Forcht nich jehabt; awer sowas, woas mich doa bejähnet is, des is mich im janzen Läben noch nich vorjekummen.
Kumm ich dorch n Dornheckenbarch runner, als es widder mächtig an ze pladdern fing. Na, dacht ich bei mich, nu machste awer, daß de mang de Fichten kummst, sonst biste janz dorch.
Unn wie ich doa drinne binn, doa jießts, blitzts unn dunnerts los, als wulle de Weld unnerjähn. Unn wies widder so blitzt, da stäht was vor mich, daß ich nich weider kann. Nu will ich hinfoassen unns beiseite schiewen, doa blitzts widder, unn doa sah ich doch, daß en riesenjroßer schwarzer Sarch vor mich schtieht.
Wie ich nu enjermaßen üwer meinen Schreck hin bin unn fix weider will, doa jäht uff emal der Sarchdeckel uff unne janz kahle un feichte Hoand will mich feste hoalen.
Nee, hawich mich denn jedacht, so schnell sull dich der Deuwel nu oh nich krähn unn bin jeloofen, was ich loofen kunne.“
„Awer nu Karle, du werscht mich doch nich ans Spuken jloben,“
mente ich zu’n, „en so strammer Koarl wie du bist!“
„Nee, nee,“ sahter ze mich, „alleene jäh ich doa nich widder lang.“
„Nu“, hawich denn jesaht, „denn wärich man mal mitkummen.“
Awar unse Mudder die meete: „Vader, jähk nich mit, das wärd zu späte for dich denn kann doch Spacklehmanns Karle die Nacht
üwer hierbleben“.
Na, ’s war je in Worklichket jarnich ums Zuspätekummen zu duhnn jewäst, un nur ehre Angst um mich dahinner varborgen.
Awer ich daht so, als marktich das nich unn sahte
„Nu, denn känne wir je de Fähre nähmme“, unn ließ de Braunen ufschnallen. Unn dann ritten wir los. Es hadde midlerweile ze räjnen ufgehört, awer dunnern dads noch.
Wie wir nu widder uffen Dornheckenbarch sin, doa ment Spacklehmanns Karle zu mich: „Weste Du, hier werd der Wäch zu enge, reite man schon immer vurnewech.“
Mich wars ja nu och nich jrade jeheuer zumute, awer ich machte vurnewech unn markte boale, daß Spacklehmanns Karle jarnich mehr hinner mich woar, doch da warich schon bei den Fichten.
„Nu man rin“, dachtich, „unn nachjesähn woas doa los is.“
Unn kaum bin ich drinne, doa jäht de Liese hinnen unn vorne hok unn will nich mehr weiter. Unn wie ich nu absteije unn se führen will, da sähich duch worklich enen Sarch vor mich schtiehn!
Nachdem ich mich vom erschten Schreck erholt hawe, denkich;
„Du werst duch mal sähn, ob das Jeschpenst den Ochsenziemer“, den hoddich mich nämlich mitjenommen, „vertrachen kann.“
Ich nähme den also unn schlae damit uffn Sarchdeckel.
Unn richtig, der Sarchdeckel jäht hot, Hand kummt raus, unn ne janz tiefe Stimme, die mich recht bekannt vur koam, sahte:
„Na, räjents denn immer noch?“
Unn wie ich mich nu das Gespenst näher begucke, isses der Tischlermester vun Straach.
Der war sich nämlίch, als er enen Sarch ins nächste Dorf schaffen wullte, ins Wetter jekummen unn hadde dann n‘ Sarch vom Waagen jenummen unn sich rinjeläht.
Weils nu so dunker war, isser baale injeschlafen, noachdemer n‘ paarmal durchs Handrausstecken gefiehlt hadde, obs immer nuch räjente, Nu, der had sich vielleicht jefreit, als ich’n de Jespensterjeschichte vun Spacklehmanns Karle erzählen tat.
Nu awer de Mächens!
Die warn na solange stille jewäst, die kunnen sich vor Lachen jarnich mehr hoalen.
Schulzens Vater awer sahde: „Ja, ja, so isses immer met die Jeschpenster; wenn mer der Sache richtig uff’n Jrund geht, da erklärt sich alles uff janz natierliche Weise. Das markt eich.“
Karl Brüsch
Quelle: Unser Heimatland vom 02.06.1926